N TAAI ake a karakinaki n te Baibara, ao te tia mare te mwaane e kabwakaa boon te tia mare te aine nakoia ana utu neiei n te tai are baireaki iai te mare. Boon te tia mare te aine, boni bwaai aika kakawaki, maan, ke te mwane. N tabetai, e kona ni kabwakaaki te boo anne ni karaoan te mwakuri, n aron are e riki iroun Iakoba are kariaia bwa e na mwakuri iroun taman Rakera i nanon itiua te ririki, bwa e aonga ni mare ma Rakera. (KBwaai 29:17, 18, 20) Tera bukini karaoan te katei aei?

E taekina aei temanna te tia rabakau n te Baibara ae Carol Meyers: “E kabwakaaki boon te tia mare te aine bwa e na kabooaki mwin te bwai are a kabuaa ana utu neienne, ngkai e rangi ni kakawaki ana mwakuri te nati te aine n te maiu n ununiki n ana utu.” E kona naba ni kamanenaaki boon te tia mare te aine ibukini kakorakoraan riki te itoman i marenaia utu aika uoua aikai. A a kona ngkanne kaain utu aika uoua aikai n ibuobuoki i marenaia n taai ni kangaanga. E kaotaki naba n te boo anne bwa te aine ae e a kabae e nangi mwaing mai aan ana tararua ao ana kamanomano tamana, nako aani buuna.

E aki nanonaki ni kabwakaani boon te tia mare te aine bwa e a riki bwa te bwai ae kona ni kabooaki ao ni manga kaboonakoaki. E taekinaki aei n te boki ae Ancient Israel—Its Life and Institutions: “Kabwakaan te mwaiti ni mwane ke bwaai riki tabeua ae boraoi ma are a baireia ana utu te teinnaine, e a taraaki iai aia mare tibun Iteraera bwa kaanga te waaki ni boobwai. Ma n taraana, boon te tia mare te aine bon te kaboomwi nakoia ana utu, ao tiaki boona n aron ae kaanga e a kaboonakoaki.”

Ni boong aikai, iai aaba tabeua aika teimatoa ni waakina te katei aei. Ngkana a bairea boon te tia mare te aine kaaro aika Kristian, e riai n ‘ataaki wanawanaia irouia aomata nako,’ n aroia n aki bairea te boo ae riaon ae riai. (IBir. 4:5; 1Kor. 10:32, 33) Ni karaoan aei, a a kaotia iai bwa a aki bakimwane ao n nanonrang. (2Tim. 3:2) Irarikin anne, ngkana kaaro aika Kristian a aki tuatua boon te tia mare te aine ae rangi n riao, e na aki kairoroaki te buu te mwaane bwa e na taona ana mare ao n taningaa koron te mwaiti anne. Ke e na aki naba iangoia teuanne bwa e a riai ni katoka ana mwakuri ni bwaiania ao ni mwakuri ni kareketianti ni kabwanina ana tai, bwa e aonga ni koro boon te tia mare te aine ane bobuaka anne.

N taabo tabeua n te aonnaba, e tiatianaki boon te tia mare te aine man te tautaeka. Ngkana anne ae karaoaki n te tabo are a maeka iai Kristian, a riai kaaro n ongeaba n tuana. Bukin tera? Ibukina bwa a riai Kristian n “aantaeka . . . irouia ake a mwiokoaki n te mwaaka n tautaeka,” ao n ongeaba n tuua ake a aki kauntaba ma ana tua te Atua.—IRom 13:1; Mwa. 5:29.