KIOINA ngkai e a maan ni kabonganaaki te taeka ae “te tia kaitaraa Kristo” ibukini kabwarabwaraani bwaai, ni moa mairouia ueea ni karokoa atuni birim, e a kona n rio te titiraki ae kangai: Antai te tia kaitaraa Kristo? Iai irekereken te taeka aei ma ngaira ni boong aikai? Ni koauana, te moan tabo ae ti riai ni kakaaea iai bwa antai te tia kaitaraa Kristo bon te Baibara, ike e kaoti iai taekana nimaua te tai.

E kamanenaaki te taeka ae “te tia kaitaraa Kristo” iroun te tia korea te Baibara ae te abotoro Ioane. E kangaa ni kabwarabwaraa te taeka anne? Nori ana taeka n ana moan reta are ingoanaki n arana ae kangai: “Ataei aika uarereke, ai bon te kabanea n tai aei, ao n aron are kam ongo bwa e na roko te tia kaitaraa Kristo, ao a a bati ngkai taani kaitaraa Kristo aika kaoti, mangaia ae ti a ataia iai bwa ai bon te kabanea n tai aei. A mena i buakora ngkoa ma a a otinako mairoura bwa ai tiaki raora . . . Antai te tia kewe? Tiaki bon te aomata are taku bwa tiaki Iesu te Kristo? Boni ngaia te tia kaitaraa Kristo ae kakeaa te Tama ao te Nati.”—1 Ioane 2:18, 19, 22.

Tera reireiara man taeka akanne? E taekinna Ioane bwa “a a bati ngkai taani kaitaraa Kristo” ike e kaotia iai bwa bon tiaki tii temanna te tia kaitaraa Kristo ma e tei ibukin te kurubu n aomata ae mwaiti. E tataekini keewe te tia kaitaraa Kristo are kaainaki irouia aomata aika mwaiti bwa aongkoa tiaki te Kristo ke te Mesia Iesu ao ni kataia naba ni kabwaoua taekan te reitaki i marenan te Atua ao Natina ae Iesu Kristo. A taekinia bwa aongkoa Kristo ngaiia ke taan tei ibukina ma a a tia n “otinako mairoura,” a a rairakinako man ana reirei te Baibara aika koaua. Irarikin anne, bon iai naba kaain te kurubu aei ngke e korea ana reta Bauro n “te kabanea n tai” ae tao n tokin aia tai abotoro.

Tera ae koreia riki Ioane ibukin taekan te tia kaitaraa Kristo? E kauring ni kangai ngke e taekinia burabeti ni kewe: “A nako mairoun te Atua taeka nako aika reke rinanon te taamnei, aika kaota tauani bukin Iesu Kristo bwa e roko n te rabwata. Ma taeka nako aika reke rinanon te taamnei aika aki kaota tauani bukin Iesu, a aki nako mairoun te Atua, ma bon ana taeka te tia kaitaraa Kristo are kam a tia n ongo bwa e na roko, ao e a mena ngkai n te aonnaba.” (1 Ioane 4:2, 3) E katuruturua te reirei ae kakawaki aei ni kangai imwina n ana kauoua n reta: “A mwaiti taani bureburea te aba aika kaoti n te aonnaba, ae aomata aika aki kaota tauani bukin Iesu Kristo bwa e roko n te rabwata. Te aomata ae karaoa aei bon te tia bureburea te aba ao te tia kaitaraa Kristo.” (2 Ioane 7) E bon ota raoi Ioane bwa te tia kaitaraa Kristo, bon taekaia te koraki ake a tataekin reirei aika kewe ibukin Iesu Kristo ao ana angareirei.

E a kaman reireinia taan rimwina Iesu Kristo imwain ae e koroboki Ioane ibukia taan taekin reirei aika kewe ni kangai: “Tarataraingkami mairouia burabeti  ni kewe akana nakoimi ni baka n tiibu, ma boni kameaanti aika kaakang ngaiia.” (Mataio 7:15) N aron naba anne, e kauringia Kristian ake i Tetaronike Bauro ni kangai: “E na tai burebureingkami temanna n te aro teuana, bwa e na aki roko te bong arei ngkana e tuai n roko moa te karitei, ao ngkana e tuai naba ni kaotaki teuare kakaraoa ae buakaka, are natin te kamaunaaki.”—2 I-Tetaronike 2:3.

Ma ngaia are a kakorakoraia burabeti ni kewe ao taani karitei n te moan tienture ni kamamaara te ekaretia ni Kristian. A bane n riki bwa kaain “ te tia kaitaraa Kristo” te koraki ake a irekereke ma tataekinan reirei aika kewe ibukin Iesu Kristo ao ana angareirei. E kaotaraeaki ana iango Iehova ibukia te koraki aikai ngke e taekinia Bauro bwa “natin te kamaunaaki” ngaiia.

Ma tera aron ara bong aikai? A bon teimatoa naba ni kaitaraa Kristo ao ana angareirei te koraki ake kaain te tia kaitaraa Kristo. A tataekini keewe ao ni mwamwanaa te aba bwa a aonga ni kamangaoi ara iango i aoni kinaakin raoi te Tama ae Iehova ae te Atua ao Natina ae Iesu Kristo. Iai bukina ae riai bwa ti na tarataraira man aeka n reirei aika kewe aikai. Ti na nori katoto aika uoua.

Inanon tienture aika bati, a a tia n reirei Aaro taekan te Temanna n Teniman ma n taekinna bwa aongkoa titeboo te Tama ao te Nati. Ibukin anne, e a kamangaoa ao ni karabaa kinaakin raoi Iehova ae te Atua ao Iesu Kristo te tia kaitaraa Kristo. E a tukiia aomata aika raoiroi nanoia te bwai ae raba nanona aei man te kakairi iroun Iesu Kristo ao kaanian te Atua n aron are a kaungaaki n te Baibara bwa a na karaoia.—1 I-Korinto 11:1; Iakobo 4:8.

E a rikirake riki te mangaongao irouia Aaro n aroia ni boutokaa kamanenaan rairai n te Baibara ake a kamaunaaki iai aran te Atua ae Iehova. A karaoa aei e ngae ngke e kaotaki te ara ae Iehova 7,000 tabun te tai n te moani koroboki n te Baibara. Tera mwina? E a moanna n rikirake n raba kinaakin raoi te Atua ni koaua.

N te itera are teuana, a a tia ni buokaki taan taromauri aika raoiroi nanoia n ataakin aran te Atua ae Iehova bwa a na kaaniaki riki iai ma te Atua. Anne te bwai ae rinanona Richard are e uringa ana maroro ma kaain Ana Tia Kakoaua Iehova aika uoman. E kabwarabwaraa ni kangai: “A kaotia nakoiu man te Baibara bwa bon Iehova aran te Atua ni koaua. E anaaki nanou n te iango ae bon iai oin aran te Atua ae te bwai ae I tuai man ongongo mai mwaina.” Man te tai anne, e karaoi bitaki teuaei ni kaboraoa maiuna ma taiani kaetieti man te Baibara ao ni kakukureia Iehova. E reitia n taku: “E buokai reiakinan aran te Atua ni karikirakea te iraorao ae kaani ma ngaia.”

Inanon tienture aika bati, e a tia te tia kaitaraa Kristo ni karooi nanoia aomata aika mirion ma mirion ni bwaai n taamnei. Ma ngkana ti reiakina ana taeka te Atua ae te Baibara, ti a kona iai ni kinaa raoi te tia kaitaraa Kristo ao ni kainaomataaki man ana reirei aika kewe.—Ioane 17:17.