1-2. Zadok konn aslo? (1 Itihas 12:22, 26-28)

 HI GHODDNNI tumchea dolleam mukhar haddat. 3,40,000 munis, Davidak akʼkhea Izraelacho raza korunk ektthaim zaleat. Tin disam thaun te Hebronachea dongri vattarant ravleat. Te khuxalkaien vell sartat, eka-meka sangata uloitat, ani Jehovachi vakhannʼnni korunk gitam gaitat. (1 It. 12:39) Hea zomea modem Zadok nanvacho ek tornnatto asa. Choddxea zannamnim tacher dhean diunk na zait. Punn Jehovan tacher dhean dilem, ani ami pasun tacher dhean diun tachea thaun xiklolim Jehovak zai. (1 Itihas 12:22, 26-28 vachat.) Tor Zadok konn aslo?

² Zadok ek iadnik aslo ani to Mha-iadnik Abiathara sangata seva kortalo. Toxench, Jehovan taka apli khuxi zannam zaunchi tank, ani khub zannvai dilʼli. (2 Sam. 15:27) Hea pasot modotichi goroz asli tednam, lok Zadoka lagim solʼlo ghetalo. Tea bhair, Zadok ek dhirvont munis pasun aslo. Tor hea lekhant, tannem koso dhir dakhoilo tacher ami dhean ditolim.

3. (a) Jehovachea sevokank dhirachi kiteak goroz asa? (b) Hea lekhant ami kitem polloitolim?

³ Hea nimannea disamnim, Jehovacher aslolo amcho bhavarth moddunk Soitan poilim poros anikui chodd vavr korit asa. (1 Ped. 5:8) Tea pasot, Soitan ani tachea hea noxttea sonvsaracho Jehova nas korta tea mhunnosor amkam dhirachi goroz asa. (St. 31:24) Tor ami khoinchea tin vattamnim Zadoka bhaxen dhirvont zaunk xoktat tem polloum-ia.

DEVACHEA RAJEAK TENKO DIAT

4. Devachea Rajeak tenko diunk amkam dhirachi kiteak goroz poddtta? (Chitr pasun polloiat.)

⁴ Ami purnn kallzan Devachea Rajeak tenko ditat. Punn oxem korunk amkam dhirachi goroz poddtta. (Mt. 6:33) Udharonnak,  hea noxttea sonvsarant Jehovachea dorjeam pormonnem jieunk ani tachea Rajeachi bori khobor porgottunk amkam dhir zai. (1 Tes. 2:2) Toxench, aiz rajkaronnak lagon lokam modem futt poddlea. Tor konnanchich bazu ghenastana ravonk amkam dhirachi goroz asa. (Ju. 18:36) Ani ami rajkaronnant vo military-nt bhag ghenant dekhun, amchea zaitea bhav-bhoinnank poixeanchea unnemponnacho fuddo korunk poddla, vo tankam mar ghatla vo bondkhonnint pasun ghatleat.

5. Davidak tenko diunk Zadokak dhirachi kiteak goroz poddli astoli?

⁵ Zadok Hebronant fokot khuxalkai monounk vochonk na. To aplim hotʼtearam gheun gelʼlo. Tor to zhuzonk toiari korun gelʼlo. (1 It. 12:38) Davidak zhuzak tenko diunk ani dusmananchea hatantlean Izrael lokanchi rakhonn korunk to ap-khuxen fuddem sorlo. Ek iadnik aslolean taka ghoddie zhuz korunk titlo onnbhov naslo. Tori astana, to zhuzonk gelo. Oxem korunk taka dhirachi kitli goroz poddli astoli nhoi!

6. Dhirvont zaunk Zadokak Davidachea udharonnantlean koxi modot zali? (Stotr 138:3)

⁶ Tor Zadok itlo dhirvont koso zaunk pavlo? To oslea zaitea munxank vollkhotalo, je khub bollvont ani dhirvont asle. Tanchi dekh ghetlolean to dhirvont zaunk pavlo. Udharonnak, David khub dhirvont fuddari ani zhuzari aslolean, akʼkhea Izrael raxttran taka raza korunk tenko dilo. (1 It. 11:1, 2) Aplea dusmanam add zhuzonk, David sodanch Jehovacher patieun ravlo. (St. 28:7; Stotr 138:3 vachat.) Zadok her dhirvont munxam koddlean pasun xiklo. Zoxem Jehoiada, tacho put Benaia ani aplea bapaichea ghorabeantle 22 fuddari. Tannim khub dhiran Davidak tenko dilʼlo. (1 It. 11:22-25; 12:26-28) Davidak raza korunk ani tachi rakhonn korunk tannim apleachean zata tem soglem kelem.

7. (a) Amchea disamnim dhir dakhoilʼlea konnanchim udharonnam asat? (b) Video-nt dakhoilʼlea bhav Nsilu-chea udharonnantlean amkam kitem xikonk melltta?

⁷ Jehovak ani tachea Rajeak tenko diunk dusreamnim koso dhir dakhoila tacher niall kelʼlean amkam pasun dhir dakhounk modot zata.  Udharonnak, Jezu hea prithumer aslo tednam tannem Soitanachea hea noxttea sonvsaracho bhag zaunk saf nakarlem. (Mt. 4:8-11; Ju. 6:14, 15) Sarkem tem korunk to sodanch Jehovacher patieun ravlo. Toxench, amchea disamnim pasun oxech zaite tornnatte bhav asat zannim military-nt bhorti zaunk vo rajkaronnant bhag gheunk saf nakarlam. Tanche onnbhov amkam jw.org-acher vachunk mellttat. Te vachunk ami tumkam urba ditat. a

BHAV-BHOINNANK MODOT KORAT

8. Bhav-bhoinnank modot kortana vhoddilank kednam dhir dakhounchi goroz asta?

⁸ Jehovachea sevokank eka-mekak modot korunk khub avoddtta. (2 Kor. 8:4) Punn thodde pavtti oxem korunk amkam dhirachi goroz asta. Udharonnak, zhuz zata tednam bhav-bhoinnank jevonn, kopdde, ani ravonk ek zago zai asta. Toxench, Jehova sangata tanchi ixttagot ghott samballunk, tankam Bible ani Bible adarit prokaxonam zai astat mhunn vhoddilank khobor asta. Tor te bhav-bhoinnancho khub mog kortat dekhun, aplo jiv dhokeant ghalun pasun tankam heo vostu pavoitat. (Ju. 15:12, 13) Oxem kortana, te Zadoka bhaxen dhir dakhoitat.

9. 2 Samuel 15:27-29-a pormonnem, Davidan Zadokak kitem korunk sanglem? (Chitr pasun polloiat.)

⁹ Eke bhirankull poristhitint, Zadokan aplea bhavank koxi modot kelʼli tea vixim chintat. Davidacho put Absalanv, Davidak jivexim marun apunn raza zaunk sodhtalo. (2 Sam. 15:12, 13) Tor Davidan rokddench Jeruzalem soddun vochonk zai aslem. Tea vellar, tannem aplea sevokank apoun mhunnttlem: “Pollun vochunk toiar zaiat; na zalear ami Absalanvachea hatant poddtoleanv.” (2 Sam. 15:14) Punn te thoinchean voitale toxe, Absalanv fuddem kitem korcho asa tachi khobor gheunk konnem tori fatti ravonk zai mhunn Davidan chintlem. Tor tannem Zadok ani dusrea iadnikank thoim bhedi koxe ravonk sanglem. (2 Samuel 15:27-29 vachat.) Hem kortana tannim khub chotrai dovrunk zai asli. Karonn Davidan hea iadnikank jem kitem korunk sanglolem  tem khub dhokeachem aslem. Eke lhan chukik lagon pasun te tancho jiv hogddaunk xoktale. Kiteak? Absalanv khub ragixtt ani svarthi munis aslo. Ani tannem apleach bapaicho ghat kelʼlo. Tor he munis bhedi mhunn taka kollʼllolem zalear, to tanchem kitem kortolo aslo tem chintat!

10. Zadok ani tachea borabor asloleamnim Davidacho jiv koso salvar kelo?

¹⁰ Davidan ek manddnni kaddli. Ani tea manddnne pormonnem kam korunk, tannem Zadokachi ani aplo anik ek visvaxi ixtt Hushai-achi modot ghetli. (2 Sam. 15:32-37) Davidachea manddnne pormonnem, Hushai-an Absalanvacho bhorvonso jikhon gheunk zai aslo, ani Davidacher koxem akromonn korchem tea vixim Absalanvak solʼlo diunk zai aslo. Hea vorvim Davidak apli toiari korunk vell mellttolo aslo. Hushai-an toxench kelem, ani Absalanvan tacho solʼlo manun ghetlea uprant, tannem ti khobor Zadok ani Abiatharak pavoili. (2 Sam. 17:8-16) Ani uprant, tannim ti khobor Davidak pavoili. (2 Sam. 17:17) Hea toren Jehovachea modotin, Zadok ani tachea borabor aslolea iadnikamnim Davidacho jiv salvar korunk dhir dakhoilo.—2 Sam. 17:21, 22.

11. Bhav-bhoinnancho jiv dhokeant asta tednam tankam modot korunk ami Zadoka bhaxen koso dhir dakhounk zata?

¹¹ Chintat, tumchea bhav-bhoinnancho jiv dhokeant asa ani tankam modot korunk tumkam sanglam. Oslea vellar, tumi Zadoka bhaxen koso dhir dakhounk zata? (1) Nirdexon pallat. Oslea poristhitint ami ekvott samballop khub gorjecho. Ani oxem korunk, xakha ofisa thaun melltta tem nirdexon ami pallunk zai. (Heb. 13:17) Toxench, odruxtt ieunchea poilim kitem toiari korunk zai ani odruxtt ghoddtta tednam kitem korunk zai, tea vixim aslolem nirdexon vhoddilamnim vella-vellar zannam zaun gheunk zai. (1 Kor. 14:33, 40) (2) Dhirvont zaiat punn xanneponn uzar korat. (Mho. 22:3) Kitem-i kortana chintun korat ani gorje bhair tumcho jiv dhokeant ghalinakat. (3) Jehovacher patieun ravat. Tumi, toxench tumchim bhav-bhoinnam surokxit urlolim Jehovak zai mhunn ugddas dovrat. Tor  bhav-bhoinnank adar diunk to tumkam modot kortolo.

12-13. Bhav Viktor ani Vitalii-chea onnbhovantlean tumi kitem xiklim? (Chitr pasun polloiat.)

¹² Hea vixim ami Viktor ani Vitalii nanvachea don bhavanchea onnbhovancher dhean dium-ia. Hea dogui bhavamnim aplo jiv dhokeant ghalun Ukraine-antlea bhav-bhoinnank jevonn ani udok pavounk dhir dakhoilo. Bhav Viktor sangta: “Lok eka-mekacher far martat tem amkam zaite pavtti aikonk ietalem. Ami soglea zagear jevnnacheo vostu sodhtale. Eka bhavan tachea dukanant asloleo jevnnacheo vostu amkam dileo dekhun, thoddea vella pasot zaitea bhav-bhoinnank jevonn mellʼllem. Ami heo vostu amchea gaddient ghaltale tednam 20 metr pois ek bomb poddlo. Tor bhav-bhoinnank modot korit ravonk mhaka dhir di mhunn hanvem akʼkho dis Jehova lagim vinoti keli.”

¹³ Toxench bhav Vitalii sangta: “Amkam dhirachi khub goroz asli. Amchi poili trip marunk amkam 12 voram laglim. Hanv soglo vell Jehova lagim magnnem kortalom.” Bhav Vitalii dhirvont aslo khoro, punn tannem xanneponn pasun uzar kelem. To sangta: “Mhaka zannvai di ani hanvem kitem korchem ani kitem korchem nhoi tem somzonk mhaka modot kor mhunn hanvem Jehova lagim maglem. Odhikareamnim porvangi dilʼli teach rosteancher ami gele. Toxench, bhav-bhoinnam eka-mekak modot kortat tem hanvem polloilem tednam, mhozo bhavarth anikui vaddlo. Amkam addkholl zaina zaunk tannim rostear poddloleo vostu kuxin kaddleo, jevnnacheo vostu gaddient bhorunk amkam modot keli ani ami jea-jea zagear thamble, thoim amchea pasot jevonn ani visov gheunk tannim manddavoll keli.”

JEHOVAK VISVAXI RAVAT

14. Amcho mogacho konnui Jehovak soddun voita tednam amkam koxem bhogta?

¹⁴ Amcho familintlo konnui, vo amcho lagxilʼlo ixtt Jehovak soddun voita tednam amkam kitli dukh zata tem ami utramnim pasun sangonk xokonant. (St. 78:40; Mho. 24:10) Ani jitlim ami tea munxacho mog kortat, titlench tem dukh sosunk amkam anikui kotthin zaunk xokta. Tumkam oxem ghoddlam zalear, Zadok Jehovak koso visvaxi ravlo tem zannam zalʼlean tumkam modot zaunk xokta.

15. Jehovak visvaxi ravonk Zadokak dhirachi kiteak goroz asli? (1 Raza 1:5-8)

¹⁵ Raza David zanntto zalʼlo ani to moronk pavlolo. Tea vellar, Solomon raza zatolo mhunn Jehovan bhas dilʼli. (1 It. 22:9, 10) Punn hem zannam zaunui, Adonija apunn raza zaunk sodhtalo. Ani tea vellar Abiathar, zo Zadokacho ek lagxilʼlo ixtt aslo, tannem Solomonak tenko diunchea bodlek Adonijak tenko dilo. (1 Raza 1:5-8 vachat.) Oxem korun, to fokot Davidakuch nhoi punn Jehovak pasun ovisvaxi zalo. Tor hea vellar, Zadokak kitlem dukh bhoglem astolem nhoi! Karonn tannem ani Abiatharan 40-am poros chodd vorsam iadnik mhunn borabor seva kelʼli. (2 Sam. 8:17) Toxench, tannim sangata mellon “Sorvesporachi Arkpett” samballpachem kam kelʼlem. (2 Sam. 15:29) Tea bhair, tannim dogaimnim Raza Davidak tenko dilʼlo ani Jehovache sevent her zaitim kamam kelʼlim.—2 Sam. 19:11-14.

16. Zadok kiteak visvaxi ravonk pavlo astolo?

¹⁶ Abiathar Davidak ghat korun Jehovak ovisvaxi zalo. Punn Zadok Jehovak visvaxi ravlo. Ani Davidak Zadokacher purnn visvas aslo. Hea pasot, taka uprant Adonijache manddnne vixim kollʼllem tednam, tannem Zadokak, Nathanak, ani Benaiak apoun Solomonak raza mhunn makhunk sanglem. (1 Raz. 1:32-34) Tor Nathan, toxench Davidak tenko diupi her munis taka kitle visvaxi asat tem polloun, Zadok pasun visvaxi ravonk pavlo astolo. (1 Raz. 1:38, 39) Ani Solomon raza zalea uprant, tannem ‘Abiatharachea zagear Zadokak iadnik mhunn nemlo.’—1 Raz. 2:35.

17. Tumcho mogacho konnui Jehovak soddun voita zalear tumi Zadokachi dekh koxi gheunk zata?

¹⁷ Tumcho mogacho konnui Jehovak soddun  voita zalear, Zadoka bhaxen tumi Jehovak visvaxi asat mhunn dakhoun diat. (Josh. 24:15) Oxem korunk, Jehova tumkam goroz ti xokti ani dhir ditolo. Tor magnnem korun tacher patieun ravat ani tachea visvaxi sevokank chittkon ravat. Tumi Jehovak visvaxi ravtat tednam, to khuxal zatolo ani tumkam inam ditolo.—2 Sam. 22:26.

18. Marco ani Sidse-chea onnbhovantlean tumi kitem xiklim?

¹⁸ Hea vixim bhav Marco ani tachi bail, Sidse-chea onnbhovacher dhean dium-ia. Tancheo donui dhuvo sot soddun geleo. Marco sangta: “Bhurgim zolmak ietat tednam thaun avoi-bapui tancho khub mog kortat. Ani vaitta thaun tanchi rakhonn korunk tim apleachean zata tem soglem kortat. Punn tim Jehovak soddun voitat tednam, avoi-bapui sarkinch tuttʼttat.” To fuddem sangta: “Punn hem soglem sosunk Jehova amkam modot korta. Hanv ani mhoji bail, eka-mekak urba diunk xoktat mhunn to khatri korun gheta. Hanv niraxi astam tednam mhoji bail mhaka bhuzvonn ani urba dita, ani ti niraxi asta tednam hanv tika bhuzvonn ani urba ditam.” Sidse sangta: “Jehovan amkam modot korunk nasli zalear ami hea sogleacho fuddo korunk pavchinch naslim. Hanv khub dukhi aslem ani mhojea dhuvamnim Jehovachi seva korop bond korunk hanvuch zobabdar, oxem hanv chintʼtalem. Tor mhaka koxem bhoglem tem hanvem Jehovak sanglem. Thoddea vella uprant, mhaka ek bhoinn mellʼlli. Hanv tika zaitim vorsam poilim mellʼllolem. Ti mhojea sorxim aili, mhojea khandar hat dovorlo ani mhaka polloun oxem mhunnttlem: ‘Sidse ugddas dovor, hi tuji chuk nhoi.’ Tor Jehovache modotin hanv khuxalkaien tachi seva korit ravonk pavlem.”

19. Tumi kitem korunk chintlam?

¹⁹ Zadoka bhaxen aplim soglim sevokam dhirvont aslolim Jehovak zai. (2 Tim. 1:7) Punn ami amchea bollacher nhoi, punn tacher patielolim Jehovak zai. Tor tumi koslea-i kotthin poristhitint asat zalear, tumkam dhir di mhunn Jehova lagim magat. Ani tannem Zadokak dhirvont zaunk modot keli toxi, to tumkam-i dhirvont zaunk modot kortolo mhunn khatri dovrat.—1 Ped. 5:10.