A kakoauaa angia aomata bwa iai mwakuri aika bon eti ke a boni kairua. N te katoto, e korakora kabuakakaan te tiritiri, te tautau, ao tangakoaia ataei, ma a boni kamoamoaaki naake a ataa ae riai, a akoi, ao a atataiaomata. Ma motinnano ibukini bwaai tabeua—ake a irekereke ma karaoan te wene ni bure, ke bwabwainan te koaua, ke arora ni kaikawaia ataei—a iangoia aomata aika bati bwa akea kairuan rinean are a bon tangiria ni kaineti ma baikai. Irouia, a kariaiakaki angiini motinnano ake a na karaoi. A aki toki aomata ni karaoi aia motinnano i aon te bwai are a iangoia ke a iangoia aomata ake i rarikia. E kona n onimakinaki n taai nako te iango anne?

Ti aki toki ni kabotoa karaoan ara motinnano i aon te bae ti namakinna ke ae ti iangoia bwa e eti ke e kairua, ae nako man te bwai ae rangi n ataaki bwa mataniwin nanora. (I-Rom 2:14, 15) Ti a kaman ataa te kaokoro i marenan ae riai ao ae aki riai boni mangke ti uarereke, ao e kona naba n tabetabe iai mataniwin nanora. E kona mataniwin nanora ni kairaki irouia ara utu, tabonrorora, ara tia reirei, kaain ara kaawa, ara Aro, ao ara katei. Ngkana ti karaoi motinnano, e na tuangira mataniwin nanora bwa ara motinnano anne e eti ke e kairua.

E kona ataakin ae eti ao ae kairua ni kairira bwa ti na kaotiota te atataiaomata, te kakaitau, te riai, ao te nanoanga nakoia tabemwaang. E kona naba ni kairira bwa ti na aki karaoi mwakuri ake a na maraki iai naake a tangiraki iroura ke baike ti na maamaa iai ke ni bwaibwainrang iai, ao n tabetabe iai nanora.

Arora ni kaineti ma baike ti iangoi bon te bwai ni kairiri ae kona n onimakinaki n taai nako? Ngke e roro n rikirake Garrick, ao e rinea te maiu ae e kangai iai, “I kona ni karaoi baike I taku bwa N na karaoi.” Ma e a noria bwa karaoani baike e iangoi bwa a eti, e aki kairia nakon te bwai ae raoiroi. E a kairaki iai bwa e na maiuakina te maiu are e a kabwarabwaraa imwina bwa, “te maiu ae aki kakukurei, are e kakaraoa iai te aroaro ae kammaira, te turaki, te koro ni manging, ao te mwakuri n iowawa ae bati.”

Irarikin are ti boni kakaraoi baike ti iangoi, ti aki toki naba ni kairaki bwa ti na karaoa ara motinnano man te bwai are a iangoia aomata. Ti kona ni buokaki iai man te bwai are a a tia n rinanona ao mani wanawanaia. A kona naba ni karineira ara utu, raoraora, ao kaain ara kaawa, ngkana ti kakaraoa te baere a iangoia bwa e eti.

Aroia aomata ni kaineti ma baike a iangoi bon te bwai ni kairiri ae kona n onimakinaki n taai nako? Ngke te roro n rikirake Priscila, ao e maiuakina ae a kakaraoia tabonrorona, ao e kakaraoa naba te wene ni bure. Ma e a ataia ae karaoan are a iangoia tabemwaang bwa e eti, e bon aki karekea kukureina. E taku neiei: “Karaoan te bwai ae a kakaraoia aomata, bon akea kakabwaiaau iai. E kairai bwa N na karaoi mwakuri aika kaota te aki wanawana ao aika karuanikai.”

Ngkana ti baireia bwa e nga ae eti ao ae kairua, ao e rangi ni kakawaki ngkanne ara iango ao aia iango naba tabemwaang. Ma e aki kairiri n taai nako anne nakon te bae nakoraoi. Ti kona n rotakibuaka ke a rotakibuaka tabemwaang, ibukina bwa ti aki kona n nora tokini kawaira. (Taeka N Rabakau 14:12) Ao e ngae ngke ti iangoia ma tabemwaang bwa e raoiroi te bwai are ti karaoia, ma ti boni kona ni kairaki iai nakon te bwai ae karuanikai ao a kona ni manga bitaki iango akanne. Iai aroaro tabeua ake a iangoaki ngkoa bwa a kairua ma ngkai a a manga kariaiakaki, ao anua ake a iangoaki ngkoa bwa a aki raoiroi a a manga iangoaki bwa a raoiroi ngkai.

Iai te bwai ni kairiri ae tamaroa riki ibukini bairean ae eti ao ae kairua? Iai te kaetieti ibukin te aroaro ni maiu ae riai ae ti kona n iriria ni boong aikai ae a na aki manga bwara nanora iai imwina riki?

Ti kakaitau bwa iai nibwan te kairiri ae teimatoa, ao kairani maiura ae kona n onimakinaki ibukin te aroaro ni maiu ae riai ae nakoraoi ibukia aomata n taabo nako. E na maroroakinaki n te kaongora ae imwina bwa ti na karekea ia te bwai ni kairiri ae kona n rangi n onimakinaki ibukini bairean ae eti ao ae kairua.