ƝAAKWƐLƐI 17

Zesu : Tuwɔpələlɛlɛɠaai gaa ɲəi

NWOO MƐN

Mɛniɠaa Zesu ə mo da yiiɠaa ə gɛ ɓɛlowai ə kɛ la ɓɛ lɔi mɛi, gwa kɛi di maakwɛli gu kaa pai duwɔpələɠaa kɔlɔn ɉii, ə lɛɛ nwɛli yɛ too guɔ ə ma kɛ nan Zehova yaa kpɛliman nwɛli yɛ too guɔ. Duwɔpələɠaa tii taɠaa ɓaa lə ? Ə lɛɛ gwa pɛli bɔɔkɔɔn ɉii ləi gu wɔ yɛnɛɛ hu ?

1. Lə mɛni ɓa gwa pɛli kɛi ma Zesu túwɔ́ pələ kaa yɛ Nan duwɔ pələ ?

Ɓɛlowai Zesu ə kɛ la yələkɔlɔn ɉu da Nan di gwəlan miliyali tamaa kɛ gee ɓa, ə lɛɛ ə pɛli mɛni tamaa maakwɛlii ɲəi. Yili ə gɛ yɛ pɛli mɛniɠaa kaa yɛ Nan ə lɛɛ yɛ túwɔ́ yɛ Nan (Ɉaan 5:19 ɓo). Zesu ə Nan bɔɔkɔɔn kpɔ a neelee yili ɓə gɛ yɛ kɛ ma : “ Nui aa gáá, a kɛ tii aa Nán gaa ” (Ɉaan 14:9). Ə́ kaa lɔ kɛi Zesu túwɔ́ pələɠaa kɔlɔn ɉii yili ə gɛ ə́ Zehova túwɔ́ pələ kɔlɔn kpɔ a neelee. Gwa gɔɔmaa həɠə pələi Zesu ə kɛi nua ɲɛimaawɛli kaa la, yili a nɛ pələi Zehova a ə́ maaliihɛlɛn ɉee la.

2. Zesu ə nɛ ləi yɛ ma Zehova wɛli kaa ma ?

Zesu ə mo yɛ ma : “ Ə gɛ, yɛnɛɛ nua di gɔlɔn diɛ Nán Yálá wɛlikaa máá, ə lɛɛ yii lɔpee aa mo máá ya ɓə ŋa gɛ ” (Ɉaan 14:31). Ɓɛlowai Zesu ə kɛ la lɔi mɛi, ə nɛ yɛ ma Nan nwɛli kaa ma kpɔ kɛnɛ a lɛɛi ə kɛi mo nwoo mu ə ma kɛ mɛni wala-walaɠaa hu. Ə lɛɛ nwɔnɔ gɛ mɛni ɓa Nan nwɛli ə kɛ ma kpɔ kɛnɛ, ə kɛi maamɛni hukulɔ nu takpɛliɠaa diɛ, ə lɛɛ yɛ kpɔnmaa tɛɛ di pɔ diɛ kɛ a Zehova məlaa (Ɉaan 14:21).

3. Zesu ə nɛ ləi yɛ ma a nua wɛlilakɛ ?

Biblə a mo yɛ ma nukan nwɛli kaa Zesu ɓa kpɔ kɛnɛ. Ə kɛi nua hwaŋalɔ yɛ kpɔnmaa tɛɛ di pɔ a mɛinɛɛ, bələ ɓə ə kɛi ŋɔ wɛlikɛmaalaa lɛ la. Ŋɔ kpalo mɛniɠaai ə kɛi gɛ a nɛ yɛ ma huwala-wala kɛnɛ ə kɛ ɲəi da ɲɛimaawɛlikaa (Markə 1:40-42). Ə kɛi nua hon a nɛlɛɛ ə lɛɛ ho kɛi nua huyɛɠɛ. Nuai di kwəi kwɛlɛɛ diɛ di kɛi di wəlitɔɔ ma ə lɛɛ vaawoo yɛ di hwaŋalɔ. Ə hwaa ma ə mɔnɔ mii ə lɛɛ ə haa nukanŋaa kəlee maamɛni ɓa maahɔlɔɓo gu wɛlikaa ma. Kəlaa nuai da hiɛ a ŋɔ kalan nwooɠaai diɛ kpɔ ɓə a di wɛlilakɛ kɛnɛ (Ɉaan 15:13, 14 ɓo).

Ə́ WƆ MƐNIKƆLƆNŊAA TA PƐLƐ MA

Ə́ wɔ mɛnikɔlɔnŋaa ta pɛlɛ ma yɛ hwilɛn na Zesu túwɔ́ pələɠaa ɓa. Ə lɛɛ gaa pələi ya pɛli ə́ ŋɔ wɛlikɛmaalaa pɔɔkɔɔn na da pələi ya pɛli bɔɔkɔɔn ɉii la mɛinɛɛ kɛɛ hu.

4. Zesu Nan wɛli kaa ma

Zesu ŋɔ kɔɔmaa a nɛ guɔ pələi gwa pɛli gu wɔ wɛlikɛmaalaa lɛi la Yálá ɓa. Lukə 6:12 da Ɉaan 15:10 ; 17:26 ɓo. Vɛlisɛɛɠaa ŋɛi ɓo tɛi-tɛi ka lono kɛ gɛɛmaalən ŋɛi mɛi :

Gwa pɛli nɛi ləi guɔ ma Zehova wɛlikaa guɔ yɛ pələi Zesu ə gɛ la ?

Zehova wɛli ə kɛ Zesu ɓa, ə lɛɛ Zesu ə kɛi Zehova hwɛli kɛlɛ-kɛlɛ

5. Zesu ə kɛi gili lɛɛ nua maakpaanŋaa hu

Zesu ə kɛi nua maakpaanŋaa tɛɛ nwɛi tɔwɔ, ə kɛi ŋɔ lowai həɠə da vaŋa yɛ kpɔnmaa tɛɛ la nua pɔ ə ma kɛ a lowaiɠaai kɛ viikpɛɛ la. Markə 6:30-44 ɓo, ə lɛɛ ka lono kɛ gɛɛmaalənŋaa ŋɛi mɛi:

Bɔlɔkiliinŋaa ŋɛi hu Zesu ə nɛ ləi yɛ ma a nua maaliihɛlɛn ɉee ? (Nwookpuɔ 31, 34, 41, da 42 kaa).
Lə ɓə gɛ Zesu yɛ kpɔnmaa tɛɛ nua pɔ ? (Nwookpuɔ 34 kaa).
Gɛ mɛni Zesu ə Nan duwɔpələɠaa pɔɔkɔɔn lə ɓə yili a nɛ guɔ yɛ hwilɛn na Zehova ɓa ?
Kpaalə ləkɛɛɠaa ɓə gwa pɛli kpɔnmaa tɛɛ la nua pɔ yɛ pələi lɔ Zesu ə kɛi gɛ la ?

6. Zesu kaa a mɛinɛɛkɛmun

Zesu ə kɛi mɛinɛɛ kɛ kpɔ kɛnɛ pələi ma hɛn ɲaamaa ho kɛ la ɲəi, ə lɛɛ ə gu hwaŋalɔ yii yaan gu kɛ a mɛinɛɛkɛnua. Gɛlaɠaa 20:35 ɓo, ə lɛɛ ka lono kɛ gɛɛmaalən ŋɛi mɛi :

Yɛ pələi Zesu ə mo la gwa tɛɛ ləi gu kwəinɛɛ hɔlɔɓo

VIDIO kaa, ə lɛɛ ka lono kɛ gɛɛmaalən ŋɛi mɛi.

VIDIO : “ Nui kɔɓo kɛi gwəinɛɛi ”(Vidio naa ta) (4:00)

Kpaalə ləkɛɛɠaa ɓə gwa pɛli kɔɓo kɛi la ə ma kɛ hɛn və gu yəi ?

Ə́ kili kaa ɉu ?

Biblə a kɛ guɔ gu Zehova hwɛli Zesu laa hu (Ɉaan 16:23, 24 ɓo). Gwa kɛi Yálá hwɛli tii bələ ɓə gwa nɛ la guɔ ma, gwa pɛli kɛi a Zehova məlanmun Zesu haalai.

NUTAƓAA DA KƐ KƐI MA : “ Mɔnɔ lɔpee a həli guɔ, Yálá ɓə bɛɛn. ”