Dhormdutancho Itihas 5:1-42
5 Ananias nanvachea eka munxan, ani tachi bail Safiran, mellon thoddi zomin vikli.
2 Punn Ananiasan taka mellʼllole tantuntle thodde poixe lipoun apleak dovorle, ani urlole poixe vhoron apostlanchea paim-am lagim dovorle. Hea vixim tachi bail pasun zannam asli.
3 Tednam Pedrun taka mhunnttlem: “Ananias, povitr xoktek fottounk ani viklole zomniche orde poixe tuka dovrunk, tunvem Soitanak tujer probhav ghalunk kiteak dilo?
4 Ti zomin tujea lagim asli tednam tujich nasli kai? Ani ti viklea uprant, tacher tuzoch hokʼk naslo kai? Toxem zalear, oxem korunk tunvem tujea monant chintlench koxem? Tunvem munxank nhoi, punn Devak fott marlea.”
5 Him utram aikotanch, Ananias poddlo ani melo. Ani jea konnem hi khobor aikoli tanchea monant bhirant bosli.
6 Uprant thoddea tornnatteamnim ieun tachi kudd kopddeank guttlaili ani bhair vhoron purli.
7 Sumar tin voram uprant tachi bail aili, punn thoim kitem ghoddlolem tem tika khobor naslem.
8 Pedrun tika mhunnttlem: “Tumi dogaimnim tumchi zomin itleach molak vikloli?” Tinnem mhunnttlem: “Hoi, itleach molak vikloli.”
9 Pedrun tika mhunnttlem: “Kiteak mhunn tumi dogaimnim Jehovache* povitr xoktechi porikxa korunk tharailem? Polloi! Tujea ghovachi kudd gheun geleat te tornnatte darar asat ani te atam tuka-i ubarun vhortole.”
10 Teach vellar ti tachea paim-ancher poddli ani meli. Tornnatte bhitor aile tednam ti melea mhunn tannim polloilem. Te tika ubarun bhair gheun gele ani tichea ghovak purlolo thoim tika-i purli.
11 Hea ghoddnnek lagon sobhent asloleank ani tea vixim aikolʼlem tea sogleank khub bhirant disonk lagli.
12 Lokam mukhar apostlam udexim zaiteo khunna ani vizmitam ghoddttalim. Te sogle Solomonachi Vatt* mhunnttat tea zagear ektthaim zatale.
13 Tanchea zomeant vochonk soglech bhietale, tori astana te lok xisanchi tokhnnai kortale.
14 Ani Somiacher visvas dovorpi, zaite dadle ani bailo tanchea zomeant bhitor sorot ravlim.
15 Pedru rostea voilean voitana tachi savlli tori poddom mhunn, te duentank khattir ani xendrer ghalun mukhel rosteancher dovortale.
16 Jeruzalem ani bhonvtonnchea xarantle zaite lok duent ani noxtte dut* bosloleank thoim gheun ieit ravle, ani te sogle bore zatale.
17 Punn mha-iadnik ani tachea sangata aslole te sogle, mhunnche, tea vellar Sadukinchea zomeant aslole lok tancher zollonk lagle.
18 Ani tannim apostlank dhorun bondkhonnint ghatle.
19 Punn ratchea vellar Jehovachea* dutan bondkhonnichim daram ugddun tankam bhair haddle, ani tankam mhunnttlem:
20 “Vochat ani fuddarak mellchem asa, tea jivitacho* sondex Devmondirant lokank sangot ravat.”
21 Haka lagon, te sokallinch Devmondirant gele ani xikounk lagle.
Uprant mha-iadnik ani tanche sangati aile tednam tannim Mha-sobhechea* lokank ani Izraelachea lokanchea vhoddilank ektthaim kele ani bondkhonnintlean apostlank haddunk rakhonndar dhaddle.
22 Punn thoim pavtoch, te bondkhonnint nant tem rakhonndaramnim polloilem. Tannim porot ieun oxem sanglem:
23 “Bondkhonnichim daram bore bhaxen bond asat ani thoim rakhonndar ube asat tem ami polloilem. Punn bondkhonnichim daram ugoddlea uprant thoim amkam konnuch mellonk na.”
24 Devmondirachea rakhonndaranchea odhikarean ani mukhel iadnikamnim hem aikolem tednam te chintunk poddle, ani mukhar kitem zatolem tem tankam somzona zalem.
25 Punn konnem tori ieun tankam oxem sanglem: “Tumi bondkhonnint ghatlole te munis Devmondirant asat. Te thoim ube ravon lokank xikoitat.”
26 Tor rakhonndarancho odhikari aplea rakhonndaram sangata thoim gelo ani tankam gheun ailo. Punn tannim tanchea sangata zobordosti korunk na, karonn lok apnnank fatraun marit mhunn tankam bhirant asli.
27 Tannim tankam haddun Mha-sobhe mukhar ube kele. Mha-iadnikan tankam prosn vicharun mhunnttlem:
28 “Hea nanvan xikounchem bond korat mhunn ami tumkam koddok hukum dilʼlo. Tori astana tumi akʼkhem Jeruzalem tumchea xikounnen bhorlam, ani hea munxachi rogtachi zobabdari tumi amchea mathear thapunk sodhtat.”
29 Tednam Pedrun ani dusrea apostlamnim mhunnttlem: “Ami munxanchi nhoi punn Devachi* adnea pallunk zai.
30 Jea Jezuk tumi khambear* khillaun marun uddoilo, taka amchea purvozanchea Devan jivont kela.
31 Izraelan poschatap korcho ani tankam tanchea patkanchem bhogsonnem mellchem mhunn Devan haka Mukhel Fuddari ani Salvar korpi mhunn unch podvi diun, aplea uzvea hatak bosoila.
32 Ami hea ghoddnneche govai zaun asat, ani toxench povitr xokti-i govai zaun asa. Je lok Devak aplo raza mhunn manun tacheo adnea pallttat tankam to hi povitr xokti dita.”
33 Tannim hem aikolem tednam te samke ragan bhorle ani tankam marun uddounk sodhtale.
34 Punn Mha-sobhent Gamaliel nanvacho ek Farizev* ubo ravlo. To Kaideacho xikxok aslo ani lokam modem taka borem nanv aslem. Tannem hea munxank thoddea vella pasot bhair vhor mhunn hukum dilo.
35 Magir Gamalielan tankam mhunnttlem: “Izraelachea lokamno, hea munxam thaim tumi jem kitem korunk sodhtat tea vixim bore bhaxen chintat.
36 Thoddea disam poilim, Theudas nanvacho ek munis aslo, zo apunnui konn tori mhunn chintʼtalo. Ani zaite dadle, sumar 400 zann tachea zomeant bhitor sorle. Punn taka marun uddoilo ani tache sogle pattlavdar ximpoddle ani nanch zale.
37 Tea uprant, registration choltalem tea disamnim, Galilient Judas nanvacho munis aslo. Tannem lokank fuslaun aplea vatten ghetle. Punn taka-i marun uddoilo, ani tache sogle pattlavdar hanga-thoim ximpoddle.
38 Haka lagon, atanchi poristhiti polloun hea munxanchea vattek vochonakat mhunn hanv tumkam sangtam. Tankam soddat, karonn hi ievzonn vo hem kam munxam thaun asa zalear tem nirfoll zatolem.
39 Punn tem Deva thaun asa zalear tumi tem bond korunk xokchenant. Tumi toxem kelem zalear tumi Deva add zhuztat oxem zaunk xokta.”
40 Tannem dilʼlo solʼlo tannim manun ghetlo. Ani apostlank apoun tankam mar ghatlo, ani Jezuchea nanvan ulovop bond korat mhunn hukum ghalun tannim tankam vochonk dilem.
41 Jezuchea nanva pasot opman sosop ek sueog mhunn somzon te khuxal zale, ani Mha-sobhentlean bhair soron gele.
42 Ani dor disa Devmondirant ani ghoran-ghor vochon te thambonastana xikoit ravle ani Krist Jezu vixim bori khobor porgottit ravle.
Footnotes
^ Mhunnche, cholon vochpachi vatt zoim khambe astale.
^ Utran utor, “hea jivitacho.”
^ Vo “Dev raza mhunn manun tachi.”
^ Vo “rukhar.”
