1, 2. Mondirachea darvonttea lagim Pedrun ani Juanvan koslem vizmit kelem?

 DONPARCHIM sumar tin voram zaleant ani koddok vot asa. Beginuch ‘magnneacho vellʼ suru zatolo. a (Itihas 2:46; 3:1) Dekhun, visvaxi Judev ani Jezuche xis mondirant bhitor sortat. Hea lokanchea zomea modem Pedru ani Juanv-ui asa. Te Sobit mhunnttat tea darvonttea lagim pavtat. Lok choltat ani eka-meka lagim uloitat tem hanga aikonk ieta. Toxench, bhik magtolea eka longddea munxacho avaz ieta, zachi pirai 40-am poros chodd ani to zolma thaun longddo.—Itihas 3:2; 4:22.

² Pedru ani Juanv tea munxa sorxim pavtat tednam, to tanchea lagim poixe magta. Tednam te thambtat ani Pedru taka mhunntta: “Bhangar ani chandi mhojea koddem na. Punn mhojea koddem jem asa tem hanv tuka ditam. Nazaretkar Jezu Kristachea nanvan hanv tuka sangtam, utth ani chol!” Pedru tea munxachea hatak dhorun taka ubo korta. Chintat! To tachea jivitant poile pavtti ubo ravta. To aple paim sarke zaleat tem polloita ani hollu-hollu panvlam marunk lagta. Hem polloun thoinche lok kitle ojap zale astole nhoi! (Itihas 3:6, 7) Toxench, to longddo munis khuxal zaun uddio marunk lagta ani Devak vakhannʼnni dita!

3. Boro zalʼlea longddea munxak ani zomeak koslem vortem dennem favo zalem?

³ Thoinche ojap zalʼle lok Pedruk ani Juanvak dhanvon mellonk ietat. Tea vellar, Pedru ani Juanv Solomonachi vatt mhunnttlolea zagear asle. Heach zagear, Jezun pasun lokank xikoilolem. (Juanv 10:23) Hem vizmit kiteak zaunk pavlem tea vixim Pedru thoim hajir aslolea zomeak sangta. To tankam ani boro zalʼlea longddea munxak, chandi vo bhangar, ani tea vizmita poros vortem aslolea dennea vixim sangta. Tem mhunnttlear poschatap korun, patkanchem bhogsonnem mellon, ‘jivit diunk nemlolea Mukhel Fuddareacheʼ pattlavdar zaunchi sondhi.—Itihas 3:15.

4. (a) Pedrun ani Juanvan eka longddea munxak boro kelea uprant odhikar aslolea munxamnim kitem korunk proitn kelo? (b) Ami khoinchea prosnanche zobab polloitolim?

⁴ Khorench, ho ek khub mhotvacho dis aslo! Karonn Pedrun eka longddea munxak boro kelʼlo ani to cholonk xoktalo. Toxench, Devachi khuxi somzon taka manta tea ritin tachi bhokti korunk hozaramnim lokank sondhi mellʼlli.  (Kol. 1:9, 10) Tea bhair, hea disa ghoddlolea ghoddnneank lagon, odhikar aslolea munxamnim Jezuchea xisancher, bori khobor porgott korina zaunk virodh haddlo. (Itihas 1:8) Tanchea nodren Pedru ani Juanv “xikop naslole ani chalte munis” asle. b (Itihas 4:13) Punn Pedrun ani Juanvan, hea zomeak sakx koxi dili tantuntlean ami kitem xikonk zata? Toxench, tannim ani heramnim virodh aslearui dhir dakhoilo toso ami koso dakhounk zata? Hea prosnanche zobab ami fuddem polloitolim.

5. Pedru lokam lagim jea toren uloilo tantuntlean ami kitem xiktat?

⁵ Pedru ani Juanv thoim ektthovlolea lokam lagim uloitat. Jezuk jivexim marunk thoincho thoddo lok zobabdar aslo mhunn tankam khobor asa. (Marku 15:8-15; Itihas 3:13-15) Tor tea longddea munxak Jezuchea nanvan boro kelo mhunn sangonk, Pedruk kitlo dhir zai poddlo astolo tem chintat. Toxench, tea zomeantlo thoddo lokui Jezuchea mornnak lagon zobabdar asa mhunn tannem tankam sanglem. Punn tannim tem ‘nokllo astana kelam‘ mhunn to zannam aslo dekhun to tancho rag dhorun ravonk na. (Itihas 3:17) To tankam aple bhav mhunntta ani tannim Rajeachi bori khobor manun ghetli zalear, tankam kitlem faideachem zatolem tacher to dhean dita. Tem mhunnttlear, tannim poschatap korun Jezucher bhavarth dovorlo zalear, Jehova tanchea pasot “novean ghottai melltta tosle dis haddttolo.” (Itihas 3:19) Dev munxancho neai kortolo hea vixim sangtana, ami pasun Pedru bhaxen dhir dakhounk zai ani sot lipounk favona. Punn oxem kortana ami lokanchi nit korchi nhoi ani tancher ragar zaunchem nhoi. Tim fuddarak amchea sangata Jehovachi bhokti korunk xoktat mhunn ami chintunk zai. Toxench, ami pasun Rajeache bore khobrek lagon zata tea borea porinnamacher dhean diunk zai.

6. Apostlamnim khaltikai koxi dakhoili?

⁶ Tor apostlamnim kelʼlea vizmita pasot tannim apleakuch mhoima melloun gheunk na. Karonn Pedrun tea zomeak sanglem: “Tumi . . . amkam oxe toren kiteak polloit ravtat? Ami amchea xokten vo ami kelʼlea Devachea bhoktek lagon to cholonk laglo oxem tumkam dista kai?” (Itihas 3:12) Tor Pedru ani her apostl porgottnnent jem kitem korunk pavleat, tem aplea xokten nhoi, punn Jehovachea adaran korunk pavleat mhunn te zannam asle. Hea pasot khaltikaien tannim sogli vakhannʼnni Jehovak ani Jezuk dili.

7, 8. (a) Ami lokank koslem dennem melloun gheunk modot korunk zata? (b) “Sogleo vostu poilim bhaxen porot zaunchea kalla vixim” dilʼli bhasaunni aiz koxi purnn zata?

⁷ Aiz ami pasun porgottnni kortana khaltim asonk zai. Punn apostlam bhaxen, aiz Kristanvam duent lokank borim korunk xokonant tem khorem. Tori astana, Pedrun dilʼlem dennem melloun gheunk ami tankam modot korunk xoktat. Tem dennem mhunnttlear, tanchea patkanchem bhogsonnem ani Jehova koddlean bhuzvonn. Hem dennem apnnaun, dor vorsa hozaramnim lok bautizm ghetat ani Kristache xis zatat. Hea toren, ami lokank Devacher ani Kristacher bhavarth dovrunk modot korunk pavtat.

 ⁸ Khorench, ‘sogleo vostu poilim bhaxen porot zaunchea jea kallaʼ vixim Pedru uloilo, teach kallar ami jietat. 1914 hea vorsa, Devachem Raj sorgar suru zalem. Ani hea vorvim, ‘Devan adlea kallar aplea povitr provadeam udexim sangloleoʼ bhasaunneo purnn zaleo. (Itihas 3:21; St. 110:1-3; Dan. 4:16, 17) Jezu Raza zalea uprant, rokddench tannem aplea xisank khori bhokti stapon korunk modot keli. Ani hea pasot, lakʼkhamnim lok Devachea Rajeachi porza zaun xantin ani ekvottan Jehova Devachi bhokti kortat. Tannim aplo porno patki sobhav soddun dila ani “Devache khuxe pormonnem asa tosli novi vagnnuk” apnnailea. (Ef. 4:22-24) Punn to longddo munis Devachea povitr xokte udexim boro zalo toxench, aiz pasun Devache povitr xokte udexim lok aplem jivit bodlunk ani Devachi bhokti korunk pavtat. Tor Pedru bhaxen, ami lokank xikounk Devachem Utor dhiran ani bore toren uzar korum-ia. Ani Kristacho xis zaunk ami konnakui modot korunk pavtat tednam, tem amchea xokten nhoi, punn Devachea adaran zaunk pavta mhunn ugddas dovrum-ia.

9-11. (a) Pedru ani Juanvachem bhaxonn aikon Judevanchea fuddareamnim kitem kelem? (b) Apostlamnim kitem korunk nichov kelo?

⁹ To longddo munis boro zala mhunn khuxalkaien uddio marta tem polloun, toxench Pedruchem bhaxonn aikon, thoim aslole lok khub khuxal zatat. Tor tancho ho soglo avaz aikon, Devmondiracho odhikari, zaka Devmondirachi surokxa korunk nemlolo, to, ani thoinche mukhel iadnik begin-begin thoim kitem zalam tem pollounk ietat. He munis chodd korun Saduki asle. Saduki khub girest asle, tankam zaito odhikar aslo, ani te Romi lokam sangata xanti samballunk proitn kortale. Tea bhair, Farizevamnim apnnem kelʼle kaide bariksannen pallttale, punn Saduki he kaide pallinasle ani jivontponn pasun asa mhunn patienasle. c Tor Pedru ani Juanv, Devmondirant Jezuchea jivontponna vixim xikoitat tem aikon te khub bejar zale.

¹⁰ Uprant te ragar zaun Pedruk ani Juanvak bondkhonnint ghaltat. Ani dusrea disa Judevanchea high kortta mukhar vhortat. Hea odhikareanchea nodren, Pedru ani Juanv “xikop naslole ani chalte munis asle” ani tankam Devmondirant xikounk kainch hokʼk naslo. Toxench, te khoincheach vhoddlea dhormik iskolant xikonk nasle. Tori astana, Pedru ani Juanv dhiran ani khatren uloitat tem polloun, korttant aslolim soglim khub ojap zalim. Punn te itlea khatren koxe ulounk xoktale? Ek karonn mhunnttlear, te “Jezu Krista borabor astale.” (Itihas 4:13) Ani tancho Dhoni Jezu tankam xastream bhaxen xikoinaslo, punn odhikar aslolea munxam bhaxen xikoitalo.—Mt. 7:28, 29.

¹¹ Punn porgottnni bond korunk, korttan, mhunnche Mha-sobhen apostlancher hukum ghatlo. Tea kallar hea korttak khub odhikar aslo. Thoddea sumanam poilim, Jezuk hea kortta mukhar vhelʼlo tednam, tachea vangddeamnim tache vixim oxem mhunnttlolem: “Taka moronn favo.” (Mt. 26:59-66) Atam Pedru ani Juanv hea girest, xiklolea ani odhikar aslolea munxam mukhar ube asle. Punn hea vellar te bhienastana ani respedan oxem mhunnttat: “Ami Devachem aikochem soddun, tumchem aikochem hem Devachea nodren sarkem zalear tuminch tharaiat. Punn  amchean zalear jem ami kitem polloilam ani aikolam, tea vixim ulounchem bond korunk zaunchem na.”—Itihas 4:19, 20.

12. Dusreank sakx ditana dhiran ani khatren ulounk amkam koxi modot zatoli?

¹² Tumi pasun chodd korun tancheach bhaxen dhir dakhounk sodhtat astolim. Punn tumchea vattarant aslolea girest, khub xikop ani odhikar aslolea munxank porgottunk tumi fattim sortat kai? Vo tumchim ghorchim, tumchea sangata iskolant xiktat tim, vo kam kortat tim, tumchea bhavarthak lagon tumchim fokannam kortat dekhun tankam sakx diunk tumi bhietat kai? Hoi zalear, tumi hi bhirant pois korunk xoktat! Prithumer astana, Jezun aplea apostlank, tannim dhiran ani respedan aplea bhavartha vixim dusreank koxem sangonk zata tem xikoilem. Ani jivont zalea uprant, “sonvsarachea xevottachea vella poriant” to tanchea sangata astolo mhunn Jezun tachea xisank bhas dili. (Mt. 28:20) Ani aiz Jezuchem margdorxon pallun, “visvaxi ani xanno chakor,” ami dusreank amchea bhavartha vixim koxem sangonk zata tem amkam xikoita. (Mt. 24:45-47; 1 Ped. 3:15) Hi xikounn amkam amchea mittingent ani Bible-acher adarit aslolea prokaxonamnim melltta. Zoxem, Amchem Kristi Jivit ani Porgottnni mitting ani jw.org website-icher aslole “Bible Questions Answered” (Inglez bhaxent) hea lekham udexim. Tor tumi hea manddavollicho purnn toren faido ghetat zalear, sota vixim tumchi khatri anik vaddttoli, tumi dhiran porgottnni korunk pavtolim, ani apostlam bhaxen tumi xiklolea sotam vixim dusreank sangonk tumkam konnuch addaunk xokchona.

13, 14. Amkam virodh ieta tednam ami kitem korunk zai, ani kiteak?

¹³ Pedruk ani Juanvak bondkhonnintlean soddlea uprant, te rokddech sobhentlea bhav-bhoinnam sangata mellon aile. Tannim “sogleamnim mellon mottʼttean . . . magnnem kelem” ani porgott korit ravonk Deva lagim dhir maglo. (Itihas 4:24) Karonn Devachi khuxi korunk zai zalear, svotacher patievop kitlem dhokeachem zaunk xokta tem Pedru zannam aslo. Udharonnak, thoddea sumana poilim tannem svotacher patieun Jezuk oxem sanglolem: “Tujea thaim jem ghoddtta taka lagon urlolea sogleancho bhavarth halʼlo zalear pasun mhozo bhavarth kednanch halcho na.” Tori astana, Pedru munxank bhielo ani Jezun sanglolea  bhaxen tannem aplea ixttak ani gurujik vollkhona mhunn sanglem. Punn uprant to aplea chuki thaun xiklo.—Mt. 26:33, 34, 69-75.

¹⁴ Jezuchi adnea pallun tumkam porgott korit ravonk zai zalear, tumi fokot nichov kelearuch puro nhoi. Jehovachi seva soddunk, vo amchi porgottnni bond korunk virodhi amcher dobhav ghaltat tednam, ami Pedruchi ani Juanvachi dekh gheunk zai. Oxem korunk, Jehova lagim magnnem korun ghottai magat, sobhentlea bhav-bhoinnancho adar gheiat ani tumkam fuddo korunk poddtta tea oddchonneam vixim vhoddilank ani sotant ghott aslolea bhav-bhoinnank sangat. Karonn dusrim amchea pasot magnnem kortat tednam, Jehova him magnnim aikon tumkam ghottai ditolo.—Ef. 6:18; Jak. 5:16.

15. Tumi adim porgottnnechem kam korop bond kelʼlem zalear konnachea udharonnantlean tumkam modot zaunk xokta, ani kiteak?

¹⁵ Punn adim, dusreanchea dobhava khala ieun tumi porgottnnechem kam korop bond kelʼlem zalear, niraxi zainakat. Jezu melea uprant soglea apostlamnim thoddea vella pasot, tanchem porgottnnechem kam bond kelʼlem mhunn ugddas dovrat. Punn uprant rokddench, tannim porot porgottnni suru keli. (Mt. 26:56; 28:10, 16-20) Tor adim kelʼlea chukink lagon niraxi zaunchea bodlek, tumchea chukintlean xikat ani tumi xikleant tim lisanvam uzar korun dusreankui dhir diat.

16, 17. Jezuchea xisamnim kelʼlea magnneam thaun ami kitem xikonk zata?

¹⁶ Punn odhikar aslole munis amkam dhumallo ditat tednam ami kitea vixim magnnem korunk zai? Jezuchea xisamnim kitem kelem tacher dhean diat. Tancher dhumallo ieuncho nhoi oxem tannim magnnem korunk na. Punn tannim Jezuchim him utram ugddas dovorlim: “Tannim mhaka dhumallo dila zalear te tumkam-i dhumallo ditole.” (Juanv 15:20) Tor tanche virodhi ditat tea dhomkaunneank “kan di” mhunn tannim Jehova lagim magnnem kelem. (Itihas 4:29) Devachi khuxi korop ekdom mhotvachem ani tancher dhumallo ietalo tea udexim bhasaunneo purnn zatat mhunn tim zannam aslim. Toxench, odhikareamnim tankam kitem-i dhomki dium, Jezun tankam magnnem korunk xikoilem toxem, Devachi khuxi ‘sonvsarant zatolich’ mhunn tim zannam aslim.—Mt. 6:9, 10.

¹⁷ Tor Devachi khuxi purnn zaunk, xisamnim oxem magnnem kelem: “Tujea chakrank tujem utor bhienastana sangot ravonk dhir di.” Ani Jehovan tanchea magnneank rokddoch zobab dilo. Karonn Bible sangta: “Tim ektthaim zalʼlim to zago halʼlo, ani tim soglim  povitr xokten bhorlim ani Devachem utor bhienastana sangot ravlim.” (Itihas 4:29-31) Khorench, Devachi khuxi zaunk konnuch addaunk xokona. (Iz. 55:11) Tor amche dusman kitle-i bollixtt asum, ani Devachi khuxi zaunkuch xokona oxem amkam dislear pasun, ami Jehova lagim magnnem korun ghottai magli zalear, dhiran porgott korit ravonk to amkam modot kortoloch mhunn ami khatri dovrunk zata.

18. Jeruzalemachea sobhentlea bhav-bhoinnamnim eka-mekak koxi modot keli?

¹⁸ Jeruzalemantli lhan sobha vaddot geli ani thoim 5,000-a poros chodd bhav-bhoinnam aslim. d Tanchi sonskruti veg-veglli asli. Punn “tanchem sogleanchem chintop ekuch aslem ani tanchim bhavnam pasun ekuch aslim.” (Itihas 4:32; 1 Kor. 1:10) Xisamnim Jehova lagim tanchea vavracher besanv ghal mhunn magnnem kelem itlench nhoi, punn tannim eka-mekak tancho bhavarth ghott korunk modot keli ani gorjecheo vostu pasun dileo. (1 Juanv 3:16-18) Udharonnak, Juze nanvachea xisan, zaka apostlamnim Barnabas hem add nanv dilʼlem, tannem apli zomin vikun ap-khuxen akʼkhe poixe tea bhav-bhoinnam pasot dile, je pois-pois desam thaun Jeruzalemant ailʼle. Hea vorvim hea bhav-bhoinnank aplea novea bhavartha vixim anik xikonk hanga thodde dis ravonk mellʼllem.

19. Jehovan, Ananias ani Safirak kiteak marun uddoilim?

¹⁹ Punn Ananias ani Safira nanvachea eka zoddpean kitem kelem tacher dhean diat. Tannim pasun aplem bhatt viklem ani poixe dan kele. Punn tannim sogle poixe dan kele mhunn tim dakhounk sodhtalim. Khorem mhunnttlear, tannim “tantuntle thodde poixe lipoun apleak dovorle.” (Itihas 5:2) Hea pasot Jehovan tankam marun uddoilim. Tannim dilʼle poixe unne asle dekhun Jehovan oxe korunk na. Punn te poixe diupa fattlean tancho hetu sarko naslo. Tim apostlank fottounk sodhtalim. Punn tanchea vixim Bible sangta ki ‘tannim munxank nhoi, punn Devak fott marli.’ Ananias ani Safirak Devachi maniotai nhoi, punn munxam koddlean melltta ti vakhannʼnni chodd mhotvachi asli. (Itihas 5:4) Tim Jezuchea disamnim aslolea dhongeam sarkim aslim, zancho sobhav sarko na mhunn Jezun tankam ukteponnim sanglem.—Mt. 6:1-3.

20. Ami kitem-i ditat tednam amcho hetu koso asonk zai mhunn ami xiklim?

²⁰ Poilea xekddeant, Jeruzalemant aslole visvaxi xis khub udar-kallzache asle. Tech bhaxen, aiz lakʼkhamnim Jehovache Sakxi, sonvsarbhor zata tea porgottnnechea kamank udar-kallzan denngim ditat. Jehovachea sevent tancho vell ani poixe diunk konnuch tancher dobhav ghalina. Khorench, konnench tondd vankddem korun vo diunkuch poddtta mhunn dilʼlem Jehovak naka! (2 Kor. 9:7) Ani ami kitem-i ditat tednam, ami kitlem dilam tem Jehova polloina, punn diupa fattlean amcho kitem hetu asa tem to polloita. (Marku 12:41-44) Ami kednanch Ananias ani Safira bhaxen zaunk sodhinant. Tankam svotachi vakhannʼnni zai asli. Tachea bodlek, Pedru, Juanv ani Barnabasa bhaxen, ami Jehovachi seva kortat karonn ami tacho ani lokancho mog kortat.—Mt. 22:37-40.