1. Te Tekateka n Taanga Imwin te Mare

A kakaokoro aia iango aomata ibukin te tekateka n taanga ao aroni karekean te kukurei iai.

AE NANONAKI IAI: E boni moan riki te tekateka n taanga mairoun te Atua, ngaia are e bon ataa te bwai ae a kainnanoia taanga bwa a aonga ni kukurei. (Mareko 10:6-9) E reke te kakukurei n te tekateka n taanga ngkana a aki kaatuua taanga te bwai ae a tangiria i bon irouia, ma a karaoa ae a konaa ibukini kateimatoaan aia mare. Te buu te mwaane ae tangira buuna, e na kaotia mani mwannanoan ao tabeakinani buuna irouna. Ao te buu te aine ae karinea buuna, e na kaotia man tein ana taetae ao ana mwakuri.

E MATERAOI ANA KAIRIRI TE BAIBARA: A namakinna Quang ao Thi aika kaain Vietnam bwa e aki kona n nakoraoi tekatekaia n taanga. E aki kaokaota te akoi Quang. E taku: “I aki tatabe ma ana namakin buu ae Thi, ao I kakabwainrangnga.” E tangiria ni kani buuraure Thi. E taku neiei: “E a roko irou are I aikoa onimakina buu ke ni karinea.”

N tokina a a reirei n te Baibara Quang ao Thi, ao a a reiakina aroia ni maiuakina I-Ebeto 5:33 i nanon tekatekaia. E taku Quang, “E buokai te kibu aei bwa N na ataa kakawakini kaotiotan te akoi, ao I a kona ni kaota tangiran Thi irou ao n tabeakinna ni kainnanona n te aro n rabwata ao n ana namakin naba. Ngke I karaoa anne, ao e a tangirai ao ni karineai.” Ao e taku Thi, “Ngke I a kaotiota riki maiuakinan I-Ebeto 5:33 ao ni kakarinea buu, I a namakinna bwa e a kaotiota riki tangirakiu, kamanoau, ao I rau iai.”

 2. Arora Nakoia Aomata

A aki toki aomata ni bwainikirinia tabemwaang ibukin aia reeti, abaia, taraakia, aia Aro, ke aroia ni binabinamwaane ke ni binabinaaine.

AE NANONAKI IAI: E aki reireinira te Baibara bwa ti na riribaiia reeti ke aaba ake tabeua, ke aomata aika binabinamwaane ke ni binabinaaine. Ma e kaungaira bwa ti na karineia aomata nako, n aki ongei kaokoron aia reeti, abaia, ke aroia bwa a kaubwai, ke a maiu ni kainnano. (Mwakuri 10:34) E ngae ngke ti aki boraoi n iango ma te baere a kakoauaa tabemwaang ke aroia ni karaoi bwaai, ma ti boni kona ni kaota akoaia ao karineaia.—Mataio 7:12.

E MATERAOI ANA KAIRIRI TE BAIBARA: E reireinaki Daniel bwa e na iangoiia kaain Atia bwa aomata aika karuanikai nakon abana. Ao ibukin anne e a rangi n riribaiia naake iai aia itera n Atia, ao e kakabwainrangia i mataia aomata. E taku, “Irou, arou aio, I kaotia iai bwa I ‘boutokaa abau.’I aki bae n iangoia ae e kairua arou ke au iango aei.”

N tokina ao e a karekea reireiana Daniel man te Baibara. E taku, “I bon riai raoi ni bita arou n iaiango. I riai n taraiia aomata n aron taraakia iroun te Atua—ae a bane n titeboo aroia n aki ongeia bwa kaain ia.” E kabwarabwaraa Daniel ana namakin ngkai ngkana e kaitiboo ma aomata. E taku: “I a aki tabe bwa tao kaain ia ngaiia. I a tangiriia aomata n aekaia nako, ao a a reke raoraou ni kaan man taabo aika kakaokoro ni kabutaa te aonnaba.”

 3. Te Mwane

A bati aomata aika uaiakina te kani kaubwai bwa a aonga ni kukurei ao n toronibwai n taai aika imwaia.

AE NANONAKI IAI: Ti kainnanoa te mwane, ma e aki kona ni karekea kukureira ni koaua ke ni kanakoraoi taai aika imwaira. (Taeka N Rabakau 18:11; 23:4, 5) Ma e boto rekeni kukureira ni koaua ke mweraoira n taai aika imwaira, i aoni maiuakinan te wanawana are mairoun te Atua are n te Baibara.—1 Timoteo 6:17-19.

E MATERAOI ANA KAIRIRI TE BAIBARA: E kaatuua uaiakinan te kani kaubwai Cardo ae kaain Indonesia. E taku teuaei, “A bane n iai au bwai ake a kani karekei angia aomata. I a kona ni mwamwananga ao ni kabooi baika bobuaka, taiani kaa, ao ai auti.” Ma a bon aki teimaan bwaai aikai. E taku Cardo, “I boni babakanikawaiaki, ao te mwane are I mwakuri korakora ni karekea i nanon ririki akanne, e boni bane ni bua i nanon tii te rubenimata. I kabanea maiuu n uaiakina te kaubwai, ma n tokin te tai, ao te bwai ae I karekea bon namakinan ae akea manenani maiuu, akea uaau, ao e bwara nanou.”

E a moana Cardo maiuakinan ana taeka n reirei te Baibara i aon taekan te mwane. E aikoa ngkai kaatuua korakorana ni kabane i aoni karikirakeani kaubwaina, ma e a baireia bwa e na kabebetea maiuna. E taku, “Te kaubwai ae koaua ma n teimaan, bon te reitaki ni koaua ma te Atua. I a kona ngkai ni matu raoi ao I a boni kukurei raoi.”

 4. Te Wene n Taanga

A kakaokoro aia iango aomata ni kaineti ma te wene n taanga ae kariaiakaki.

AE NANONAKI IAI: E tianaki n te Baibara arora ni kaota te nano ni kan wene n taanga. Te taeka ae “wene ni bure” e irekereke ma karaoan te wene ni kimoa, te kakabooaki ibukin te wene ni bure, te wene n taanga i marenaia aika a aki mare, te wene n taanga i marenan te mwaane ma te mwaane ke te aine ma te aine, ao te karaobure ma te man. (1 I-Korinto 6:9, 10) Te wene n taanga bon ana bwaintituaraoi te Atua are e tii kariaia bwa a na karaoia te mwaane ao te aine ake a a tia ni mareaki i marenaia.—Taeka N Rabakau 5:18, 19.

E MATERAOI ANA KAIRIRI TE BAIBARA: E taku te aine ae mena i Aotiteria ae arana Kylie: “Ngke I tuai n iein ao I iangoia bwa ngkana I wene n taanga, N na namakina iai ae I tangiraki ao ni mweraoi. Ma boni kaitaraan raoi anne ae riki. I namakinna bwa I aki mweraoi ao e uruaki nanou.”

Imwina riki ao e a karekea reireiana man te Baibara Kylie ni kaineti ma te wene n taanga ao e maiuakinna. E taku, “I a ataia bwa e boni kamanoira man te maraki ao te uruakinnano ana kaetieti te Atua. I a namakina ngkai te mweraoi ao tangirakiu, ibukina bwa I karaoi bwaai n aron are e tangiria te Atua. E a tia maiuakinan ana kairiri te Baibara ni kamanoai man te uruakinnano ae korakora!”