“Ti aki kakoauaa bwa ti kona n taekina ‘te’ ara ae te Atua, ao ngkana ngaia anne, tao antai ngkanne arana.”​—Professor David Cunningham, Theological Studies.

E taku te Atua: “Bon Iehova Ngai; bon arau aei.” (Itaia 42:​8, BG) Iehova bon te ara n Ebera ae nanona “E Karaoia Bwa E na Riki.”​—Karikani Bwaai 2:​4, NW. Nora te kabwarabwara mai nano.

E tangirira Iehova bwa ti na kamanena arana. E taekinaki ae kangai n te Baibara: “Taboa arana, taekin ana makuri i buakoia botanaomata, tuangia ba e neboaki arana.”​—Itaia 12:​4, BG.

E kamanena aran te Atua Iesu. N ana tataro ao e tuanga Iehova ni kangai: “I a tia ni kaotiota aram nakoia [taan rimwin Iesu] ao N na boni manga kaotia.” Bukin tera bwa e kaotiota aran te Atua Iesu nakoia taan rimwina? E tomaia ni kangai: “Bwa e aonga ni mena i nanoia te tangira are ko tangirai iai, ao N na katiteuanaaki ma ngaiia.”​—Ioane 17:26.

E korea ae kangai te tia rabakau i aon te Baibara ae Walter Lowrie: “Ane e aki ataa te Atua n arana ao e bon aki kina raoi bwa te aomata, ao e aki kona n tangiria ngkana e ataia bwa tii te mwaaka ae korakora.”

E irira te taromauri ni katoa wiki te mwaane ae Victor, ma akea namakinan ae e kinaa raoi te Atua. E taku: “Imwina riki, I a ataa aran te Atua bwa Iehova, ao titeboo ma kaanga te kabwarabwara ae I a tibwa ongo. I namakinna bwa kanga I a tibwa kaitiboo ma Teuare e bati taekana are I a kaman ongongo. I a kona n ataia bwa bon te Aomata ni koaua ao I a karikirakea au iraorao ma ngaia.”

Mangaia are e kaan Iehova ma te koraki aika kamanena arana. Ni kaineti ma “akana iangoa arana,” e berita te Atua ni kangai: “N na nanoangaiia, n ai aron te aomata ae nanoangaea natina ae bebeku i rouna.” (Maraki 3:​16, 17, BG) A kakabwaiaaki naba iroun te Atua te koraki ake a taboa arana. E taekinaki ae kangai n te Baibara: “Ane taboa aran Iehova ao e na kamaiuaki.”​—I-Rom 10:13.