A bati taetae ni burabeti aika bwarabwara raoi aika reke i nanon te Baibara. Akea ae kona n taetae ni burabetina kanoan te tai ae na roko n te aro ae bwarabwara raoi. Mangaia are e kona ni kakoauaaki bwa te Baibara bon Ana Taeka te Atua mani kakoroani bukin taetae ni burabeti aika i nanona.—Wareka Iotua 23:14; 2 Betero 1:20, 21.

Ti karekea aan te koaua n onimakinan te Atua man taetae ni burabeti aika n te Baibara ake a tia ni koro bukia. (Ebera 11:1) A karekea nakoira onimakinan ana berita te Atua ibukin taai aika raraoi riki aika a na roko. Ngaia are a karekea nakoira te kantaninga ni koaua taetae ni burabeti aika n te Baibara.—Wareka Taian Areru 37:29; I-Rom 15:4.

A kauringaki ana toro te Atua rinanon taetae ni burabeti tabeua bwa iai te bwai ae a na karaoia. N te katoto, a kitana Ierutarem Kristian ake n te moan tienture ngke a nori kakoroani bukin taetae ni burabeti tabeua. Ni kamaunaakin te kaawa are a bati iai aomata ake a aki butimwaea Iesu, a kamanoaki Kristian ake a mena n taabo aika raroa.—Wareka Ruka 21:34-36.

Ni boong aikai, a kaotaki man taetae ni burabeti ake a koro bukia bwa e na waekoa Ana Tautaeka n Uea te Atua ni kamaunaia uea ma aia tautaeka aomata. (Taniera 2:44; Ruka 21:31) Ngaia are a kaumakaki aomata nako bwa a na karekea akoaia mairoun te Uea ae Iesu Kristo, are e a tia n rineia te Atua.—Wareka Ruka 21:34-36.