IBUKIA AKE A ATAEI RIKI
12: Tiia
AE NANONAKI IAI
E bati ae nanonaki riki n te tia nakon ae tii te mii, ae te bwai ae ko iangoia bwa e na reke. Tiia ni koaua a tangira te babaire moa, a kona ni bibitaki, ao te mwakuri korakora.
Iai tiia aika kainnanoa te tai ae uarereke (tii tabeua te bong ke te wiki), iai aika kainnanoa ae maan teutana (iraua namwakaina), ao iai aika rangi ni maan (e ririki ke e nako riki). Ti kona ni karekei tiia aika kainnanoa te tai ae maan, ngkana ti kakaraoi tiia aika bon tau maania, teuana imwin teuana.
BUKINA NGKAI E KAKAWAKI BWA E NA IAI TIAM
Rorokom n tiam e kona ni karikirakea onimakinam i bon iroum, e kakorakoraa am iraorao ma aomata, ao e kabatiaa kukureim.
Onimakinam i bon iroum: Ngkana ko katei tiam aika uarereke ao ni kakororaoi, ko na onimakinna ae ko konai ake a kangaanga riki. Ko na namakinna naba ae ko a kona riki ni kaaitarai kangaanga ni katoabong, n aroni kaririam irouia tabonrorom.
Te iraorao ma aomata: A kani memena aomata i rarikia naake iai tiaia aika uaiakin, ae taekaia naake a ataa te bae a tangiria ao ni kani mwakuria rekena. Irarikin anne, te anga ae te kabanea n raoiroi ibukini karikirakean te iraorao bon te mwakuri ma temanna n uaiakina te tia teuana.
Te kukurei: Ngkana ko kakatei tiam ao ni kakororaoi, ko namakina iai ae ko tokanikai.
“I kani kakatei tiau. A kakatabetabeai ao ni kakauringai te bae I riai n uaiakinna. Ao ngkana ko roko n tiam teuana, e kakukurei iaiangoana ao ko kona ni kangai, ‘Auee, ngaia I boni konaa! E a reke te baere I uaiakinna.’”—Christopher.
TE BOTO N REIREI MAN TE BAIBARA: “Ngkana ko tatataningaa raoin te ang ma kanoan te bong, ao ane ko na bon aki ununiki ao n aki naba taia te bwai teuana.”—Te Minita 11:4, Today’s English Version.
TE BWAI AE KO KONA NI KARAOIA
Karaoi mwaneka aikai ni kakatea iai tiam ao ni kakororaoi.
Atai Tiam. Karinani tiam aika kai reke ao karinani raoi man aika kakawaki moa, rinei ake ko na karaoi moa, ao ake imwina, ao ake imwina riki, ao ai arona nako naba.
Am Babaire. Karaoi baika i nano ni kaineti ma te tia teuana ma teuana:
-
Bairea te tai ae e na tia iai.
-
Bairei mwaneka aika a na karaoaki iai.
-
Moantaai ni katautaui kangaanga ake a na bae n riki ao iangoa arom n tokanikai i aoia.
Mwakuria. Tai tatataningaa banen rongorongoia ao ko a tibwa mwakuria. Titirakiniko ni kangai, ‘Tera te moanibwai ae I kona ni karaoia ibukin tiau ae I uaiakinna aei?’ Ao karaoia. Taua mwin am kekeiaki, ngkana ko roko n te mwaneka teuana ma teuana.
TE BOTO N REIREI MAN TE BAIBARA: “A na bon nakoraoi ana babaire te aomata ae mwakuri korakora.”—Taeka N Rabakau 21:5.
