Te tabeaianga bon aron rabwatam ni kaitaraa te bae riki ae kangaanga. E kaotinakoi bwain te rabwata aika aranaki bwa taian hormone kaburorom. Ibukin anne, e a tata iai buroom, e a birimwaaka butin raraam, a a bubura ke n uarereke maamaam, ao n tiki iai am mwatireti. E a kaman tauraoi rabwatam ni karaoa te mwakuri, imwain ae ko ataa raoi te bae riki. Ngkana e a toki tabeaiangam, ao e a okira naba arona rabwatam n aron are taneiai iai mai mwaina.

Te tabeaianga bon te bae riiriki ae buokiko bwa ko na kona ni kaaitarai baika kangaanga ke ni karuanikai. E moan rotaki n te tabeaianga kaburorom. Te tabeaianga ae raoiroi e kairiko bwa ko na waekoa ni karaoa te bwai teuana. Te tabeaianga ae bon tau e kona naba ni buokiko bwa ko na roko n tiam ke ko na karaoa ae tamaroa riki, tao n am ukeuke, n ukeram ibukin te kareke mwakuri, ke n tain te takaakaro.

Ma ko kona n ruanikai n te tabeaianga ae maan ao ae riao, ke ae wenemaan. E kona n rotakibuaka rabwatam, am namakin, ao am iango ngkana ko a bon tatabeaianga naba. E kona ni bitaki iai aroarom n ikotaki ma arom nakoia aomata. E kona te tabeaianga ae wenemaan ni kairiri nakoni kabonganaani bwaai n te aro ae riao ao baika a kona n rota marurungin rabwatam. E kona naba ni kairiri nakon te rawawatannano, te kua, ke iango ni bakabure.

E ngae ngke tao a kakaokoro aroia aomata n rotaki n te tabeaianga, ma e boni kona ni karekei aoraki aika kakaokoro. Ao a kona n rotakibuaka iai bwain rabwatara.