Soglim munxam ek sarkim nant dekhun aplim konnui mogachim mortat tednam soglim ekuch bhaxen dukh korinant. Thoddim aplem dukh aplea bhitoruch dovortat vo thoddeank apleak koxem bhogta tem dusreank sanglea uprantuch borem dista. Dukh korunk vo dukha thaun bhair soronk ekuch vatt asa oxem na. Chodd korun eka munxachi sonskrutai, tacho sobhav, onubhov ani tacho mogacho koso melo hea sogleacho tacher probhav poddtta.

Amchim mogachim mortat tednam amkam koslim bhavnam ietolim tea vixim ghoddie amkam khobor asona. Punn thoddim bhavnam ani oddchonneo oxeo asat jeo soglea lokank ietat. Zoxem:

Dukh sosunk khub kotthin zaunk xokta. Thoddim bob marun roddttat, thoddim aplim mogachim meleant tankam pollounk axetat, ani thoddeanchem mon khoincheai vellar bodlonk xokta. Zaite pavtti mogachim meleant tancho khub ugddas ieta ani tanchim sopnam pasun poddttat. Tim meleant dekhun, survatek dhoko bosonk xokta ani tem manun gheunk khub kotthin zata. Aplo ghov, Tom, melea uprant apleak koxem bhoglem tea vixim Tina sangta: “Kitem ghoddlem tem survatek mhaka kainch kollona zalem. Poilim-poilim mhojean roddonk pasun zainaslem. Mhaka itlem dukh zalʼlem ki thodde pavtti mhaka svas gheunk pasun kotthin zatalo. Jem kitem ghoddlam tem mhojean manun gheunkuch zainaslem.”

Uskevop, ragar zavop, ani svotak guneanvkari mhunn tharavop him bhavnam amkam ieunk xoktat. Ivan mhunntta: “Amcho put, Eric, 24 vorsancho astana bhair poddlo. Ani tea uprant, hanv ani mhoji bail, Yolanda, zaito temp poriant ragar aslim! Amchea bhitor ho bodlav polloun ami ojap zalim karonn amcho sobhav oso naslo. Ami amkanch guneanvkari mhunn tharaunk laglim karonn amchea putak vachounk ami anik kitem tori korunk zai aslem, oxem amkam distalem.” Apli bail zaito temp poriant duent aslolean bhair poddli dekhun Alex apleakuch guneanvkari mhunn tharaun oxem mhunntta: “Poilim mhaka distalem ki hanv vaitt munis dekhun, Devan mhaka hem soglem sosunk dilam. Punn uprant, hanvem Devacher arop ghatlo mhunn chintun, mhaka hanvuch guneanvkari mhunn disonk laglem.” Ami fattlea lekhant polloilʼlo, Kostas oxem mhunntta: “Sophia moron gelem dekhun ek-ek pavtti mhaka tacho khub rag ietalo. Punn uprant hanv oxem chintʼtam mhunn mhakach vaitt disonk laglem. Tem melem mhunn tacho koslo guneanv?”

Sarke toren chintunk kotthin zaunk xokta. Zannim aplea mogacheank mornnant hogddaileant tankam thodde pavtti sarke toren chintunk vo kiteacher-ui dhean diunk kotthin zaunk xokta. Tancho zo mogacho moron gela to tanchea bhonvtonninch asa, tanchem aikota ani polloita, oxem tankam disonk xokta. Tea pasot tim kitem-i ugddas dovrunk vo kiteacherui dhean diunk pavonant. Tina sangta: “Thodde pavtti konnui mhojea lagim uloita tednam mhojem dhean dusre kodden astalem. Tom melo tednam kitem-kitem ghoddlem tench mhojea monant porot-porot gunvtalem. Hanv kiteacheruch dhean diunk xokonaslem dekhun hanv bejar zatalem.”

Dusream thaun pois ravonk dista. Zannim aplea mogacheank mornnant hogddaileant, tankam dusream sangata vell sarunk bejar ieta vo borem disona. Kostas sangta: “Hanv kazari zhoddpeam sangata asta tednam, hanv tanchea sangata asonk favona oxem mhaka dista. Punn ankvar asloleam modem hanv astana pasun mhaka toxench dista.” Ivan-achi bail, Yolanda sangta: “Konnui amkam aplea trasam vixim sangtalim tednam, mhaka tem borem disonaslem. Karonn ami sostat tea trasam mukhar tanche tras kainch nhoi koxe distale. Toxench, lok amkam aplea bhurgeam vixim kitem-i borem sangtalim tednam, hanv khuxal zatalem tem khorem, punn tea vellar mhojea putacho ugddas korun bejar zatalem. Amkam hea sogleacho fuddo korunk poddttoloch mhunn ami zannam aslim. Punn lokanchem aikon ami bejar zatalim.”

Bholaiki piddʼddear zaunk xokta. Zaiteank bhuk lagona, sarki nhid poddona, ani tanchem vozon vaddonk vo unnim zaunk xokta. Aplo bapui melea uprant kitem  ghoddlem tea vixim Aaron oxem sangta: “Mhaka sarki nhid poddonasli. Dor-eke ratik umke vellar mhaka zag zatali ani mhojea daddy vixim chintunk lagtalom.”

Alex-achi bholaiki bigddonk lagloli, punn hea vixim taka khobor pasun nasli. To mhunntta: “Eka dotoran mhaka topaslo tednam mhaka koslench duens na mhunn tannem khatren sanglem. Hanv chodduch dukhant aslom dekhun, hanv pollounk duent koso distalom.” Uprant sovkas-sovkas korun to boro zalo. Punn Alex dotorak mellonk gelo, to tacho sarko nirnnoi aslo. Karonn dukhi astat tanchi duensam pois korpachi kuddichi xokti unni zata, duensam asat zalear tim anikui vaddttat, vo novim duensam zatat.

Mhotvachim kamam korunk kotthin zaunk xokta. Ivan sangta: “Eric melea uprant amkam zaitim kamam korunk aslim. Zoxem soireank, tachea ixttank, tachea patranvak ani ghorachea owner-ak, Eric bhair poddla mhunn sangonk zai aslem. Toxench, kaidea sombondit tache zaite document korunk zai asle. Uprant tacheo khoincheo vostu dovrunk zai vo naka tem pollounk zai aslem. Hem soglem korunk zai aslem mhunn chintun-chintun ami khub thoklolim ani kitench korunk umed nasli.”

Punn thoddeank hi ek oddchonn asta. Tanchim mogachim kortalim tim kamam atam tankam korunk poddttat. Tina-k oxench ghoddlem. Tem sangta: “Bank-achem vo business-achem kam asum, tem soglem poilim Tom samballttalo. Punn atam tim soglim kamam korchi zobabdari mhoji asli. Dekhun mhaka anikui usko zaunk laglo. Hanv chintʼtalem, mhojean him soglim kamam samballunk zatolim kai?”

Voir sangloleo oddchonneo, zoxem bholaiki piddʼddear zavop, dukh zavop, vo uskevop, hancho ami fuddo kortat tednam, tantuntlean amchean bhair soronkuch zaunchem na oxem amkam disonk xokta. Konnui amcho mogacho morta tednam, tem dukh sosunk amkam ekdom kotthin zata tem khorem, punn tea vellar amkam kosleo oddchonneo ieunk xoktat tem ami poilinch zannam zalolean, ami toiar ravonk ani tacho fuddo korunk amkam modot zatoli. Punn ami hem ugddas dovrunk zai ki aplo mogacho konn morta tednam dor-ekleak ekech torechi oddchonn ghoddie aschina. Toxench, tea munxacho ugddas korun thodde pavtti ekdom chodd dukh zaunk xokta.

Kitem zaunk xokta: Survatek hem dukh sosunkuch zaunchem na, oxem thoddeank disot. Punn uprant sovkas korun tem dukh unnem zata. Hacho orth, ek munis aplem dukh purnn toren visorlo vo tacho taka anik ugddasuch iena oxem nhoi. Karonn thodde pavtti kazaracho vo mornnacho dis asta tednam, taka tacho chodduch ugddas ieunk xokta. Punn vell voita toso tachea kallzak pekovnni melltta ani to sodanchea jivitant aslolea kamacher dhean diunk lagta. Ani khas korun jednam familicho ani ixttancho sangat asta tednam, oslea odchonneam thaun bhair soronk taka modot zata.

Kitlo vell lagtolo? Thoddeank mhoine lagtat ani zaiteank ek vo don vorsam lagtat. Punn thoddea zannank anikui chodd vell lagta. a Alex sangta: “Mhaka mhojea dukhantlean bhair soronk sumar tin vorsam laglim.”

Tea poriant pasiens dakhoiat. Dor disa tumchea lagim zata titlench korat. Faleancho usko aiz korinakat. Survatek jem dukh zata tem sodanch urchem na mhunn ugddas dovrat. Amkam dukh zatolem tem khorem. Punn ami thoddim panvlam ghetlim zalear, amchem dukh unnem korunk amkam modot zatoli. Tumi kitem korunk zata tem atam ami polloum-ia.