Eng ibukina bwa e tangiriia aomata te Atua bwa a na ikotaki n taromauri. E kangai te Baibara: “Ti na iaiangoira i marenara bwa ti aonga ni kaumakira nakon te tangira ma mwakuri aika raraoi, ao ti na aki kaaki arora ni bobotaki.”​—Ebera 10:24, 25, te kabwarabwara mai nano.

 E katerea Iesu bwa ana ikoikotaki taan rimwina, ngke e kangai nakoia: “Ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.” (Ioane 13:35) Te anga ae moan te rianako riki ni kaotiotan te tangira aei, bon i marenaia taani kakoaua. A riai ni baireaki nakon ekaretia aika ikoikotaki n taai nako ibukin te taromauri. (1 I-Korinto 16:19) A a riki ngaiia ni kabane bwa te botaki n itaritari ae katobibia te aonnaba.​—1 Betero 2:​17.

E bati riki ae kainnanoaki nakon tii kaainan te Aro teuana

 E ngae ngke e kaotaki n te Baibara bwa a riai aomata n ikotaki n taromauria te Atua, ma e aki taekinaki iai bwa e kona te aomata ni kakukureia te Atua ngkana e tii kaaina te Aro. Ngkana ti na butimwaeaki iroun te Atua, e riai ara Aro n rotii ara motinnano ma baika ti kakaraoi i nanoni maiura. N te katoto, e kangai te Baibara: “Aio te aeka n Aro ae itiaki ae aki kamwaraeaki i matan Atuara ae Tamara: tabeakinaia ataei ake a a tia ni mate aia karo ao aine ake a a tia ni mate buuia, n rawawataia, ao te teimatoa n aki kabarekaaki naba teutana ni bwain aon te aba.”​—Iakobo 1:​27, te kabwarabwara mai nano.