1-3. (a) Apostl Paulu, Athenant pavlea uprant bejar kiteak zalo? (b) Pauluchi dekh gheun ami kitem xiktolim?

 PAULU, Grisantlea Athen xarant pavla, zoim Socrates, Plato ani Aristotle, totv-gineani eka vellar lokank xikoitale. Athenantle lok ekdom bhoktivont asle. Te zaitea devanchi bhokti kortale dekhun, voita thoim murteo asleo. Zoxeo mondirant, mukhel xarant, ani toxench rosteanchea kuxik. Hem soglem polloun Paulu ekdom bejar zalo. Karonn khoro Dev Jehova, murte vixim kitem chintʼta tem taka khobor asa. (Sutt. 20:4, 5) Ani apostl Paulu pasun murteancho khub dves korta!

² To bazarant pavta tednam sarkoch thottakta. Karonn mukhel darvonttea lagim eka-fattlean-ek, Hermes devacheo zaiteo burxeo murteo dovorleat. Ani bazarant zaitea khotte bhokteche zage asat. Tor hea murten bhorlolea zagear, Paulu lokank koso porgott kortolo? To xantponnim ani dusreank resped dakhoun lokanchea ani tachea modem jem ek-sarkem asa tea vixim uloitolo kai? Ani lokamnim khorea Devak sodhun tachi bhokti korunk to tankam modot korunk pavtolo kai?

³ Itihas 17:22-31-ant, Paulu khub xikop aslolea Athenantlea lokam lagim uloilo mhunn amkam vachunk melltta. To tanche lagim khatren, xanneponnan ani somjikaien uloilo. Tor Pauluchi dekh gheun, amchea ani lokam modem jem ek-sarkem asa tem monant dovrun, ami amchea aiknnareank koxi modot korunk zata tem ami xiktolim.

4, 5. Paulun Athenant khoim porgottnni keli, ani tannem koslea torechea lokank porgottnni keli?

⁴ Sumar 50 K.X.-ant, Paulu aplea dusrea mixinori bhonvdde vellar, Athenant ieta. a Silas ani Timot, Bereia thaun thoim pavta mhunnosor tache sonvoim-e pormonnem, Paulu ‘sobha-ghorant aslolea Judevank xikounk lagta.’ Toxench, to “Bazarant” porgottnni korunk voita, zoim Athenantle Judev naslole lok asle. Athenacho bazar ekdom vhoddlo aslo, zo Akropolis  mhunnttat tea dongra laginch aslo. (Itihas 17:17) Hanga fokot veapar-dhondoch zainaslo, punn ho zaitea zannancho mellon ieupacho ekdom mhotvacho zago aslo. Hea vixim ek pustok sangta, ki hea zagear veapar-dhondo korpi, rajki fuddari, totv-gineani ani boroupi mellon ietale. Athenantlea lokank hea toren mellon ieun mhotvachea vixoi-ancher ulounk borem distalem.

⁵ Punn bazarant aslolea hea lokank porgottnni korop Pauluk sompem zaunchem naslem. Karonn tachea aiknnaream modem, Epikuri ani Istoiki totv-gineani asle, zanchi patienni sarkich veglli asli. b Epikuri totv-gineani mantale, ki jivit apxinch suru zalam. Tanchi patienni oxi asli: “Devachi bhirant dhorchi goroz na. Melea uprant koslench dukh zaina. Ami borem melloun gheunk zata, vaitt sosunk zata.” Toxench, ginean melloun ghevop ani tachi somzonni asop ekdom mhotvachem mhunn Istoiki totv-gineani mantale. Devak bhavnam asat mhunn te maninasle. Tea bhair, Epikuri ani Istoiki totv-gineani, Jezuche xis xikoitale ti jivontponnachi xikounn maninasle. Tor Paulu xikoitalo ti Kristanvanchi xikounn, ani Epikuri ani Istoiki totv-gineani je mantale tem sarkench vegllem aslem.

6, 7. Pauluchi xikounn aikon, Grik totv-gineani kitem mhunnonk lagle, ani aizui lok Jehovachea Sakxeam vixim kitem mhunnttat?

⁶ Pauluchi xikounn aikon hea Grik totv-gineani munxamnim kitem kelem? Tannim Pauluk ek ‘boddbodd korpi’ oxem mhunnttlem. Hea utracho Grik bhaxen orth, “bi punzaupi” oso-i zata. (Itihas 17:18-cher aslolo study note nwtsty-E polloiat.) Hea Grik utra vixim eka zannaran oxem mhunnttlem: “Hem utor survatek, eka suknneak lagu kortale, jem sogleak bhonvon jevnnacheo konnio punzaitalem. Tea uprant, hem utor oslea munxak lagu kelem, zo bazarant bhonvon jevonn ani her vostu punzaitalo. Punn uprant hem utor oslea-i munxak lagu kelem, zo dusream koddlean veg-veglle torechi mahiti aikotalo punn ti somzonk xokonaslo.” Tor Paulu piso ani to dusream koddlean aikolʼlem, tench-tench sangtalo oxem te totv-gineani mhunnttale. Tori astana, Paulu niraxi zaunk na.

⁷ Aizui toxench zata. Ami Jehovachim Sakxi Bible-acher patietat mhunn lok amkam naka zalʼlim nanvam ditat. Udharonnak, thodde xikoitat ki vikasvadachi xikounn sarki zaun asa. Ani jim xannim asat, tannim hi xikounn manun gheunk zai. Hi xikounn manun ghenant tim, pixim oxem te chintʼtat. Ani ami ek Rochnnar asa ani tannem soglem rochlam mhunn Bible-antleant xikoitat ani purave ditat tednam, lokamnim ami pixim mhunn chintlolem tankam zai. Punn ami niraxi zainant. Tachea bodlek, Jehova Dev, Rochnnar zaun asa ani tannench hem soglem rochlam mhunn ami dhiran dusreank sangtat.​—Prok. 4:11.

8. (a) Thodde lok Pauluchi xikounn aikon kitem mhunnonk lagle? (b) Pauluk vhelʼlo to Areopagus ghoddie kitem aslo? (Pan 142-acher aslolo futtnott polloiat.)

⁸ Bazarantlo her lok Pauluchi xikounn aikon oxem mhunnonk lagle: “Ho amkam khoinchea tori porkea deva vixim porgott korta.” (Itihas 17:18) Tor Paulu Athenantlea lokank Khorea Devachi xikounn ditalo zalear, tacho jiv dhokeant aslo. Karonn tea xarant zaitea vorsam adim totv-gineani, Socrates, novea devachi xikounn dita mhunn tacher arop ghatlolo ani tea pasot tacher mornnachem formonn marlolem. Dekhun Athenantle lok Pauluk Areopagus zagear gheun gele ani tankam porki  distali ti xikounn thoim somzaunk sanglem. c Tor Devachea Utrachi xikounn naslolea hea lokank, Paulu koso porgott kortolo aslo?

9-11. (a) Paulu Athenantlea lokam lagim kitea vixim uloilo? (b) Porgottnnent ami Pauluchi dekh koxi gheunk zata?

⁹ Athenant choltali ti murti-puza polloun Paulu khub bejar zalo mhunn ugddas korat. Tori astana murti-puza korop sarkem nhoi mhunn tannem tankam sangonk na. Tachea bodlek, to xant ravlo ani tachea aiknnareanchim bhavnam dukhoinastana, aplea ani tanchea modem kitem ek-sarkem asa tem monant dovrun, tannem aplem ulovop suru kelem. Tannem mhunnttlem: “Athenachea lokamno, tumi soglea vattamnim dusream poros chodd devanchi bhokti kortat mhunn hanv polloitam.” (Itihas 17:22) Tor dusrea utramnim, ‘tumi ekdom bhoktivont munxam mhunn ami polloilam’ oxem Paulu tankam mhunnttalo. Tor tim bhoktivont aslim dekhun Paulun tankam xabaski dili ani oxem korun tannem xanneponn dakhoilem. Karonn khotti bhokti kortat te thodde lok fosleat ani te khaltea kallzache asat  ani sot zannam zaunk sodhtat mhunn Paulu zannam aslo. Toxench, eka vellar tannim “soglem nokllo astana ani bhavarth naslo dekhun kelem” mhunn tannem vollkhon ghetlem.​—1 Tim. 1:13.

¹⁰ Uprant, Paulun Athenant kitem polloilem tea vixim to sangta, jea vorvim te khub bhoktivont lok asle mhunn taka kollon ailem. Tannem thoim “Onvollkhi Deva pasot,” asloli ek vedi polloili. Eka pustoka pormonnem, Grik ani dusro lok zaite pavtti ‘onvollkhi devam’ pasot vedi bandtale. Karonn, te vollkhonant toslo ek dev asa zalear, ani te tachi bhokti korinant zalear to tancher ragar zatolo mhunn te bhietale. Tor hantuntlean, ek onvollkhi Dev asa hem te manun ghetale mhunn dison ieta. Tor Paulun, hea vedi vixim sangon tankam bori khobor porgott keli. Tannem tankam mhunnttlem: “Jea Devachi tumi khobor nastana bhokti kortat, teach Deva vixim hanv tumkam sangtam.” (Itihas 17:23) Tor hea toren Paulu xanneponnan ani dhiran uloilo. Thoddeamnim tacher arop ghatlolo toso to eka novea vo porkea deva vixim porgott korinaslo. Tachea bodlek, to tankam khoro Dev, Jehova vixim porgott kortalo, zo tankam onvollkhi aslo.

¹¹ Porgottnni kortana, ami Pauluchi dekh koxi gheunk zata? Porgottnnent ek munis bhoktivont asa mhunn dakhoun dita toxem tannem kitem tori ghatlam vo tachea ghorant vo ghora fuddlean asa kai mhunn ami dhean diunk zai. Ami ghoddie oxem mhunnon amchem ulovop suru korunk zata: ‘Tum ek bhoktivont munis mhunn dison ieta. Ani mhaka tujeach sarkea munxa lagim ulounk zai aslem.’ Tor hea toren tea munxachi patienni kitem asa tem amkam kollon ieta tednam, chodd korun amchea modem ani tanchea modem kitem ek-sarkem asa tem ami zannam zaunk pavtolim ani tacher ulounk pavtolim. Punn tachi patienni kitem asa tem zannam zalea uprant, tim sotant ieunchimnant mhunn ami kednanch chintunk zaina. Karonn, amchea zaitea bhav-bhoinnank, sotant ieunchea poilim, hea khottea xikounnecher ghott bhavarth aslo mhunn ami ugddas dovrunk zai.

12. Paulun aplea aiknnareank motint dovrun aplea ulovpant bodol koso kelo?

¹² Paulu survatek aplea ani aplea aiknnaream modem kitem ek-sarkem asa tea vixim uloilʼlo. Punn atam tankam porgott kortana to oxem korit ravonk pavtolo kai? Tache aiknnare Grik totv-gineani munxam koddlean xiklole ani tankam Devachea Utrachi mahiti nasli mhunn Paulu zannam aslo. Tor tannem aplea porgott korpachea ritin thoddo bodol kelo. Poilem mhunnttlear, Devachea Utrantlean vachinastana, tannem tankam tantuntlim thoddim sotam sanglim. Dusrem, to aplea aiknnaream bhaxenuch asa ani tanchim bhavnam somzota mhunn dakhounk, tannem thodde pavtti “amchea” ani “ami” oxim utram uzar kelim. Tisrem, to xikoitalo tem tanchea boroupamnim asa mhunn dakhounk tannem Grik bhaxen aslolea pustokancho ulʼlekh kelo. Tor Paulu kitem uloilo ani onvollkhi Deva vixim tannem Athenantlea lokank koslim sotam sanglim, tem ami atam polloitolim.

13. Vixvachea survate vixim Paulun kitem somzailem, ani tannem spoxtt toren kitem dakhoun dilem?

¹³ Devan ho akʼkho vixv rochla: Apostl Paulun mhunnttlem: “Jea Devan akʼkho sonvsar ani tantunt asat teo vostu rochleo, zo sorgacho ani prithumecho Dhoni  zaun asa, to munxamnim bandlolea mondirant ravona.” d (Itihas 17:24) Tor ho akʼkho vixv apxinch ieunk na. Punn khorea Devan, zo Rochnnar zaun asa, tannem heo sogleo vostu rochleo. To, sorg ani prithumecho Sorvxoktivont Dhoni zaun asa. (St. 146:6) Ani munxamnim bandlolea mondirant ravonk xokona. Taka Athenantlea vo dusrea devam bhaxen mhoima mellonk vedi vo mondirachi goroz na. (1 Raz. 8:27) Tor Paulun tankam spoxtt toren dakhoun dilem, ki khoro Dev ekdom vorto asa ani to munxamnim bandlolea mondirant, khoincheach murteamnim asonkuch xokona.​—Iz. 40:18-26.

14. Devak munxanchi goroz na mhunn Paulun koxem dakhoun dilem?

¹⁴ Devak munxanchi goroz asa oxem nhoi. Murti-puza kortale te lok tanchea murteank sobit kopdde, mharog-mharog dennim, jevonn ani toxench pieunk ditale. Ani murteank hea soglea vostunchi goroz asa, oxem tankam distalem. Punn Pauluchea aiknnaream modem thodde Grik totv-gineani asle, je mantale ki eka devak munxam koddlean hea soglea vostunchi goroz na. Toxem zalear, Paulun jednam mhunnttlem, ki Dev “munxanchea hatamnim apli seva korun ghena,” tednam tannim hem manun ghetlem astolem. Khorench, Rochnnarak, munxam koddlean “kosleach vostunchi goroz na.” Punn tannem amkam “jivit, svas ani sogleo vostu” dileat. Toxench, suria, pavs ani folladik zomin dilea. (Itihas 17:25; Ut. 2:7) Tor munxank Devachi goroz asa, Devak munxanchi nhoi.

15. Grik naslolea lokam poros apunn vorte mhunn chintʼtale tea Athenantlea lokam lagim Paulu koso uloilo, ani tachea thaun ami kitem xiktat?

¹⁵ Devan munxank rochlim. Athenantle lok mantale ki te Grik naslolea lokam poros vorte asle. Punn Bible amkam xikoita toxem, amchea raxttrak, vo kullak lagon ami vhoddponn korunk zaina. (D.S. 10:17) Tor aplea aiknnareank dukhoinastana, Paulun xanneponnan tankam hea vixoi-acher aslolem sot kolloilem. Tannem mhunnttlem: ‘Devan ekach munxa udexim soglim  raxttram toiar kelim.’ (Itihas 17:26) Pauluchim him utram aikon, tachim aiknnarim chintunk poddlim astolim. Hea vellar, Paulu Adanva vixim uloitalo, zachea udexim soglim munxam aileant. (Ut. 1:26-28) Tor sogleam munxank ekuch Bapui asa zalear ek umkench raxttr vo kull dusrea poros vortem zaina. Tor Paulu sangonk sodhtalo tem tachea aiknnareank kollon ailem. Tor hantuntlean ami kitem xiktat? Ami porgottnni kortat tednam, ami amchea aiknnareank dukhounk sodhinant tem khorem, punn teach vellar ami tankam Bible-antlem sot somzaitat tednam, tannim tem manun gheunk zai mhunn ami tantunt bodol korinant.

16. Munxam pasot Devacho udʼdhex kitem asa?

¹⁶ Munxamnim aplea lagim ghott ixttagot kelʼli Devak zai. Pauluchea aiknnaream modem thodde totv-gineani asle, zannim munxancho udʼdhex kitem mhunn zaito temp bhasabhas kelʼli astoli. Punn Devan munxank kiteak rochleant tachem karonn tankam khobor nasli ani te hem somzaunk xokonasle. Punn munxam pasot Devacho udʼdhex kitem, tem Paulun aplea aiknnareank somzailem. Tannem sanglem: “Lokamnim taka sodhcho ani sanspun-sanspun xevottak to tankam mellcho. Khorem mhunnttlear, Dev amchea modlea konna thaunuch pois na.” (Itihas 17:27) Zo Dev Athenantlea lokank onvollkhi aslo tachi tannim vollokh gheunk zaina oxem naslem. Karonn jim konn Devak sodhtat ani tache vixim zannam zaunk proitn kortat, tanchea thaun to pois na mhunn Bible sangta. (St. 145:18) Dhean diat, ki Paulun hanga “amchea” hem utor uzar kelam. Tor Paulu dakhoun diunk sodhtalo, ki tachea aiknnaream modem tovui asa, zannim Devak ‘sanspun-sanspun sodhchi’ goroz asa.

17, 18. Munxancho Deva lagim ek lagxilʼlo sombond aschi kiteak goroz asa, ani Paulu jea toren aplea aiknnaream lagim uloilo tantuntlean ami kitem xiktat?

¹⁷ Deva sangata munxancho ek lagxilʼlo sombond aschi goroz asa mhunn tannim  vollkhon gheunk zai. Paulun tachea aiknnareank sanglem, Devak lagon “ami jivim asat, choltat-bhonvtat ani ostitvant asat.” Thodde zannar sangtat ki hea vellar Paulun, Epimenides nanvachea eka Kretachea, kovichim utram uzar kelim, zo zaitea vorsam adim jielʼlo ani Athenache lok taka khub man ditale. Toxench, munxancho Deva lagim ek lagxilʼlo sombond asop kiteak gorjecho, tea vixim Paulun tankam anik ek karonn diun oxem mhunnttlem: “Tumchea modlea thoddea kovimnim mhunnttlam, ‘Ami tachinch bhurgim.” (Itihas 17:28) Tor Dev poilea munxacho Bapui aslo ani tea munxa thaun akʼkhem munxakull ailem. Ani hea pasot munxamnim Devak lagim sorchi goroz asa mhunn Paulun tankam dakhoun dilem. Tea bhair, tachea aiknnareamnim tachem aikon gheunk, Paulun xanneponnan Grik boroupam thaun ulʼlekh kelo. e Ani hea pasot chodd korun tachea aiknnareamnim tachem aikolem astolem. Ami pasun dusreank xikoitana, Pauluchi dekh gheun itihasa vixim aslolim pustokam, encyclopedia vo lok manun ghetat tim her pustokam favo titlim uzar korunk zatat. Udharonnak, sakxi naslolea lagim ami uloitat tednam, zaitea lokank jea pustoka vixim khobor asa tem uzar korun, khottea xikounnechi survat koxi zali tem tankam sangonk zata.

¹⁸ Atam meren ami polloilem toxem, Paulun aplea aiknnareank monant dovrun, Deva vixim mhotvachim sotam sanglim. Punn hem sanglea uprant, Athenantlea aiknnareamnim kitem kelʼlem Pauluk zai aslem? Hea vixim to tankam rokddoch fuddem sangta.

19, 20. (a) Munxamnim kelʼlea murteanchi puza Devak manvona mhunn Paulun aplea aiknnareank dukhoinastana koxem sanglem? (b) Pauluchea aiknnareamnim kitem korunk zai aslem?

¹⁹ Tor Paulun hea vellar anik ek pavtti Grik pustokantlim utram uzar korun oxem mhunnttlem: “Ami Devachim bhurgim dekhun Dev bhangar, chandi ani fatra sarko asa vo munis apunn chintʼta toso ani apli kola uzar korun ghoddtta toslea vostum sarko asa mhunn ami chintunk zaina.” (Itihas 17:29) Devan munxank rochleant, tor munxamnim murteo korun tankam Dev koso mhunnonk zata? (St. 115:4-8; Iz. 44:9-20) Hea toren tankam dukhoinastana, Devak murti-puza manvona mhunn Paulun sanglem. Ani “ami chintunk zaina,” oxem mhunnon, Paulun aplea aiknnareank to solʼlo manun gheunk sompem kelem.

²⁰ Aplea aiknnareamnim kitem korunk zai tem apostl Paulun spoxttponnim sanglem. Tannem mhunnttlem: “Lokamnim nokllo zaun oxem kelem tea kallacher [jednam murti puza kortat tim Devak manvotat mhunn lok chintʼtalo tednam] Devan dhean diunk na tem khorem. Punn atam sogleam lokamnim poschatap korcho mhunn to sogleak porgott korta.” (Itihas 17:30) Tannim poschatap korunk zai, hem aikon thoddim zannam thottaklim astolim. Punn Paulun dhiran sanglolim him utram dakhoun ditat, ki Devan munxank jivit dilam ani jea toren tim aplem jivit jietat, tacho tannim Devak hixob diunk poddttolo. Tor tannim Devak sodhunk, tache vixim sot xikonk aplem jivit Devak zai toxem jieunk zai aslem. Tor murti-puza  Deva add patok zaun asa ani tannim tem bond korunk zai mhunn Athenantlea lokamnim manun gheunk zai aslem.

21, 22. Paulun xevottak kitem ojapachem sanglem, ani tim utram aiz amkam koxim lagu zatat?

²¹ Paulun xevottak him khatrechim utram mhunnttlim: “Sotan akʼkhea sonvsaracho neai korunk [Devan] ek dis tharaila. Ani tea pasot tannem eka munxak nemla. Ani soglea munxank hea vixim khatri diunk lagon Devan tea munxak melʼleantlo jivont kela.” (Itihas 17:31) Dev neai kortolo to dis ieuncho asa hem zannam zaun Pauluchea aiknnareank Devak sodhchi ani tachea vixim zannam zaunchi khub goroz asli. Punn Paulun tea neai korpeachem nanv sangonk na. Tachea bodlek, tannem tache vixim kitem tori ojapachem sanglem. Tem mhunnttlear, to ek munxa bhaxen jielo, melo ani uprant Devan taka jivont kelo!

²² Pauluchim him xevottachim utram aiz amkam koxim lagu zatat? Devan vinchun kaddlolo zhoddtti korpi, jivont zalʼlo Jezu Krist mhunn ami zannant. (Juanv 5:22) Toxench, neai korpacho dis hozar vorsam poriant astolo ani to beginuch ieuncho asa mhunn pasun ami zannant. (Prok. 20:4, 6) Punn ami bhienant, karonn hea vorvim visvaxi munxank zaitim besanvam favo zatolim mhunn amkam khatri asa. Jezu Krist jivont zalʼlo, hem sogleam-von vhoddlem vizmit zaun asa. Ani hea vizmita vorvim amkam ek boro fuddar mellttoloch mhunn amkam khatri asa.

23. Pauluchim utram aikon lok koxe toren vagonk lagle?

²³ Pauluchim him utram aikon, lok veg-veglle toren vagonk lagle. Paulun jivontponna vixim sanglem dekhun “thoddim tachim fokannam korunk lagle.” Heramnim tanchea bhaxen korunk na tem khorem, punn “ami hea vixim tujea koddlean dusrea pavtti aikotole,” oxem mhunnon te poschatap korunk toiar nasle mhunn dison ailem. (Itihas 17:32) Punn bhov “thodde munis tachea sangata gele ani tannim bhavarth dovorlo. Tanchea modem, Areopagus neai-sobhecho Dionizus nanvacho ek neai korpi, Damaris nanvachi ek bail ani tea bhair anik thodde lok asle.” (Itihas 17:34) Ami porgottnnent astat tednam, lok amchea sangata oxech toren vagtat. Thoddim amchim fokannam kortat ani thoddim amkam ulounk ditat, punn amchem aikon tanchea jivitant tim bodlav korunk toiar asonant. Punn konnui Devachea Rajeachi bori khobor aikon sotant ietat tednam ami khub khuxal zatat.

24. Areopagusant Pauluchea uloupantlean ami kitem xikonk zata?

²⁴ Lokank avoddtta tea ritin ulounk ani ami xikoitat tem sot mhunn tankam khatri mellonk amkam Pauluchea udharonnantlean zaitem xikonk melltta. Toxench, khotteo xikounneo mantat tanchea sangata pasiensan ani tankam dukhoina toxem ami koxem ulounk zata tem-ui ami Pauluchea udharonnantlean xikonk zata. Ami xiktat tem anik ek mhotvachem lisanv mhunnttlear, amchea aiknnareamnim sot manun gheunk zai mhunn ami Bible-achea sondexant bodol korinant. Khorench, ami amchea porgottnnent Pauluchi dekh ghetat tednam ami anik borim xikoupi zaunk pavtolim. Toxench, sobhent fuddakar ghetat te bhav khub bore toren xikounk pavtole. Oxe toren, lokamnim ‘Devak sodhunkʼ ani to ‘tankam mellonkʼ ami tankam anik bore ritin modot korunk pavtolim.​—Itihas 17:27.