E nora te bubu te ataei temanna ae te aine, bwa e aetorake mani bwaibu ake e otiotinako iai te bubu man te tabo ni karaobwai teuana ao n riki bwa kangaa te nang ae bubura. E iangoia bwa oini katean te tabo ni karaobwai aei bwa e na karaoa te nang. E kona ni kangare aki otan raoi te ataei aei. Ma e kona n rotaki maiura man te aki ota raoi i aoni baika kakawaki. N te katoto, e kona ni karekea te kangaanga ae kakaiaki ngkana e bure warekan te koroboki are i aoni nnen te bwainnaoraki.

E kona te aki ota raoi ni baika irekereke ma te onimaki ni karekea te kangaanga ae kakaiaki riki. N te katoto, iai tabeman aomata aika aki ota raoi n ana reirei Iesu. (Ioane 6:48-68) N oneani mwin are a na reiakina ae bati riki, a rawa nakoni bwaai ni kabane ake e angareirei iai Iesu. Ai kakaiakira aei!

Ko wareka te Baibara ibukini kairakim? Ko riai ni kamoamoaaki iai. Ma iai te kangaanga ngkana tao ko aki ota raoi n te baere ko warekia? A bati ake e riki anne nakoia. Iangoi aeka n aki ota raoi aika tenua aika taabangaki.

• Iai tabeman aika aki ota raoi n ana tua te Baibara ae “maaka te Atua ae koaua.” A iangoia bwa e nanonaki iai te maakunrang ae aki riai ibukin te Atua. (Te Minita 12:13) Ma tiaki anne ae e tangiria te Atua bwa a na iangoia ibukina te koraki ake a taromauria. E kangai: “Tai maaku bwa I memena iroum. Tai raraoma bwa bon Atuam ngai. N na kakorakorako, eng, N na buokiko.” (Itaia 41:10) E nanonaki raoi ni maakan te Atua, bwa namakinan te maaku ae e irianaki ma te karinerine ae bati ibukina.

• Iai tabeman aika kaburea warekan taeka aikai, aika kairaki koreaia rinanon te taamnei: “Iai te tai ae baireaki ibukini bwaai nako, . . . te tai ni bung ao te tai ni mate.” A iangoia bwa aongkoa e a tia te Atua ni bairea te tai are e na mate iai temanna ma temanna. (Te Minita 3:1, 2) Ma te kibu anne bon taekan aron te maiu ao e kaotaki naba iai bwa te mate bon te bwai ae e na reke iroura ni kabane. Ti reireinaki naba n Ana Taeka te Atua bwa e kona n rotaki abwakini maiura ni bon oin ara motinnano ake ti karaoi. N te katoto, ti wareka ae kangai: “E kaabwabwaka te maiu maakakin Iehova.” (Taeka N Rabakau 10:27; Taian Areru 90:10; Itaia 55:3) N te aro raa? N te katoto, e na kairira karinean Ana Taeka te Atua bwa ti na rarawa nakoni mwakuri aika a na uruana marurungira, n aron te koro ni manging ao te aroaro ae aki riai.—1 I-Korinto 6:9, 10.

• Iai tabeman aika a bon nanona raoi te bae taekinaki n te Baibara ngkana e taekinaki iai taekani karawa ao te aonnaba ae a ‘kawakinaki ibukin te ai,’ ao a kakoauaa bwa aongkoa e na kamauna te buraneti aei te Atua. (2 Betero 3:7) Ma e berita te Atua bwa e na bon aki kariaia bwa e na kamaunaaki te aonnaba aei. E a tia te Atua ni “kamatoaa te aonnaba i aon aana, e na aki kaingingaki mani nnena n aki totoki.” (Taian Areru 104:5; Itaia 45:18) Bon taekan te waaki ae buakaka ae ngkai i aon te aba ae e nang roko n tokina n aron ae kaanga e na kabuekaki n te ai, ma tiaki taekan ara buraneti aei. Ni kaineti ngkanne ma karawa, ngkana arona bwa e boni kaineti nakoni karawa ni koaua, ao e na bae n nanonaki iai ngkanne karawa ke te iuniweeti ae a kona n noraki iai itoi, ke bon ana tabo ni maeka te Atua. Akea mai buakoni baikai aika a na kamaunaaki.

N aron ae ko kona n noria mani katoto akanne, ao a aki toki aomata n aki ota raoi n rongorongo ake a wareki n te Baibara. Ma e aera ngkai e kariaia rikin anne te Atua? A bae ni kabwarabwaraa bukina tabeman ni kangai: ‘Ngkana ngaia bwa e rangi ni wanawana ma n atai bwaai ni kabane te Atua, e na kaman anganira te boki ae mataata raoi korobokiana n te aro are a na kai ota iai aomata nako. E aera ngkai e aki karaoa anne?’ Iangoi bukina aika tenua ae e rereke iai te aki ota raoi n te Baibara.

1. E koreaki te Baibara bwa a na ota iai aika a  nanorinano ao n tauraoi n reiakinna. E taku Iesu nakon Tamana: “I karaoiroiko i mataia aomata Tamau ae Ueani karawa ma aonnaba, ibukina bwa ko karaui ni karabai baikai mairouia aika wanawana ma aika rabakau, ma ko kaotii nakoia ataei.” (Ruka 10:21) E koreaki te Baibara n te aro ae a na tii ota n te rongorongo are iai, naake iai irouia te aroaro ae raoiroi. Aomata ake iai irouia te kainikatonga ae te anua ae taabangaki irouia “aika wanawana ma aika rabakau,” a na bon aki kona n ota raoi n te Baibara. Ma aomata ake a wareka te Baibara ae iai irouia anuaia “ataei” ae te nanorinano ao te kan reiakina te bwai teuana, a kakabwaiaaki bwa a ota riki n ana rongorongo te Atua. Ai mwaataira te Atua ni korean te Baibara irouna!

2. E kaineti te Baibara nakoia aomata ake a kainnanoa raoi ana ibuobuoki te Atua ni kan ota iai ma nanoia ni koaua. E kaotia Iesu bwa a kainnanoa te ibuobuoki aomata bwa a aonga n ota raoi n te baere e angareirei iai. A na kangaa ni karekea? E kabwarabwaraa Iesu ni kangai: “E na reireiningkami bwaai ni kabane te tia ibuobuoki are te taamnei ae raoiroi are e na kanakomaia te Tama n arau.” (Ioane 14:26) Ngaia are e katauraoa taamneina ae raoiroi te Atua ae taekani mwaakana ae korakora ae mwamwakuri, bwa a na buokaki iai aomata n ota n te baere a warekia n te Baibara. Ma e taua taamneina te Atua mairouia aomata aika aki onimakinna ibukini buokaia, ngaia are n angiin te tai e taraa ni kangaanga otaia raoi n te Baibara. A kairaki naba n te taamnei ae raoiroi Kristian aika ota raoi, bwa a na riki bwa taan ibuobuoki nakoia te koraki ake a kani karekea te ota ae bati riki.—Mwakuri 8:26-35.

3. A kona n ota aomata n rongorongo tabeua man te Baibara n te tai ae riai. N te katoto, e tuangaki te burabeti ae Taniera bwa e na korea te rongorongo ibukin te tai ae e na roko. E kangai te anera nakoina: “Taniera, karabai taeka aikai ao kanikinaea te boki ni kainna ni karokoa tain te toki.” Ni waakinakon taian tienture ao a bati aomata ake a wareka bokin te Baibara ae Taniera ma a aki kona n ota raoi iai. E bon aki ota naba Taniera ni bwaai tabeua ake e korei. E nanorinano ni kangai: “I bon ongo ma I aki kona n ota.” N tokina ao a kona n eti otaia aomata i aon ana taetae ni burabeti te Atua ake a koreaki iroun Taniera, ma tii n te tai ae riai n aron are e boni baireia te Atua. E kabwarabwaraa te anera ni kangai: “Naako Taniera, ibukina bwa a riai ni karabaaki taeka aikai ao ni kanikinaeaki ni kainaki ni karokoa tain te toki.” Antai ae e na ota n ana rongorongo te Atua? “Akea mai buakoia akana buakaka aika a na ota, ma a na ota akana iai irouia te ataibwai.” (Taniera 12:4, 8-10) Ngaia are e bon aki kaota nanon taian rongorongo aika n te Baibara te Atua ni karokoa rokon te tai ae riai.

Te koaua bwa a aki ota raoi Ana Tia Kakoaua Iehova n te Baibara ni kaineti ma te tai? Eng. Ma ngkana e a boo ana tai te Atua ni kamataatai bwaai, a na bon tauraoi taani Kakoaua ni kaeta otaia. A kakoauaa bwa a boni kakairi irouia ana abotoro Kristo ake a nanorinano ni kaeta aia iango n taai ake e kaetiia iai Iesu.—Mwakuri 1:6, 7.

Ana iango te ataei are te aine arei ni kaineti ma te tabo are a riki mai iai taian nang, e bae n ae bon tii te aki ota ae uarereke. Ma e rangi ni kakawaki ibukim te bae ko reiakinna n te Baibara. Moan te kakawaki ana rongorongo te Baibara n te aro are e aki tau bwa e na kataia temanna n ota iai man ana wareware i bon irouna. Ngaia are karekea te ibuobuoki bwa ko aonga n ota n te bae ko warekia. Kakaaeia te koraki aika reiakina te Baibara ma te anua ae te nanorinano, aika a onimakina taamnein te Atua ae raoiroi bwa a aonga n ota n te Baibara, ao ni kakoauaa bwa ti a maeka ngkai n te tai raoi are e a tangiria iai te Atua bwa ti nang ota n te Baibara. Tai tabwara ni maroro ma Ana Tia Kakoaua Iehova ke wareka mwin aia ukeuke ni kakaae ae a a tia ni karauaki raoi n rinanoaki n te atureti n te Intanete ae jw.org. E berita te Baibara ni kangai: “Ngkana ko wewetea te atatai . . . , e na reke iroum ataakin te Atua.”—Taeka N Rabakau 2:3-5.