1, 2. (a) Paulu kosle poristhitint aslo? (b) Paulun somrazachi modot ghetli tantuntlean koslo prosn ieta?

 PAULU Sezariant asa. Ani don soinik tacher barik nodor dovrun asat. Don vorsam adim to Judeiant ailo tednam thoddeach disam bhitor Judevamnim tin pavtti tori tacho jiv kaddunk proitn kelʼlo. (Itihas 21:27-36; 23:10, 12-15, 27) Punn tanchi ievzonn nirfoll zali. Tori astana te soddun dinant. Apunn aplea dusmanachea tabeant poddonk xokta mhunn Pauluk kollʼllem tednam tannem Romi Razpal Festus-ak mhunnttlem: “Hanv Somraza koddem neai magtam!”​—Itihas 25:11.

² Razpalachi modot gheuncho Paulucho nirnnoi Jehovak manvolo kai? Ami hem zannam zavop gorjechem. Karonn hea nimannea disamnim ami Devachea Rajea vixim bore bhaxen sakx ditat. Tor, “bori khobor porgottcho hokʼk rakhtana ani kaidea pormonnem maniotai melloun ghetana” Pauluchi dekh gheunk zai vo na tem ami zannam zaunk zai.​—Filp. 1:7.

3, 4. (a) Pauluk Jeruzalemant haddunk Judevamnim kiteak sanglem, punn Paulu surokxit kiteak urlo? (b) Pauluk modot kelʼli toxi aiz Jehova aplea sevokank koxi modot korta?

³ Judeiacho novo Razpal zaun tin disam uprant, Festus Jeruzalem-ant gelo ani thoim mukhel iadnikamnim ani Judevanchea khas lokamnim Paulun vhodd oprad keleat mhunn tacher ghatlole arop aikon ghetle. a Festusan tanchea sangata ani toxench soglea Judevam sangata xanti samballchi mhunn Romi sorkarak zai aslem, hi tankam khobor asli. Tor Pauluk Jeruzalemant haddun thoim tachi nit kor mhunn tannim Festusak sanglem. Punn khorem mhunnttlear, Pauluk Sezaria thaun Jeruzalemant vorche asle tednam te taka vatter jivexim marunk sodhtale. Punn Festusan tanchem aikon gheunk na. Tannem tankam mhunnttlem, hea “munxan khorench chuk kelea zalear tumchea modlea odhikareamnim mhojea borabor [Sezariak] ieunchem ani tacher toso arop ghalcho.” (Itihas 25:5) Tor anik ek pavtt Paulu salvar zalo.

 ⁴ Pauluk hea soglea kotthin poristhitincho fuddo korunk poddlo tea vellar, Jehova Devan, Jezu Krista udexim taka ghottai dili. Udharonnak, eka dorxonant Jezun apostl Pauluk sanglem, “Dhir dhor!” (Itihas 23:11) Aiz pasun Devachea lokank zaitea oddchonneancho ani dhumalleancho fuddo korunk poddtta. Ani hea soglea kotthin poristhiti thaun Jehova amchi rakhonn korina tem khorem, punn tem sosunk Jehova amkam zannvai ani ghottai dita. Toxench, “munxachea xokte poros khub vorti asa” ti xokti amcho mogall Dev amkam ditolo mhunn ami tacher sodanch visvas dovrunk zata.​—2 Kor. 4:7.

5. Paulucho sarko neai korchea bodlek Festusan kitem kelem?

⁵ Thoddea disam uprant, Festus Sezariant “neai korpachea zagear boslo.” b Paulu ani tacher arop ghalpi tachea mukhar ube ravle. Tea vellar tannem Pauluche add khotte arop ghatle tednam, Paulun oxem mhunnttlem: “Hanvem Judevanchea Kaideam add, Devmondira add vo Somraza add kainch patok korunk na.” Apostl Paulucho kosloch guneanv naslo, nhoi mhunn taka kosli-i khast favo asli. Punn Festusak Judev lokank khuxal korunk zai aslem, dekhun tannem Pauluk vincharlem: “Hea sogleam vostum vixim mhojea mukhar tuji zhoddtti zaunk tuka Jeruzalemant vochonk zai?” (Itihas 25:6-9) Hem vichartana Festus Paulu vixim kainch borem chintinaslo. Pauluk porot Jeruzalemant gheun gelʼle zalear tacher arop ghalpi tache neai korpi zaun tacher mornnachem formonn martole asle. Festusan sarkem tem korchea bodlek, lokank  manta tem kelem. Thoddea vorsam poilim anik ek Razpal Porsius Pilatan Jezu sangata oxench kelʼlem. (Juanv 19:12-16) Amchea disamnim pasun neai korpi, lokank khuxal korunk sarkem tem korinant. Taka lagon, fuddari ason-ui te Jehovachea lokam sangata onʼneai kortat tednam ami ojap zainant.

6, 7. Paulun somraza lagim neai kiteak maglo, ani aiz ami tachi dekh koxi ghetat?

⁶ Festus Judevank manta tem korunk sodhtalo dekhun to Pauluk Jeruzalemant dhaddunk sodhtalo. Punn oxem kelʼlem zalear, Pauluchea jivak dhoko aslo. Tea pasot, tannem Romi nagrikank aslolo kaido uzar korun Festusak mhunnttlem: “Hanv Somrazachea neai korpachea zagea mukhar ubo asa. Mhoji zhoddtti hangach zaunk zai. Hanvem Judevank kainch vaitt korunk na, ani hem tuka bore bhaxen kollon ailam . . . Hanv Somraza koddem neai magtam!” Eka Romi nagrikan oxi vinoti kelʼli zalear konnacheanuch ti bodlunk zainasli. Tor Festusan, Pauluk oxem mhunnttlem, “Tunvem Somraza koddem neai magla; tor tum Somraza koddem voitolo.” (Itihas 25:10-12) Paulun hea toren somraza kodde neai magun osleach torechea kotthin poristhitint aslolea khorea Kristanvank ek dekh dovorli. Amchem kam bond korunk virodhi “Kaideachea nanvan onit” kortat tednam Jehovachi bhokti korchi amcho hokʼk rakhonk ami-i kaideancho adar ghetat. c—St. 94:20.

⁷ Paulun kosloch guneanv korunk naslo, tori astana to don vorsam pasot bondkhonnint aslo. Punn uprant apli kes manddunk taka Romant sondhi mellʼlli. Punn thoim voichea poilim anik ek odhikari tachea lagim ulounk sodhtalo.

8, 9. Raza Agripa Sezariant kiteak ailʼlo?

⁸ Thoddea disam uprant raza Agripa ani tachi bhoinn Bernis novo Razpal, Festusak “mellonk” Sezariant ietat. d Adlea kallar Romant, odhikareamnim novea razpalak mellchi sonvoim asli. Tor Festusak mellon Agripa tachea sangata apli ixttagot ghott korunk sodhtalo. Ani oxem kelʼlean fuddarak raza Agripak faido zatolo aslo.​—Itihas 25:13.

⁹ Festusan Paulu vixim raza Agripak sanglem tednam, Agripa Pauluk mellonk axeun aslo. Dusrea disa te don-ui odhikari aplem vhoddponn dakhoit neai korpachea zagear ieun bosle. Punn te jea ritin neai sobhent ieun bosle tachea poros Paulun fuddem kitem mhunnttlem tem odik borem aslem.​—Itihas 25:22-27.

10, 11. Paulun Agripak man koso dilo, ani apunn poilo koslo munis aslo tea vixim Paulun Razak kitem sanglem?

¹⁰ Apleak ulounk sondhi dili mhunn Paulun respedan Raza Agripache upkar attoile. Karonn Agripa Judevank vollkhotalo ani tanche vad-vivad to somzotalo. Apunn poilo koslo munis aslo tea vixim Paulun oxem mhunnttlem: “Hanv ek Farizev aslom ani Farizev bhokti kortale tea pormonnem hanv her Judevam poros  khub koddok toren riti-rivazo pallttalom.” (Itihas 26:5) Farizev zalʼlean, Mesias ietolo mhunn Devan dilʼli bhasaunni Paulu mantalo. Punn Kristanv zalea uprant bhasailʼlo Mesias Jezu Krist aslo mhunn to dhiran porgottʼttalo. Ani hea pasot, to ani tache virodhi mantale ti bhasaunni purnn zali mhunn Paulu porgottʼttalo dekhun te tachi nit kortale. Hem soglem aikon Paulu fuddem kitem sangtolo tem aikonk Agripa anikui axeun aslo. e

¹¹ Apunn Kristanvank nixttur toren koso dhumallo ditalo tea vixim Paulun oxem mhunnttlem: “Eka vellar, Nazaretkar Jezuchea nanvacho zata titlo virodh korunkuch zai oxem hanv-ui somzotalom . . . Hanv tancher [Kristachea pattlavdarancher] itlo ragar aslom ki hanv dusrea xaramnim vochon pasun tankam dhumallo diunk laglom.” (Itihas 26:9-11) Hem Paulun vaddoun-choddoun sangonk na, karonn to Kristanvank koxe toren dhumallo ditalo tem zaito lok zannam aslo. (Gal. 1:13, 23) Tor oslo munis Kristanv koso zaunk pavlo, hea vixim ghoddie Agripa chintunk poddlo.

12, 13. (a) Apostl Paulu Kristanv koso zalo tea vixim tannem kitem mhunnttlem? (b) Paulu apleakuch “koso tras” korun ghetalo?

¹² Hea vixim Apostl Paulun fuddem oxem mhunnttlem: “Ek pavtt hanv mukhel iadnikam koddlean odhikar ani porvangi gheun Damaskak voitalom. Tednam Raza, donparchea vellar mollbar thaun uzvadd porzollʼllo, zo uzvadd suria poros chodd porzollit aslo. To uzvadd mhojer ani mhojea sangata choltale tanchea  charui vatten porzollʼllo. Tednam ami sogle zomnir poddle ani hanvem ek avaz aikolo zo Hebrev bhaxent oxem mhunnttalo: ‘Saulu, Saulu, tum mhaka dhumallo kiteak dita? Hea toren mhozo virodh korun tum tukach tras korun gheta.’ Punn hanvem mhunnttlem: ‘Tum konn, Somia?’ Ani Somian mhunnttlem: ‘Hanv Jezu, zaka tum dhumallo dita.’” f—Itihas 26:12-15.

¹³ Hem soglem ghoddchea poilim Paulu eka oslea zonvara bhaxen aslo, zo apleakuch “tras korun” ghetalo. Zoxem vojem vhorta toslem zonvar, gorje bhair taka vatt dakhounk uzar kortalim tea boddiechea pontar khontt martalem zalear tem apleakuch tras kortalem. Teach bhaxen, Devachea khuxe add kam korun, Paulu Deva sangata apli ixttagot piddʼddear kortalo. Tor jivont zalʼlea Jezun eka dorxona udexim khaltea kallzachea Pauluk Damaskachea vatter mellon tachem chintop bodlunk taka modot keli.​—Juanv 16:1, 2.

14, 15. Aplea jivitant kelʼlea bodlavam vixim Paulun kitem mhunnttlem?

¹⁴ Paulun aplea jivitant vhodd bodlav kelʼle. Tea vixim to Agripak sangta: “Sorga voilea dorxona thaun mhaka ji adnea mellʼlloli ti hanvem moddunk na. Tannim poschatap korcho ani poschatap kela mhunn dakhoitat toslim kamam korun Deva lagim porot ieunchem mhunn hanvem poilim Damaskak ani uprant Jeruzalemant ani Judeiachea akʼkhea vattarant ani toxench dusrea raxttrank pasun sondex dilo.” (Itihas 26:19, 20) Damaskachea vatter astana Pauluk Jezu Kristan jem kam dilʼlem tem to zaitim vorsam poriant  korit ravlo. Hacho kitem porinnam zalʼlo? Pauluchem aikon jim konn Jezuchim pattlavdaram zalʼlim, tannim apli vaitt kamam soddun dilʼlim ani poschatap kelʼlo. Ani tim Devachi khuxi kortalim, toxench tim kaide pallttalim, ani tim ravtalim thoinsor xanti samballunk modot kortalim.

¹⁵ Paulu kortalo tea porgottnnek lagon kitlo faido zalʼlo tem Judevank kollonk naslem. Paulun sanglem: “Heach pasot Devmondirant Judevamnim mhaka dhorlo ani jivexim marpacho proitn kelo. Punn, Dev mhaka adar korit asa dekhun, aiz poriant hanv lhanank toxem vhoddank sakx di-it asam.”​—Itihas 26:21, 22.

16. Neai korpi ani odhikaream mukhar amchea patienni vixim amkam ulounk poddlem zalear ami Pauluchi dekh koxi gheunk zata?

¹⁶ Khorim Kristanvam zalʼlean, ami amchea patienni vixim dusreank “zobab diunk sodanch toiar” asonk zai. (1 Ped. 3:15) Neai korpi vo odhikaream mukhar amchea bhavartha vixim amkam ulounk poddlem zalear, Agripa ani Festusa lagim Paulu koso uloilo, tachea thaun ami xikonk zata. Tem mhunnttlear, ami tankam respedan amchea toxench dusreanchea jivitant bodlav korunk Bible-a vorvim koxi modot zali tem ami tankam sangonk zata. Hem aikon ghoddie neai korpi ani odhikari amchea vixim sarke nirnnoi gheunk pavtole.

17. Pauluchem aikon Festusan kitem kelem, ani aiz zaito lok Festusa bhaxen koso vagta?

¹⁷ Paulun sanglem tem aikolea uprant, Festus ani Agripa bejar zale. Fuddem kitem zalem tacher dhean diat. Bible amkam sangta, “Paulu apli kainch chuk na mhunn dakhounk uloita astanach, Festusan mottʼttean mhunnttlem: ‘Paulu! Tum toklen suttla, chodd xiklolean tum piso zala!’” (Itihas 26:24) Festus jea toren vaglo toxech aiz pasun zaite lok vagtat. Bible-a vixim dusreank xikoitat tankam tim pixim koxim lekhtat. Toxench, khub xikop aslolea lokank Bible-ant sangloli jivontponnachi xikounn manunk kotthin zata.

18. Paulun Festusak kitem mhunnttlem, ani tem aikon Agripan kitem mhunnttlem?

¹⁸ Tednam, Paulun razpalak mhunnttlem: “Manadik Festusa, hanv piso zaunk na. Hanv khorem tench sangtam ani sarko chintunuch uloitam. Khorem mhunnttlear, jea raza mukhar hanv heo vostu ukteponnim uloitam to svota heo vostu bore bhaxen zannam . . . Agripa Raza, tum Provadeanchea Pustokant jem boroilam tacher visvas dovorta? Tum visvas dovorta mhunn hanv zannam.” Tea vellar, Agripan Pauluk mhunnttlem: “Tum thoddeach vella bhitor mhaka Kristanv kortolo.” (Itihas 26:25-28) Razachim utram kallzantlean vo voilea-voir aslim tim amkam khobor na, punn Pauluchim utram aikon tacher khub probhav poddlo mhunn amkam dison ieta.

19. Festus ani Agripan Paulu vixim kitem mhunnttlem?

¹⁹ Tanchem ulovop zalem mhunn dakhounk, Agripa ani Festus ube ravle. “Thoim thaun voitana, te eka-mekak mhunnonk lagle, ‘Hea munxak mornnachi khast vo bondkhonn favo zai sarkem tannem kainch korunk na.’ Tednam Agripan Festusak mhunnttlem: ‘Hea munxan Somraza lagim neai magonk vinoti korunk nasli zalear taka soddunk zatalo.’” (Itihas 26:31, 32) Tor Paulucho kosloch guneanv na mhunn he donui odhikari zannam asle. Tor atam thaun te Kristanvank somzon ghetole ani tanchea sovem ghoddie doiall toren vagtole asle.

20. Festus ani Agripa mukhar Paulu uloilo dekhun kitem faido zalo?

²⁰ Paulun porgott kelea uprant, Festus vo Agripa Kristanv zaunk na mhunn amkam dison ieta. Punn Paulu tanchea mukhar uloilo dekhun khub faido zalo. Karonn taka ‘razam ani razpalam mukhar ubo kelo,’ dekhun Romi sorkarak osli khobor aikonk mellʼlli, ji adim tankam aikonk mellonk nasli. (Lukas 21:12, 13) Itlench nhoi, zaite tras ason-ui Paulun jem onubhovlem ani je toren to visvaxi ravlo, tantuntlean bhav-bhoinnank khub urba mellʼlli.​—Filp. 1:12-14.

21. Kotthin poristhiti asonui ami porgottnni korit ravtat tednam tacho kitem faido zata?

²¹ Aiz pasun toxench zata. Lok amcho virodh kortat vo amkam kotthin poristhitincho fuddo korunk poddtta tednam pasun ami porgottnni korit ravlim zalear tacho khub faido zata. Zoxem, ami oslea odhikareank sakx diunk pavtolim, zankam ghoddie ami dusrea vellar kednanch sakx diunk pavchimnant. Toxench ami visvaxiponnan hem soglem sostat tednam amchea bhav-bhoinnank urba melltta. Ani Devachea Rajea vixim sakx di-it ravonk tankam dhir melltta.