Mary ani tacho ghov John a ravtat tea desant Philippines-antle zaite lok ravonk ani kam korunk ietat ani tim tankam porgott kortat. COVID-19 pidde vellar tim ravtat tea zagea voilea lokankuch nhoi, punn sonvsarantlea veg-vegllea desantlea lokam sangata pasun Mary-n Bible obheas suru kele. Tem hem koxem korunk pavlem?

Mary aplea Bible vidʼdheartheank oxem vichartalem, “Tum konnakui vollkhota zaka Bible xikonk umed astoli?” Ani tannim hoi mhunnttlear tem tancho fon number magtalem. Oxem kelʼlean, taka khub boro porinnam mellʼllo. Karonn Bible xikonk umed dakhoitat tim jem xiktat tem aplea soireank vo ixttank sangtat. Tor Mary-n ho prosn vicharlolean tachea Bible vidʼdheartheamnim kitem kelem?

Mary-chem Bible vidʼdhearthi Jasmin-an, taka aplea char ixttanchi vollokh korun dili, zankam Bible xikonk zai aslo. Tanchea modli ek Kristine asli. Tika Bible xikonk itlem avoddttalem ki ti sumanak don pavtti obheas kortali. Jednam Mary-n anik konnakui Bible xikonk zai kai mhunn tika vicharlem tednam Kristine-an oxem mhunnttlem, “Hoi hanv tuka tanchi vollokh korun ditam.” Thoddea sumanam bhitor Kristine-an Mary-k aplea char ixttanchi vollokh korun dili. Uprant, Kristine-an taka aplea anikui ixttanchi vollokh korun dili. Ani tea ixttamnim taka her zannanchi vollokh korun dili.

Kristine-achi famil Philippines-ant asli, ani tim-ui Bible xiklolim tika zai aslem dekhun ti apli dhuv Andrea lagim uloili. Punn survatek, Andrea-chem chintop oxem aslem, ‘Jehovachim Sakxi vegllech torechim munxam, tim Jezuk maninant ani fokot Adlo Korar pallttat.’ Punn poileach Bible obheas uprant, aplem chintop chukichem aslem mhunn taka kollʼllem. Ani magir obheas kortana tem Bible-antlean novem kitem xiktalem tednam tem oxem mhunnttalem, “Hem Bible-ant asa, tor hem sarkem asonkuch zai!”

Thoddea vella uprant, Andrea-n Mary-k aplea don ixttanchi ani aplea sangata kam korpeachi vollokh korun dili. Tim-ui Bible obheas korunk laglim. Toxench Andrea-k, Angela nanvachi aunty asli jika dixtti poddonaslem. Mary Andrea-cho obheas ghetana ti-ui aikotali punn Mary-k hea vixim kainch khobor nasli. Uprant Mary aplo pasun Bible obheas ghetoli kai mhunn Angela-n Andrea-k vicharlem. Tor ticho-i Bible obheas suru zalo. Ti jem xiktali tem tika itlem avoddttalem ki ek mhoinea bhitor tinnem zaitim versam tonddpatt kelim ani dor sumanak char pavtti obheas korunk lagli. Toxench Andrea-chea modotin, video conference-a udexim ti dor mittingek hajir zaunk lagli.

 Kristine Bible obheas kortali tednam ticho ghov Joshua thoim ghuspot astalo mhunn Mary-n polloilem. Tor to-ui Bible xikonk sodhta kai mhunn tannem tika vicharlem. Tednam Joshua-n mhunnttlem, “Hanv fokot aikotolom, punn tunvem mhaka ek pasun prosn vicharlear hanv utthon cholonk lagtolom.” Tannem Bible obheas suru korun panch minttam pasun zaunk naslim, Joshua-n Kristine-a poros chodd prosn vicharle ani to-ui Bible xikonk toiar zalo.

Mary-n vicharlolea sadea prosnak lagon taka zaite Bible obheas mellʼlle ani tanchea sangata obheas korunk tannem her bhav-bhoinnanchi pasun modot ghetli. Tor Mary-k char veg-vegllea desantlean sogle mellon 28 Bible obheas asle.

Hea onnbhovant sanglolem poilem Bible vidʼdhearthi Jasmin-an, Abril 2021-ant bautizm ghetlo. Uprant, May 2022-ant Kristine-an bautizm ghetlo ani ti aplea famili borabor ravonk porot Philippines-ant geli. Toxench Kristine-an vollokh korun dilʼlim tichim don ixttam jim Bible xiktalim, tannim pasun bautizm ghetlo. Thoddea mhoineamnim Angela-n bautizm ghetlo ani ti atam niemit pioneer seva korta. Toxench Kristine-acho ghov Joshua, tanchi dhuv Andrea ani Mary-chim anikui zaitim Bible vidʼdhearthi bori vaddavoll korit asat.

Poilea xekddeant ek munis bori khobor aikotalo tednam, to rokddoch vochon aplea ixttank ani soireank sangtalo. (Ju. 1:41, 42a; D.I. 10:24, 27, 48; 16:25-33) Tor aiz pasun ami amchea Bible vidʼdheartheank vo xikonk umed dakhoitoleank oxem vicharunk zata, “Tumi konnankui vollkhotat kai, zaka Bible xikonk zai?” Hea ekuch sadea prosna vorvim ami ghoddie zaitea zannam lagim Bible obheas suru korunk xoktolim.