UKERA KABEBETEAM MAN TE TABEAIANGA
Iai te Tai ae E na Toki Iai te Tabeaianga
E kona te wanawana man te Baibara ni buokira bwa ti na aki rangi n tabeaianga. Ti bon aki kona ni katoki baika karika tabeaiangara. Ma e kona ni katoki ara tia Karikiriki. E a tia naba ni mwiokoa temanna bwa ara tia ibuobuoki. Teuaei bon Iesu Kristo. E nang karaoi baika kamimi riki ni kabutaa te aonnaba nakoni baike e karaoi ngkoa ni menana n te aonnaba bwa te aomata. N te katoto:
E NA KAMARURUNGA AE AORAKI IESU N ARON ARE E KARAOIA.
“Ao aomata a kairiia te koraki ni kabane nakoina ake a karawawataaki n aoraki aika kakaokoro . . . , ao e kamarurungia.”—MATAIO 4:24.
E NA KATAURAOI AUTI AO AMWARAKE IESU IBUKIA AOMATA NAKO.
“A na katei auti [taan tautaekanaki irouni Kristo] ao a na maeka i nanoia, ao a na uniki kureebe ni nne ni kureebe ao ni kang uaaia. A na aki katea ae e na maeka iai temanna, ao a na aki naba unika ae a na kanna tabemwaang.”—ITAIA 65:21, 22.
E NA BUTANAKO N TE AONNABA TE RAU AO TE MWERAOI I AAN ANA TAUTAEKA IESU.
“A na maiureirei akana raoiroi n ana bong, ao e na bati te raoi ni karokoa ae ai akea namwakaina. E na tautaeka man taari teuana nakon taari teuana, ao man te Karaanga nako tabon nako aonnaba. . . . A na newenewea te tano akana kairiribai nakoina.”—TAIAN ARERU 72:7-9.
E NA KATOKA TE RIBUAKA IESU.
“E na nanoangaiia akana mangori ma akana maiu ni kainnano, ao e na kamaiuia akana maiu ni kainnano. E na kamaiuia man te karawawataaki ao man te iowawa.”—TAIAN ARERU 72:13, 14.
E NA KATOKA NABA TE RAWAWATA AO TE MATE IESU.
“E nang akea riki te mate, ke te nanokawaki ke te tang ke te maraki.”—TE KAOTIOTI 21:4.
Ko Bae Naba n Tangira
TITIRAKI AIKA KAEKAAKI MAN TE BAIBARA
Tera ae E na Kakororaoia Ana Tautaeka n Uea te Atua?
Reiakina te bae ko na kariaa ngkana e a kairiri ana tautaeka te Atua n te aonnaba ni kabutaa.
