Ti bon aki riai. E taku te New Catholic Encyclopedia ni kabwarabwarai tuua ake e anga te Atua nakoia tibun Iteraera: “Man rongorongo aika kakaokoro n te Baibara ao e teretere bwa akea bannani bwaai n te taromauri ae koaua nakon te Atua.” Iangoi kibun te Baibara aikai:

•   “Ko na tai karaoa am bouannanti ae kaaraki ke te bwai ae katotongan te bwai teuana i karawa i eta ke i aon te aba i nano ke n te ran i aon te aba. Ko na tai bobaraaki nakoia ke n anaaki nanom bwa ko na toro irouia, bwa bon Iehova ngai ae Atuam ae te Atua ae I tua bwa N na taromauriaki n tii ngai.” (Te Otinako 20:​4, 5) Kioina ngkai e tua te Atua ‘taromauriana n tii ngaia,’ e aki kukurei ngkana ti neboi ke n taromaurii, banna, taamnei, bouannanti, taamneia aomata, boua, ke taiani kanikina.

•   “N na bon aki kariaia te boua bwa e na anaa karineau.” (Itaia 42:8, Easy-to-Read Version) E ribai waaki n taromauri te Atua aika kabonganaaki iai bannani bwaai. Ngke a kataia tibun Iteraera tabeman n taromauria ni kabongana bannan te kao te teei, ao e taku te Atua bwa a a tia ni karaoa “te bure ae kakaiaki.”​—Te Otinako 32:​7-9, Easy-to-Read Version.

•   “Ti aki riai n iangoa te Atua bwa kaanga te koora ke te tirewa ke te atibu, ae ai aron te bwai ae karaoaki ni baia aomata ni kaineti ma te bwai are a boni karioa karaoana.” (Mwakuri 17:29) A kakabonganaaki n aia taromauri beekan bannani bwaai ae “te bwai ae karaoaki ni baia aomata ae te bwai are a boni karioa karaoana,” ma Kristian a riai n “nakonako n te onimaki, ao tiaki n ae noraki” n aron ae taekinaki n te Baibara.​—2 I-Korinto 5:7.

•   “Kawakiningkami mani bouannanti.” (1 Ioane 5:​21) N tuua ake a anganaki tibun Iteraera ao Kristian, e okioki iai te Baibara ni katerea ae bon taian otokaraki angareirei ake aongkoa te Atua e kariaia kabonganaani bannani bwaai ao taamneia aomata, n te taromauri.