1, 2. Barnabas ani Sauluchi seva koxi veglli asli, ani tanchea seve vorvim Itihas 1:8-antlim utram koxim purnn zaunchim aslim?

 ANTIOK sobhentlim bhav-bhoinnam khub khuxal asat. Karonn povitr xoktechea modotin poisulʼlea vattaramnim porgottnni korunk Barnabas ani Sauluk vinchun kaddleat. a (Itihas 13:1, 2) Adim thodde purte aslole bhav Kristanv asle toslea vattaramnim seva korunk gelʼle. (Itihas 8:14; 11:22) Punn Barnabas ani Saulu atam, bori khobor kednanch porgott zaunk na toslea vattarant seva korunk voiche asle ani tankam modot korunk, Juanv Marku tanchea sangata voicho aslo.

² Tea vellar thaun sumar 14 vorsam adim, Jezun aplea pattlavdarank oxem mhunnttlolem: “Akʼkhea Judeiant ani Samariant, toxench prithumechea sogleant poisulʼlea vattarant pasun tumi mhojea vixim govai ditole.” (Itihas 1:8) Tor, Barnabas ani Sauluk mixinori mhunn vinchun kaddlolean Jezuchi hi bhasaunni purnn zaunchi asli! b

3. Poilea xekddeant provas korop kiteak kotthin aslem?

³ Aiz gaddio ani plane asat dekhun lok fokot ek vo don voram bhitor, eka zagear thaun dusrea zagear sompeponnim vochonk xoktat. Punn poilea xekddeant oxem naslem. Lok eka zagear thaun dusrea zagear voitolo zalear tankam cholon voichem poddttalem ani tem-ui zalear roste sarke nasle. Ek munis akʼkho dis cholʼlo zalear pasun, to fokot 30 kilometr pois vochonk xoktalo ani hea toren choltalo to lok khub thoktalo. c Tor Barnabas ani Sauluk aplo provas korunk sompem aschem na ani hea kamant tankam khub vavr ani teag korcho poddttolo mhunn te zannam asle, toripunn te toiar asle.—Mt. 16:24.

4. (a) Barnabas ani Sauluk koxe vinchun kaddle, ani bhavamnim koslo sobhav dakhoilo? (b) Bhav-bhoinnank zobabdari melltta tednam ami tankam koso tenko diunk zata?

 ⁴ Barnabas ani Saulukuch hea ‘kamank lagon kiteak kuxin kaddlole?’ (Itihas 13:2) Hem amkam Bible-ant sangonk na. Punn tankam povitr xokte udexim nemlole mhunn amkam khatri asa. Hea vellar, tanchea kamant tankam tenko diunk Antiokant aslolea provadeamnim ani xikoupeamnim apnnachean zata tem soglem kelem. Tednam Barnabas ani Sauluk koxem dislem astolem tem chintat! Karonn tanchea bhavamnim tanchi nattkai korunk na. Punn tannim tanchea pasot upas kelo, magnnem kelem ani tancher ‘hat dovrun tankam dhaddun dile.’ (Itihas 13:3) Tanchea bhaxen aiz pasun konnakui zobabdari melltta, zoxem sobhent bhavank dekhrekh korunk vinchun kaddttat tednam, ami tankam purnn toren tenko diunk zai. Tankam osle sueog melltta mhunn tanchi nattkai korchea bodlek, ‘tanchea kamank lagon ami mogan anik chodd man diunk zai.’—1 Tes. 5:13.

5. Siprusachea zunvear porgottnni korunk Barnabas ani Sauluk kitem korchem poddlem?

⁵ Antioka thaun, Barnabas ani Saulu cholon Seleusia dhokear pavle. Thoim thaun te tarvant boson Siprus zunvear vochonk bhair sorle, jem sumar 160 kilometr pois aslem. d Barnabas Siprus ganvcho aslo dekhun thoinchea lokank porgottnni korunk to khuxal aslo mhunn kainch dubhav na. Te Siprusachea  udente vatten aslolea Salamis xarant pavle tednam, te rokddech “Judevanchea sobha-ghoramnim vochon Devachem utor porgottunk lagle.” e (Itihas 13:5) Tor Barnabas ani Saulun akʼkhea Siprusachea zunvear bhonvon vhodd-vhodd xaramnim porgottnni keli. Hacho orth, te ghoddie sumar 160 kilometr cholʼle astole!

6, 7. (a) Sergius Paulus konn aslo, ani Bar-Jezu taka bori khobor aikopachi kiteak addaunk sodhtalo? (b) Bar-Jezun virodh kelo tednam Saulun kitem kelem?

⁶ Poilea xekddeant Siprusant ravtole lok khottea devanchi bhokti kortale. Ani Barnabas ani Saulu, Siprus zunveachea ostome vatten aslolea Pafos mhunnttat tea xarant pavle tednam, tem sarkem dison ailem. Karonn thoim tankam, ‘Bar-Jezu mellʼllo, zo ek jadugar ani khotto provadi aslo.’ “To thoincho Razpal Sergius Paulusa borabor ravtalo. Sergius Paulus ek huxar munis aslo.” f Poilea xekddeant, zaite famad Romi lok ani Sergius Paulusa sarke “huxar munis” pasun mhotvache nirnnoi gheunk zai tednam, jadugar vo fuddar parkhupeanchi budh gheunk voitale. Punn Sergius Paulusan bori khobor aikoli tednam taka ti khub avoddli ani taka “Devachem utor aikopachi khub itsa asli.” Punn Bar-Jezu, zaka “Elimas” pasun mhunnttale, zacho orth “Jadugar,” hem soglem polloun bejar zalo.—Itihas 13:6-8.

⁷ Bar-Jezu Rajeache bore khobrecho virodh kortalo. Karonn taka razpalak solʼlo diupachi khas zobabdari aplea hatantlean gelʼli naka asli. Tor “razpalan bhavarth dovorcho nhoi mhunn tannem bhorpur proitn kelo.” (Itihas 13:8) Punn Saulun oxem zaunk diunk na. Tor tannem kitem kelem? Bible sangta: “Tednam Saulu, zaka Paulu-i mhunnttale, to povitr xokten bhorlo ani tea jadugara [Bar-Jezu] koddem polloit ravlo, ani mhunnttlem: ‘Are soglea torechea fottingponnan ani soglea torechea noxtteponnan bhorlolea Soitanachea puta, soglea nitivontponnachea dusmana, Jehovachea nitt vattencho virodh korop tum soddun diuncho  na kai? Atam polloi! Jehovacho hat tujea add asa. Tum kuddʼddo zatolo, ani thoddea vella pasot tum suriacho uzvadd pollounk xokchona.’ Teach vellar, tachea dolleam mukhar datt dov koso ailo ani kallokh ailo, ani to hevtten-tevtten apleak konnui hatak dhorun vhorot kai mhunn sodhunk laglo.” g Hacho porinnam kitem zalo? “Jem ghoddlem tem polloun razpalan bhavarth dovorlo. Karonn, Jehova vixim xikounn aikon to ekdom ojap zalʼlo.”—Itihas 13:9-12.

8. Aiz ami Paulu bhaxen dhir koso dakhounk zata?

⁸ Paulu, Bar-Jezuk bhieunk na. Teach bhaxen, konnui virodhi aikonk sodhtoleancho bhavarth moddunk sodhta tednam, ami dhiran sota pasot uloitat. Punn oxem kortana ‘amchim utram sodanch mogall ani mittan ruchichim kelʼlea sarkim asonk zai’ mhunn ami ugddas dovortat. (Kol. 4:6) Teach borabor ami lokank Jehova vixim xikonk modot kortat dekhun, dusreank rag ieta zalear pasun ami hem kam korop bond korinant. Punn Paulu bhaxen ami dhiran sota vixim uloitat ani Jehova vixim zannam zaunk sodhtat tankam modot korunk ami amchean zata tem soglem kortat. Toxench, Bar-Jezu bhaxen khotte dhorm ‘Jehovachea nitt vattencho virodh kortat’ tednam ami dhiran tancheo fotti dakhoun ditat. (Itihas 13:10) Tea bhair, Paulu bhaxen vizmitam korunk aiz ghoddie Jehova amkam xokti diunchona. Punn khaltea kallzachea lokank sot zannam zaunk modot korunk, Jehova apli povitr xokti uzar korta mhunn amkam khatri asa.—Juanv 6:44.

9. Paulu ani Barnabasan aiz fuddakar ghetolea bhavank kosli dekh dovorlea?

⁹ Paulu, Barnabas ani Marku, Pafosantlean tarvant sumar 250 kilometr provas korun Perga xarant aile, jem Asia Minor-achea doria deger aslem. Tanche vixim sangtana, Itihas 13:13-nt tankam “Paulu ani tache sangati” oxem mhunnttlam. Hacho orth, atam Paulu hea zomeant fuddakar gheunk laglo. Punn Paulu oxem korunk laglo mhunn Barnabasak nattkai zali oxem Bible khoinch sangona.  Tachea bodlek, Devachi khuxi purnn korunk he dogui munis sangata mellon vavrit ravle. Paulu ani Barnabasan aiz fuddakar ghetat tea bhavank ek bori dekh dovorlea. Ami Jezuchim pattlavdaram zalʼlean, ami dusream poros vhodd mhunn chintchea bodlek, Jezuchim him utram ami sodanch ugddas dovrunk zata: “Tumi sogle bhav.” Toxench, tannem fuddem mhunnttlem: “Zo konn svotak voir kaddtta taka sokol denvoitole ani zo konn svotak khalto korta taka voir kaddttole.”—Mt. 23:8, 12.

10. Perga thaun Pisidiachea Antiok xarant Paulu ani Barnabasacho provas koso aslo tem somzaiat.

¹⁰ Pergant pavlea uprant Juanv Marku, Pauluk ani Barnabasak soddun Jeruzalemant gelo. Tannem oxem kiteak kelem tem Bible amkam sangona. Uprant Paulu ani Barnabas Perga thaun Pisidiachea Antiok xarant gele, jem Galasiechea prantant aslem. Ho provas korunk tankam sompem naslem. Karonn Antiok xar doria thaun 1,100 metr unch aslem. Tor tankam dongri vattarantlean provas korunk poddlo. Ani hea vatter zaite chor astale, je tancher akromonn korunk xoktale. Titlench nhoi, ho provas kortana ghoddie Pauluchi bholaiki bori nasli. h

11, 12. Antiokachea sobha-ghorant tachea aiknnareank aikonk avoddttalem tea bhaxen Paulu koso uloilo?

¹¹ Sabathachea disa Pisidiachea Antiokant, Paulu ani Barnabas sobha-ghorant bhitor sortat. Tea ghoddnne vixim Bible-ant oxem sanglam: “Thoim sogleam mukhar Kaideanchim ani Provadeanchim Pustokam vachlim. Tea uprant sobha-ghorachea odhikareamnim Pauluk ani tachea sangateank oxem mhunnon apoile: ‘Bhavamno, lokancho dhir vaddounk tumkam kitem-i sangpachem asa zalear tankam sangat.’” (Itihas 13:15) Tor Paulu tea zomea lagim ulounk ubo ravta.

 ¹² Paulun oxem mhunnon aplem ulovop suru kelem: “Izraelitkaramno ani Devachi bhirant manun choltolea lokamno.” (Itihas 13:16) Tea disa Paulu uloitalo tea zomeant, Judev ani Judev dhorm apnnailʼle lok asle ani tannim Jezuk Mesias mhunn manun gheunk naslo. Tor Paulu tanchea lagim koso uloitolo aslo? Jehova Devan Izraelachea raxttra pasot kitem kelem tea vixim Paulu tanche lagim survatek uloilo. Izraelitkar ‘Ejipt desant videxi mhunn ravtale tednam Jehovan tankam ek bollixtt raxttr koxem kelem,’ ani tankam Ejipttantlean soddoilea uprant 40 vorsam, ‘ranvott vattarant tanche koddem koxem pasiens kaddlem,ʼ tem Paulun tankam somzailem. Toxench, Jehovan Izraelitkarank Bhasailʼlo Des tanchea tabeant korunk koso adar dilo, ani ‘to des Izraelitkarank daiz mhunn koso dilo,’ tea vixim pasun Paulu tanchea lagim uloilo. (Itihas 13:17-19) Thoddim mhunnttat, ki Paulu tea Sabathachea disa zalʼlea Vachpam vixim uloilʼlo. Tor hem khorem aslem zalear Paulu, ‘soglea torechea lokam pasot soglem zalo’ mhunn amkam kollon ieta.—1 Kor. 9:22.

13. Ami amchea aiknnareank avoddttolem tea toren tanche lagim koxem ulounk zata?

¹³ Ami pasun porgott kortana, Paulu bhaxen lokank avoddttolem tea toren tanche lagim ulounk zai. Udharonnak, ek munis umkeach dhormantlo mhunn amkam kollon ieta tednam, taka khoinchea vixoi-acher uloilear avoddttolem tem ami tache lagim ulounk zata. Toxench taka khobor astolim toslim Bible-antlim versam ami tache pasot vachunk zatat. Ani oxem kortana, ami tachea svotachea Bible-antlean vachlear chodd faideak poddttolem. Tor amchim aiknnarim Jehova vixim xiktolim zalear, tankam kitem avoddttolem tem ami chintunk zai ani tanche lagim ulounk veg-veglleo vatto sodhunk zai.

14. (a) Paulun Jezu vixim ulounk koxem suru kelem, ani tannem tankam kosli xittkaunni dili? (b) Pauluchem aikolea uprant lokamnim kitem kelem?

¹⁴ Uprant Paulu, Izraelache raza Jezu Kristache purvoz koxe zaunk pavle tea vixim uloilo. Toxench, Juanv Batistan “soddvonndar . . . Jezu” pasot vatt koxi toiar keli, tem-ui tannem tankam somzailem. Tea uprant Jezuk koso jivexim marlolo ani jivont kelo tem sanglem. (Itihas 13:20-37) Paulun oxem mhunnttlem: “Zannam zaiat . . . tacheach udexim tumkam patkanchem bhogsonnem mellonk xokta . . . ek munis visvas dovorta zalear Jezu udexim niropradi zaunk xokta.” Ani uprant tannem tankam hi xittkaunni dili: “Provadeanchea Pustokant boroilam tem tumchea thaim ghoddona zaunk zagrut ravat: ‘Beporva korpeamno, polloiat, ani ojap zaiat, ani nas zaiat, karonn hanv tumchea disamnim ek oxem kam kortolom, jea vixim tumkam konnem-i bariksannen sanglem zalear pasun tumi kednanch tacher visvas dovorchenant.’” Ani uprant kitem zalem tea vixim Paulun ghoddie kednanch chintunk naslem astolem. Bible amkam sangta: “Fuddlea Sabatha disa pasun ieun ulounchem mhunn lokamnim tanchea lagim vinoti keli.” Toxench tea disa sobha-ghorantlean bhair sorlea uprant, “zaite Judev ani Judev dhorm apnnailʼle lok, je Devachi bhokti kortale, te Paulu ani Barnabasa borabor gele.”—Itihas 13:38-43.

15. Fuddlea Sabathachea disa kitem zalem?

¹⁵ Fuddlea Sabathachea disa, “sumar akʼkhem xar” Paulu sangtalo tem aikonk  ektthaim zalem. Punn hem polloun thodde lok bejar zale “ani Paulu xikoitalo teo vostu khotteo mhunn dakhoun diunk vad-vivad korunk lagle.” Punn Paulun ani Barnabasan tankam dhiran oxem sanglem: “Devachem utor poilem tumkam Judevank sangop gorjechem aslem. Punn tumi tem nakartat ani tumi sasnachea jivitak purte nant mhunn dakhoun ditat dekhun, polloiat! ami dusrea raxttram lagim voitat. Jehovan amkam hi adnea dilea: ‘Prithumechea konnxea meren soddvonnecho sondex porgott korchea khatir hanvem tumkam raxttram pasot ek uzvadd koso nemla.’”—Itihas 13:44-47; Iz. 49:6.

16. Paulu ani Barnabasachim utram aikolea uprant Judevamnim kitem kelem, ani tankam xarantlean dhanvddailea uprant Paulun ani Barnabasan kitem kelem?

¹⁶ Thoddeach vella bhitor, zaite lok Jehovachem utor aikonk pavle. Hem aikona fuddem videxi lok khub khuxal zale ani “sasnachem jivit favo aslolea sogleamnim bhavarth dovorlo.” (Itihas 13:48) Punn Judev lok khuxal zaunk nant. Tor Paulun ani Barnabasan tankam sanglem, ki Mesiasa vixim bori khobor mellonk te poile asle. Punn tannim taka nakarlo. Ani heach pasot, Jehova hea fuddem tanchi bhokti manun gheuncho naslo. Tea uprant, Judevamnim famad bailank ani mukhel dadleank, ‘Pauluk ani Barnabasak dhumallo diunk ani tankam xarantlean bhair dhanvddaunkʼ uksaile. Tednam Paulun ani Barnabasan kitem kelem? “Tannim aplea paim-anchi dhulʼl fafddun uddoili ani te Ikoniumak gele.” Tor Pisidiachea Antiokant Kristi dhorm kabar zalo kai? Na! Karonn thoim aslole xis “khuxalkaien ani povitr xokten bhorot gele.”—Itihas 13:50-52.

17-19. Ami Paulu ani Barnabasachi dekh koxi gheunk zata, ani oxem kelear ami khuxal kiteak astolim?

¹⁷ Pauluk ani Barnabasak xarantlean bhair ghatle tednam jem ghoddlem tantuntlean ami kitem xikonk zata? Bible sangta: “Tannim aplea paim-anchi dhulʼl fafddun uddoili.” Punn te lokancher ragar asle mhunn tannim oxem korunk na. Tachea bodlek, Jehovan dilʼlem kam tannim kelʼlem ani atam tea lokanchem kitem-i zalear pasun te zobabdar nant mhunn te dakhoun diunk sodhtale. Paulu ani Barnabasak kollon ailem, ki Jezucher bhavarth dovrunk te lokancher dobhav ghalunk xokonasle, punn te porgottnni korit ravonk xoktale. Ani heach pasot te Ikoniumak gele.

¹⁸ Tor atam Antiokantle xis Paulu ani Barnabasa sangata nhoi, punn tankam dhumallo ditat toslea lokam modem asle. Tori astana, zaitea lokamnim bori khobor aikoli zalearuch te khuxal astole oxem naslem. Karonn Jezun mhunnttlolem: “Devachem utor aikotat ani tea pormonnem choltat tim khuxal!” (Lukas 11:28) Tor Antiokantlea bhav-bhoinnamnim Jezuchi adnea pallunk ghott nichov kelʼlo.

¹⁹ Paulu ani Barnabasa bhaxen, bori khobor porgott korpachi amchi zobabdari mhunn ami sodanch ugddas dovrunk zai. Punn lok ti aikon ghetolo vo na tem ami tancher soddunk zai. Lokank sot aikonk khuxi na zalear, ami poilea xekddeantlea Kristanvanchi dekh gheunk zata. Amkam dhumallo ailo zalear pasun, bori khobor kitli valorachi tem chintun ami khuxal ravonk zai ani povitr xokte udexim Dev amkam dita tem margdorxon apnnaunk zai.—Gal. 5:18, 22.