Tera ae riki? E aera ngkai e aki buaka te Atua ibukia I-Iutaia, n aron are e karaoia n taai ake rimoa? Ao bukin tera ngkai e aki boutokaia n te buaka ibukini kainaomataaia mani karawawataaia? E a tia ni bitaki ana iango te Atua ibukin te buaka? E aki, ma iai te bwai ae karika te bitaki ae korakora ni kaineti ma I-Iutaia. A rawa ni kakoauaa ae Iesu bon te Mesia ae Natin te Atua. (Mwakuri 2:36) Ngaia are a kabuaa aia iraorao ae kaokoro ma te Atua te natannaomata aei.—Mataio 23:37, 38.

A aikoa karekea ana kamanomano te Atua te natannaomata aei n ikotaki ma te Aba ni Berita, ao a aikoa manga karekea ana boutoka ao ana ibuobuoki te Atua ibukin te buaka. E a kaman taekinna Iesu bwa e a tia n anaaki mairoun te natannaomata ae Iteraera taiani kakabwaia aika irekereke ma ana akoi te Atua ao n anganaki te natannaomata ae boou ae te Iteraera n taamnei are e atongaki imwina n te Baibara bwa “ana Iteraera te Atua.” (I-Karatia 6:16; Mataio 21:43) E kakoauaaki bwa bon ana Iteraera te Atua te ekaretia ibukia Kristian aika kabiraki. E mataata te baere a tuangaki n te moan tienture ni kangai: “Ma ngkai ai bon ana botannaomata [ngkami].”—1 Betero 2:9, 10.

Kioina ngkai bon “ana botannaomata te Atua” Kristian ake n te moan tienture, e koaua bwa e buaka ibukia bwa a aonga ni kainaomataaki ma ni karawawataia irouia kaain Rom? Ke e kariaia bwa a na buakania taani karawawataia? E bon aki. Bukin tera? Ngkana a riki buaka aika kariaiakaki iroun te Atua, bon tii ngaia n rineia bwa n ningai n aron ae kaotaki n te kaongora are mai mwaina. E aki buaka te Atua ibukia Kristian ake n te moan tienture, ao e aki naba kariaia bwa a na buaka. E teretere bwa bon tiaki ana tai te Atua ni buakana te buakaka ao te karawawata n te moan tienture.

Ma n aroia ana toro te Atua n taai ake rimoa, a riai Kristian ake n te moan tienture n tataningaa ana tai te Atua are e na katoka iai te buakaka ao te karawawata. N te tai aei moa, a bon aki boutokaaki iroun te Atua bwa a na buaka ni kaaitaraia aia kairiribai. E kamataataa raoi aei Iesu Kristo n ana angareirei. N te katoto, e aki tua nakoia taani rimwina bwa a na buaka, n oneani mwin anne e tuangia ni kangai: “Teimatoa n tangiriia aomata aika kairiribai nakoimi, ao tataro ibukia ake a bwainikiriningkami.” (Mataio 5:44) Ngke e taekina buakanakin Ierutarem n ana taanga ni buaka Rom n te moan tienture ao e tuangia taan rimwina Iesu bwa a na aki buaka ma a na birinako ao a boni karaoa anne.—Ruka 21:20, 21.

Irarikin anne, e korea ae kangai te abotoro Bauro ni kairana n te taamnei: “Tai irantangaingkami . . . bwa e koreaki ae kangai: ‘E taku Iehova: Au bwai  te irantanga, N na kabooi mwin aia mwakuri aika bubuaka.’” (I-Rom 12:19) E mwanewea te baere e a kaman taekinna te Atua n tienture ake mai mwaina Bauro ae koreaki n Nakoaia Ibonga 19:18 ao Te Tua-Kaua 32:35. N aron ae noraki n te kaongora ae imwain aei, te aro teuana ae e irantangaia iai ana aomata te Atua n taai ake rimoa, bon ibukini boutokaaia ni buakanaia aia kairiribai. Ngaia are e kaotaki n ana taeka Bauro bwa e aki bitaki ana iango te Atua ibukin te buaka. N te moan tienture, e iangoa te buaka te Atua bwa bon te anga ae eti ibukin irantangaia ana toro ao katokani karawawata ma te buakaka n aekaia nako. Ma n aron ae kakoauaaki n taai ake rimoa, bon tii te Atua n rineia bwa n ningai tain te buaka ao antai ae e na buaka.

E teretere ngkanne bwa e aki kariaia Kristian ake n te moan tienture te Atua bwa a na buaka. Ma tera aroni boong aikai? Iai te kurubu teuana ni boong aikai ae e a tia te Atua ni kariaia bwa a na buaka? Ke aei ngkai ana tai te Atua ni buaka ibukia ana toro? Tera ana iango te Atua n te buaka ni boong aikai? A na kaekaaki titiraki aikai n te kabanea ni kaongora.