BIBLE kallar, ek karbari dusrea eka munxachem ghor vo bhatt dekhrekh kortalo. “Karbari” hea utrak kel’lem Hebrev vo Grek utrak oslea munxak uzar kortale zo eka ghorabeache dekhrekh korpi vo karbari zaun aslo.

Jakobacho put, Juze, Ejiptant, ek chakor aslo tednam taka tachea iezmananchea ghorant karbhari mhunn nemlolo. Khorem mhunnttlear, Juzechea Ejiptachea iezmanan “aplem ghor-dar ani sorv kitem aslem tem tache svadhin kelem.” (Ut. 39:2-6) Uprant, jednam Juze Ejiptacho ek bollixtt rajpal zalo tednam tannem aplea ghorant pasun ek karbari nemlo.—Ut. 44:4.

Jezuchea disamnim, chodd korun bhattkar aplim xetam ani bhattam thaun pois xaramnim ravtale. Taka lagon, tanchea bhattamnim kam kortolea kamdaranchi dekhrekh korunk he bhattkar karbareank nemtale. He karbari tea bhattamnim choltolea dor disachem kam polloun ghetale.

Ek karbari zaunk konn purto aslo? Poilea-xekddeantlea Romi boroupi, Columella, oso sangta ki, “eka chakrak dekhrekh korpi vo karbari hea kamak lagon nemcho zalear taka xetkamant onnbhov aschi goroz asli.” To oslo munis zaunk zai aslo zo “apleak dilolo odhikar beporva korchona ani krur toren uzar korchona.” To fuddem mhunntta: “Taka sogleam poros mhotvacho gunn ascho to ho—apunn noko tem apunn zannam mhunn dakhounchem nhoi ani novem novem xikonk taka sodanch utsuktai asonk zai.”

Bible, Kristi sobhent choltolea thoddea kamank eka karbareachench kama sarkem sor korta. Udharonnak, apostl Pedru Kristanvank Devan tankam ‘dilole vorgunn bore karbari koxe teo upeog korun ekamekachi chakri korunk zai mhunn sangta.’—1 Ped. 4:10.

Lukas 16:1-8-ant, eka mokdomachi vo karbareachi vopar uzar keli. Tea bhair, apunn Raza zata tednam aplea ienneachea disa vixim sangtana, Jezun aplea xisank khatri dili ki apunn ek “visvaxi ani xannea chakrak” vo “visvaxi karbareak” nemtolo. Tea karbarachem mukhel kam mhunnttlear, Kristachea pattlavdaran xevottachea disamnim thambonastana eke bhaxechem jevonn, mhunnche, Deva vixim xikovnn divop. (Mt. 24:45-47; Lukas 12:42) Ho visvaxi karbari hem jevonn toiar korun sonvsarbhor vadd’tta dekhun, amkam amcho bhavarth ghott korta toslim prokaxonam mellttat, zaka lagon ami kitlim upkari asat.