ƝAAKWƐLƐI 2
Gbɛɛ ɓaa Yálá ?
1. Lə mɛni ɓa maanɛɛ guɔ kwɛli hwilɛn Yálá ɓa ?
Yálá kpɔkpɔ kaa a hɛn gəlee pɛli mun. Kɔwɔtɔ́ɔ́ ho ma, laakulɔ ho pai kɛi ma (Somə 90:2, TMN). Nwɛlɛɛɠaa Biblə hu, ya ɓə gəlee a həɠə ɲəi (Timɔtə dɔlɔɔ 1:11). Yii ya ɓə yɛnɛɛ tɛɛ gu pɔ, yaa tɔnɔ gbən ɓə maanɛɛ gu kwɛli hwilɛn ma.—Kulɔ ponoŋa 4:11 ɓo.
2. Yálá kɛ pələ kaa ləi ?
Nuta lɔpee ho ta Yálá kaa li, maahɔlɔɓo, gaa a Nii. Yili mukulaa ɓaa, gɛnɛi dɛɛ nukan ma, da pɛlihɛnŋaa kəlee (Záán 1:18 ; 4:24, TMN). Ə ma kɛ tii, gwa pɛli Yálá túwɔ́ pələɠaa kɔlɔn ɉii ŋɔ pɛli hɛnŋaa ɓa. Yɛ pələi gwa gaa la, wuluɓaɠaa, wulu powaɠaa da wulu tiliin nɛlɛɛɠaa di hee kpəlina tama pələ a Yálá ŋɔ wɛlikɛmaa da ŋɔ mɛni kɔlɔnŋaa lɛ guɔ. Yələkɔlɔn da lɔi di kɛnɛ pələ, ə lɛɛ pɛmɛlɛn gɔuɠaa kpulu kɛnɛ pələ, a Yálá ŋɔ huwala-wala lɛ guɔ.—Rɔmu 1:20 ɓo.
Gwa kɛi Biblə ɓo, gwa pɛli nwɔnɔ Yálá túwɔ́ pələ taɠaa kɔlɔn ɉii, yɛ pələi nwana mɛni kaa la, da niiɓa mɛni. Pələi a nukanŋaa hon na, da pələi a túwɔ́ la mɛni tamaa hu, Biblə a yili kəlee hukulɔ guɔ.—Somə 103:7-10, TMN ɓo.
3. Yálá laa ɓaa gbɛɛ ?
Zesu ə kɛ ma : “ Ku Nán yɛi ə́ kaa yələkɔlɔn ɉu, ə́ laa maa ə hə́ɠə́. ” (Matie 6:9, TMN). Yálá kiliin naa tamaai, kɛlɛɛ naa kaa tanɔn gbən. Naa tii a ɓo a dee-tee híínwooɠaa hu. Kpɛlɛɛwoo hu da kɛ ma “ Zehova ”. Kɛlɛɛ nutaɠaa da kɛ ma “ Yave ”.—Somə 83:18, TMN ɓo.
Daa Yálá laa waa Biblə tamaa hu, daa maahwalən a giliin naaɠaa, yɛ pələi Námu kaa la, awala kɛtii Yálá. Kɛlɛɛ ɓɛlowai di Biblə pɛɛn la, Zehova laa ə kɛ ɉu naa hee waa-mɛihweelɛ (7 000). Ɓɛlowai Zesu ə kɛi nua kalan na, ə Yálá laa tii lɛ diɛ.—Záán 17:26 ɓo.
Vidio hu kaa Yálá laa ɓaa gbɛɛ ?
4. Gu maa liihɛlɛn gaa lɔ Zehova ɓa ?
Pələi lɔ ɉulɔnui ŋɛi kaa túwɔ́i la non nwɛlila kɛ mɛni ɓa, pələ lɔ ɓə Zehova yaa kpɛli gaa túwɔ́i la, gu wɔ yɛnɛɛ lɛlɛ mɛni ɓa a yələ kəlee mɛni.
Mɔnɔ kɛ mɛni yɛnɛɛ naa kəlee mukulaa ɓaa mɔɔn gu maa liihɛlɛn və Zehova ɓa ? Nutaɠaa di wɔ kiliɓa Zehova a mɔnɔ laa gu mɛi, ə gɛ ə gu ŋaatɛ, awala kɛtii ə gu hukɔɔn. Kɛlɛɛ teɲa hwəli.—Zaakə 1:13 ɓo.
Yálá ə wɔlɔ maa laa tɛɛ nukan bɔ, gbɔɔ liiɓa kɛ mɛni ɓa. Mɛni lɛlɛɛ hwaa mɔɔn guɔ ti Yálá ɓa gu kpɔɔ ɓa ? (Zosue 24:15, TMN). Kɛlɛɛ nu mɔlɔɓəlaa liiɓa ɓaa diɛ mɛni ɲɔnwɔɔ kɛ a di ɓəlaa, yili ɓə aa mɔnɔ kɛnɛ lɔi mɛi. Zehova a kɛi mɛni ɲɔnŋaa tii kaa, yili a viikpɛɛ.—Zənɛsə 6:5, 6, TMN ɓo.
Gu maa liihɛlɛn gaa Zehova ɓa. Gaa bɔ yɛnɛɛ ə nɛɛ guɔ. Ɉu ho kea kweali, gaa pai mɔnɔ kpɛɛi, ə mɛni ɲɔn gɛ nua nwun napili. Ə lɛɛ la ɉu naalowai yɛ ɉəli, yii gɛ Zehova yɛ hwaa ma mɔnɔ yɛ laa gu mɛi, ə yili nwun gɔlɔn. Ɉɛɓɛi ŋɛi ɲaakwɛlɛi 8 kaa pai yili hukulɔi guɔ.—Piɛli veelɛnaa 2:9 ; 3:7, 13 ɓo.
5. Gwa gu maalɛɠɛ pələ kɛ ləi Yálá ɓa ?
Zehova kaa gu tolii, ə gɛ, gu gu maalɛɠɛ ma, guɔ hwaa bɔ hwɛliwoo hu. A ɲɛi hee gu tɛi-tɛi gu ɲɛi (Záán dɔlɔɔ 5:14). Gaa bɔ ə gu maahwaalɛɛ. Gwa kɛi hwaŋa həɠə niiɓa kɛ mɛni ɓa, a ɉu kɔlɔn, gu mawala kɛ pɛlii ma a lowai taɠaa. Pələi ma gu kaa la a nɛŋɛn ɉəɠə nua, gwa pɛli gu maalɛɠɛi Yálá ɓa.—Somə 103:12-14, TMN ; Zaakə 4:8 ɓo.
Maanɛɛ gu Zehova wɛlilakɛ gu dɛɛ nu lɔpee gəlee ɓa, maahɔlɔɓo, ya ɓə yɛnɛɛ tɛɛ gu pɔ (Malikə 12:30). Pələi lɔ ya Zehova kɔlɔnŋaa maakwɛli la, yɛ nwɛlilakɛ, yɛ lɛɛ nwoo mu, pələ lɔ ɓə, ə́ maa a lɛɠɛ la ma.—Timɔtə dɔlɔɔ 2:4 ; Záán dɔlɔɔ 5:3 ɓo.
