ATUN TE MAEKATIN | KEEWE AIKA KAIRIRI NAKON IANGOAN AE E AKI TATANGIRA TE ATUA
Te Kewe ae Kairiri Nakon Iangoan te Atua Bwa te Miterio
TE BWAI AE A KAKOAUAA AOMATA AIKA BATI
E kakoauaaki n Aaro ni Kristian “aika tenua aika rangi ni bubura aika te Aro ni Katorika, te Aro n Orthodox n te aono ni Mainiku ao te Aro ni Boretetanti, bwa temanna te Atua ae teniman i nanona bwa te Atua te Tama, te Atua te Nati ao te Atua te Taamnei ae Raoiroi. Ni kaineti ma te reirei ni Kristian, a bon aki kinaaki bwa atua aika teniman, ma aomata aika teniman aikai a a riki bwa tii temanna.”—The New Encyclopædia Britannica.
TE KOAUA MAN TE BAIBARA
Bon akea te tai ae taekinna iai Iesu ae Natin te Atua bwa e boraoi ke titeboo ngaia ma Tamana. Ma e taekina ae kangai: “I a nakon te Tama, ibukina bwa e kakannato riki te Tama nakoiu.” (Ioane 14:28) E tuanga naba temanna mai buakoia taan rimwina ni kangai: “N na rierake nakon Tamau ao Tamami, ao nakon Atuau ao Atuami.”—Ioane 20:17.
Bon tiaki te aomata te taamnei ae raoiroi. A “kaonaki n te taamnei ae raoiroi” Kristian ake rimoa, ao e taku Iehova: “N na kabwaroa taamneiu ae raoiroi i aoia aeka n aomata nako.” (Mwakuri 2:1-4, 17) Tiaki kanoan te Temanna n teniman te taamnei ae raoiroi, ma boni mwaakan te Atua ae mwamwakuri.
BUKINI KAKAWAKINA
A kabwarabwaraa te Temanna n teniman taan rabakau man te Aro ni Katorika aika Karl Rahner ao Herbert Vorgrimler bwa “e aki kona n ota te aba iai n akea te kaotioti ao e aki kona n tabwanin te ota iai e ngae naba ngkana e a tia n roko te kaotioti.” Ko kona n tangira raoi te aomata ae kangaanga kinaakina ke otam n taekana? Mangaia are e tuka kinaakin ao tangiran te Atua, te reirei ae te Temanna n teniman.
E ataia Marco ae taekinaki n te moani kaongora bwa te bwai n tutuki te reirei ae Temanna n teniman. E taku: “I iangoia bwa e karabai aroarona te Atua mairou ao ibukin anne e a aki tabeakinai riki, e kangaanga te ota iai, ao e aki kai kawaraki.” Ma e ngae n anne, “tiaki te tia karika te kiriwe te Atua.” (1 I-Korinto 14:33, Te Baibara) E bon aki karabai aroarona mairoura. E bon tangirira bwa ti na ataia. E taku Iesu: “Ti taromauria ae ti ataia.”—Ioane 4:22.
E taku Marco: “Ngke I a ataia ae tiaki kanoan te Temanna n teniman te Atua, n tokina I a boni kona ni moana au iraorao ma ngaia.” E na rangi ni kai reke tangiran te Atua ngkana ti iangoia bwa te Aomata ae kaokoro, n oneani mwin are ti na iangoia bwa te ianena ae kangaanga kinaakina. E taekinaki ae kangai n te Baibara: “Ane aki tatangira ao e aki ataa te Atua, bwa te Atua bon te tangira.”—1 Ioane 4:8.
