“Him Sakxi fokot lokam laginch nhoi punn mhojea sunneam lagim pasun bore toren vagtalim. Ek dis Elaine, ji tea kartta lagim ubi asli, tinnem mhojea donui sunneank biskuteo dileo. Ani tea uprant, hanv mhojea sunneank gheun tea zagear pavot ietalom title-i pavtti, tim tea kartta lagim vochonk sodhtalim karonn tankam tea Sakxeam koddlean biskuteo khaunk zai asleo.

“Oxem korun-korun thodde mhoine soron gele. Mhojim donui sunnim biskuteo khaun khuxal zatalim ani Sakxeam lagim thoddo vell uloun mhaka-i borem distalem. Punn hanv tanchea lagim choddui vell ulounk sodhinaslo. Tea vellar hanv 70 vorsam poros chodd piraiecho aslo. Ani Sakxi kitem patietat tea vixim pasun mhaka titli kaim khobor nasli. Toxench, zaitea Kristanv dhormanchi xikounn polloun hanv niraxi zalʼlo. Ani hea karonnak lagon, hanvem svota zaun Bible xiklear borem zatolem oxem mhaka distalem.

“Toxench tea xarant anikui zaitim Sakxi aple kartt gheun ubim astalim tem hanvem polloilʼlem. Tim pasun dusream lagim bore toren uloitalim. Ani tim sodanch Bible-antlean mhojea prosnanche zobab ditalim. Hea pasot, tim sangtat tem sarkem mhunn mhoji patienni ghott zaunk pavli.

“Ek dis Elaine-an mhaka vicharlem, ‘Zonvaram, Deva koddlean dennim mhunn tum manta?’ Hanvem mhunnttlem, ‘Hoi tor!’ Tednam Elaine-an mhaka Izaias 11:6-9 vachun dakhoilo. Tednam thaun mhaka Bible-a vixim anikui zannam zaunk zai aslem. Tori punn, Sakxeam koddlean vachunk koslem-i prokaxon gheunk hanv toiar naslo.

“Dis gele toxe, hanv Elaine ani ticho ghov, Brent-a sangata thoddo vell uloitalom. Punn hem ulovop mhaka khub avoddttalem. Ek khoro Kristanv asop mhunnttlear kitem tem zannam zaunk, hanvem Matev tem Itihas, him pustokam vachlear borem zatolem mhunn tannim mhaka sanglem. Ani hanvem toxench kelem. Uprant 2016 hea vorsa, Brent ani Elaine-a sangata hanvem Bible obheas korunk suru kelo.

“Tednam thaun dor sumanak, Bible obheas korunk ani mittingek hajir zaunk hanv axeun ravtalom. Ani Bible khorench kitem xikoita tea vixim zannam zaunk hanv khub khuxal zatalom. Ek voros ani thoddea mhoineam uprant hanvem bautizm ghetlo. Atam hanv 79 vorsancho asa ani mhaka khoro dhorm mellʼlla, ani Jehovan mhaka aplea familicho bhag zaunk modot kelea mhunn hanv tacho khub upkari!”