1-4. Pedruk koslea kotthin poristhiticho fuddo korcho poddlo, ani tumi tachea zagear aslim zalear tumkam koxem bhogtolem aslem?

 LOKHONDDACHE vhoddle darvontte rakhonndar vhodd avazan bond kortat ani Pedruk don Romi soinikanchea modem hatak bandun bondkhonnint vhortat. Te taka ghalche asat tea bondkhonniche vatten gheun voitat, ani thoim taka bond korun dovortat. Fuddem kitem zatolem tem Pedruk khobor na. Taka ghoddie thoim zaitim voram vo zaite dis ravchem poddttolem. Bondkhonnicheo vontteo, daram, sanklleo ani rakhonndaram bhair taka kainch pollounk mellona.

² Uprant, Pedruk ek khobor melltta. Ti mhunnttlear, Raza Herod Agripa I, hannem taka jivexim marcho nichov kela. a Titlench nhoi, atam Herod, Pedruk Paskachea Porbe uprant lokam mukhar haddcho aslo ani lokank khuxal korunk to tacher mornnachem formonn marcho aslo. Herod Pedruk fokot dhomki dinaslo, punn taka oxem korunk podvi pasun asli. Karonn Herodan halinch Pedrucho ixtt, apostl Jakobak jivexim marun uddoilʼlo.

³ Sanjecho vell aslo. Pedru bondkhonnint astana hem chintunk poddlo astolo, ‘Faleam apleak jivexim marche asat.’ Taka ghoddie khub vorsam poilim Jezun sanglolem tem ugddasak ailem astolem. Pedruk ek dis zobordosten gheun voitole ani jivexim martole mhunn Jezun sanglolem. (Juanv 21:18, 19) Tor to vell atam ailo mhunn Pedrun chintlem astolem.

⁴ Tumi Pedruchea zagear aslim zalear, tumkam koxem bhogtolem aslem? Zaitim zannam niraxi zaunk xoktat, toxench poristhiti anik bori zaunchi na oxem tankam disonk xokta. Punn khoinchea-i poristhitint, Jezuchea khorea xisank bhorvonso asta. Dhumallo ailo tednam Pedrun ani tachea sobhentlea bhav-bhoinnamnim kitem kelem tantuntlean ami kitem xiktat tem polloum-ia.

5, 6. (a) Raza Herod Agripa I, hannem Kristi sobhecher kiteak ani koso dhumallo haddlo? (b) Jakob melo tednam sobhek itlem dukh kiteak bhoglem?

⁵ Odheai 9-ant ami polloilem toxem, Videxi aslolo Kornel ani tachi famil Kristanv zalim tednam, Kristi sobhek hi ek ekdom mhotvachi ghoddnni  zaun asli. Punn Judev Kristanvam ani Videxi Kristanvam sangata mellon Devachi bhokti kortat tem polloun her Judev thottakle.

⁶ Herod ek rajkaronnacho fuddari aslo, zo apleo naddbudhi uzar korun lokank fosoitalo. To Judevancho favor melloun gheunk sodhtalo dekhun Kristanvank dhumallo diunk laglo. Jakob, Jezucho ek ghott ixtt aslo mhunn tannem aikolʼlem astolem. Heach pasot, tannem “Juanvachea bhavak, Jakobak tolvarin marun uddoilo.” (Itihas 12:2) Hea vellar sobhek kitlem dukh boglem astolem tem chintat! Karonn Jakob tea tin apostlam modlo eklo aslo zannem Jezuchem rup bodolʼlem tednam polloilʼlem ani her apostlamnim pollounk naslolim vizmitam tannem polloilʼlim. (Mt. 17:1, 2; Marku 5:37-42) Toxench, Jakobak ani tacho bhav Juanvak khub urba asli dekhun, Jezun tankam dogainkui “Goddgoddache Put” mhunnttle. (Marku 3:17) Tor sobhentlo ek dhirvont, visvaxi sakxi ani mogall apostl na zalo.

7, 8. Pedruk bondkhonnint ghatlo tednam sobhentlea bhav-bhoinnamnim kitem kelem?

⁷ Herod Agripan chintlolem toxench zalem. Jakobak jivexim marlo dekhun Judev lok khuxal zale. Tor Herod Pedrukui marun uddounk sodhtalo. Ani ami hea odheai-achea survatek polloilem toxem, Herodan taka bondkhonnint ghatlo. Punn Herod ghoddie zannam aslo ki adim vizmit zaun apostl bondkhonnintlean bhair suttlole, zoxem ami hea prokaxonachea odheai 5-ant polloilem. Taka lagon, tannem Pedruchea donui hatak sanklleo bandun, donui vattamnim aslolea soinikanchea hatak bandunk hukum dilo. Thodde rakhonndar ratche ani thodde disache pahro kortale. Sogle mellon 16 zann asle. Tor apostlak bhair soronk kainch vatt nasli. Ani to bhair sorlolo zalear taka xikxa mellchi asli ti rakhonndarank mellonk xoktali. Hea kotthin poristhitint Pedruk modot korunk her Kristanvamnim kitem kelem?

⁸ Hea vellar kitem korunk zai tem sobhentlim bhav-bhoinnam sarkim zannam aslim. Itihas 12:5 sangta: “Pedru bondkhonnint aslo tednam, sobha tachea  pasot kallzant thaun magnnem korit asli.” Tannim aplea mogall bhava pasot kallzantlean magnnem kelem. Jakob mela mhunn tannim aplo bhavarth oskot zaunk diunk na vo magnnem korun kainch faido na oxem chintunk na. Hantuntlean aiz khorim Kristanvam kitem xiktat? Amchim magnnim Jehova Devak khub moladik zaun asat. Ani ami tache khuxe pormonnem magnnem kortat zalear to amchea magnneank zobab ditolo.—Heb. 13:18, 19; Jak. 5:16.

9. Bhav-bhoinnamnim Pedru pasot magnnem kelem tantuntlean ami kitem xikonk zata?

⁹ Tumi oslea bhav-bhoinnam pasot magnnem kortat kai, zankam dhumallo, bondi ani odruxttancho fuddo korcho poddtta? Toxench, amkam sompeponnim dixtti poddonant toslea oddchonneam vixim, zoxem, famili thaun virodh, niraxiponn vo bhavarthak lagon her oddchonneo ietat toslea bhav-bhoinnam pasot tumi magnnem kortat kai? Ami khoinchea bhav-bhoinnam pasot magnnem kortolim tea vixim thoddo vell niall korunk zata. Oxem ami kortat tednam, ‘prarthon Aikopi’ Dev, Jehova lagim ami tea bhav-bhoinnanchim nanvam gheun magnnem korunk xoktolim. (St. 65:2) Karonn tumi koslea-i oddchonneancho fuddo kortat tednam, bhav-bhoinnamnim tumchea pasot magnnem kelʼlem tumkam-i zai nhoi!

10, 11. Jehovachea dutan Pedruk bondkhonnintlean koso soddoilo tem somzaiat.

¹⁰ Herod apleak kitem kortolo tea vixim Pedruk usko zalo kai? Amkam khobor na. Punn Pedru bondkhonnint aslo te nimanne rati, to khub zagrut aslolea don rakhonndaram modem sust nhidlolo aslo mhunn Bible-ant amkam sanglam. Pedruk Jehovacher itlo ghott bhavarth aslo, ki faleam taka moronk poddlo zalear pasun, Jehova taka inam ditolo mhunn to zannam aslo. (Rom. 14:7, 8) Punn uprant kitem zalem tea vixim Pedrun ghoddie kednanch chintunk naslem.  Okosmat bondkhonnicho rum uzvaddan bhorta, Jehovacho dut thoim ieun ubo ravta ani Pedruk utthoita. Punn hem chodd korun bondkhonnichea rakhonndarank disona. Uprant, Pedruchea hatak bandloleo ekdom ghott sanklleo tuntton poddttat!

¹¹ Magir devdut Pedruk thoddeo suchounneo dita. Devdut Pedruk sangta: “Begin utth! . . . Toiar zav ani tujim zotim ghal . . . Tuje kopdde ghal.” Ani Pedru tosoch korta. Uprant devdut taka sangta: “Mhojea fattlean ieo.” Ani Pedru tachea fattlean vochot ravta. Te bondkhonnintlean bhair sortat. Bondkhonnichi rakhonn kortale tea rakhonndaram modem cholon te eka vhodd lokhonddachea darvonttea lagim pavtat. Hea darvontteantlean te bhair koxe sortole mhunn Pedrun chintlem astolem. Punn te thoim pavle tednam to darvontto “tanchea pasot apxinch ugoddlo.” Tor te rokddech thoim thaun bhair sorle ani eka rostear pavle. Uprant to devdut thoinchean nanch zalo. Tea vellar ghoddlem tem ek dorxon naslem mhunn Pedru somzolo. To khorench bondkhonnintlean suttlolo!—Itihas 12:7-11.

12. Jehovan Pedruk jea ritin soddoilo tacher niall kelolean amkam dhir koso melltta?

¹² Jehova aplea sevokank salvar korunk xokta hem zannam zaun amkam kitli bhuzvonn melltta nhoi! Chintat, Pedru oslea razachea khala koidi aslo, zaka sogleam-von bollixtt sorkara thaun tenko aslo. Tori astana, ho raza Pedruk kainch korunk xoklona. Ani koslich bhirant nastana Pedru bondkhonnintlean bhair soron gelo. Punn Jehova aplea dor-eka sevokak vizmit korun salvar korina. Udharonnak, tannem apostl Jakobak mornnantlean salvar korunk na. Toxench Jezun sanglolea pormonnem, uprant Pedruk moronn favo zalem tednam Jehovan taka salvar korunk na. Tor aiz Jehova amkam vizmit korun salvar kortolo mhunn ami opekxa korinant. Tori astana, Jehova bodlonk na mhunn ami zannant. (Mal. 3:6) Moron geleant tim, eka bondkhonnint aslolea porim asat, zoim thaun suttka mellop khub kotthin zaun asa. Punn beginuch oslo vell ieuncho asa, jednam Jehova aplea Puta udexim, moron gelʼlea lakʼkhamnim lokank jivont kortolo. (Juanv 5:28, 29) Tor aiz ami koslea-i oddchonneancho fuddo kortat tednam, Bible-antlea oslea bhasaunneam udexim amkam dhir melltta.

13-15. (a) Pedru, Mariechea ghora ailo tednam sobhentlea bhav-bhoinnamnim kitem kelem? (b) Itihas pustokant fuddem kitea vixim sanglolem asa, ani Pedru aplea Kristi bhav-bhoinnam pasot kitem korit ravlo?

¹³ Pedru eka kallokh aslolea rostear ubo aslo ani khoinchean voichem kai mhunn chintʼtalo. Uprant taka laginch ravtolea, Marie nanvache eke Kristi bailecho ugddas ailo. Ti chodd korun ek vidva asli ani girest asli. Tichem ek vhoddlem ghor aslem, zoim sobha mellon ietali. Ti Juanv Markuchi avoi asli. Hea munxa vixim Itihas pustokant poile pavtti sanglam, ani to uprant Pedrucho put koso zalo. (1 Ped. 5:13) Hea rati, sobhentlim zaitim bhav-bhoinnam Mariechea ghora rat zaisor kallzantlean magnnem kortalim. Pedruk suttka mellchi mhunn tim magnnem kortalim mhunn kainch dubhav na. Punn Jehova tanchea magnneak koso zobab ditolo hem ghoddie tannim chintunk na astolem!

¹⁴ Pedru darvonttea lagim pavlo ani tannem thoinchea darar marlem. Tednam Rhoda nanvachi ek chakorn darvonttea-xim aili. Tichea nanvacho orth mhunnttlear “Gulab.” Tea tempar, Rhoda, hem Grik nanv zaitea zannank astalem. Tinnem  Pedrucho avaz aikolo, punn Pedru aila mhunn tika visvasuch zaina zalo. Tor dar uktem korchea bodlek, tinnem Pedruk bhairuch dovorlo ani khuxalkaien dhanvon bhitor geli. Ani Pedru aila mhunn ti sobhentlea bhav-bhoinnank sangonk lagli. Ti pixi zalea mhunn tannim mhunnttlem. Punn Pedru khorench aila mhunn ti sangot ravli. Thoddeank dislem, ki ek devdut Pedruchea nanvan tichea lagim uloilo astolo. (Itihas 12:12-15) Hea soglea vellar, Pedru darar marit aslo ani xekim tannim thoim vochon dar uktem kelem.

¹⁵ Tednam Pedruk ‘polloun tim soglim ojap zalim.’ (Itihas 12:16) Tim khuxal zaun itlea mottʼttean avaz kortalim, ki aplea sovem kitem ghoddlolem tem sangonk Pedrun tankam vogi kelim. Uprant, tea vixim Jakobak ani dusrea bhavankui sang mhunn Pedrun tankam sanglem. Magir Herodache soinik taka sodhche poilim, Pedru thoinchean pollon gelo. To eka surokxit zagear gelo, zoim to visvaxiponnan Jehovachi seva korit ravlo. Hea ghoddnne uprant, Pedru vixim Itihas odheai 15-nt nimanne pavtti sanglolem asa. Hea vellar sunotichi oddchonn aili tednam, ti suttavi korunk Pedru thoim aslo. Magir Itihas pustokant choddxe pavtti, apostl Pauluchea kamam vixim ani tannem kelʼle bhonvdde vixim sanglolem asa. Punn Pedru tea vellar Mariechea ghorantlean bhair sorlo tednam, thoinchim bhav-bhoinnam khub khuxal aslim mhunn kainch dubhav na. Ani to dusrea zageancher gelo tednam thoinchea bhav-bhoinnank tannem tancho bhavarth ghott korunk modot keli astoli mhunn ami khatri dovrunk zata.

16. Amcho fuddar ekdom khuxalkaiecho astolo mhunn ami kiteak khatri dovrunk zata?

¹⁶ Thodde pavtti ami kednanch chintunk na tachea poros chodd Jehova amkam dita. Hem polloun ami amchea utramnim sangonk zaina titli khuxalkai amkam melltta. Toxench tea rati, Pedruchea Kristi bhav-bhoinnank bhoglem. Ani aiz pasun Jehova amkam besanvamnim bhorta tednam amkam-i toxench bhogta. (Mho. 10:22) Fuddarak, prithume pasot Jehova apleo sogleo bhasaunneo purnn kortolo tem ami polloitolim tednam amchea khuxalkaiek xim-mer aschi na. Him besanvam ami chintlolea poros ekdom borim astolim. Tor tim amkam mellttolim zalear, ami Jehovak sodanch visvaxi ravop gorjechem.

17, 18. Lok voilea-voir Herodachi vhoddvik kiteak korunk pavle?

¹⁷ Pedru bondkhonnintlean bhair soron gelo, hem Herodak kollʼllea uprant to ojap zalo ani taka khub rag ailo. Dekhun tannem rokddench Pedruk sodhunk, tea rakhonndaranchi choukoxi korunk ani tankam “xikxa diunk” hukum dilo. (Itihas 12:19) Tem mhunnttlear, chodd korun tannem tankam jivexim marunk laile. Herod Agripa, doia-maia naslolo ek munis aslo. Tor hea krur munxak kednam-i tori xikxa favo zatoli asli kai?

¹⁸ Pedruk jivexim marunk Herodak ies mellonk na dekhun taka loz zali. Punn rokddench taka oxem kitem tori korunk sondhi mellʼlli, jea vorvim taka porot gorv bhoglo. Tem mhunnttlear, tache dusman tache lagim xanti korunk sodhtale dekhun te taka mellonk aile tednam, zaitea lokam hujir ek bhaxonn diunk raza Herodak sondhi mellʼlli. Lukasan boroilem, ki hem bhaxonn diunchea poilim, Herod “razache kopdde ghalun” lokam mukhar ailo. Tachea hea kopddeam vixim Judev  Itihaskar Josephus-an boroilem, ki te chandiche asle. Tor tacher uzvadd poddttalo tednam, te chokchoktale ani tachi mhoima lokank deva bhaxen distali. Tea disa hea gorvixtt rajkaronnachea fuddarean lokank ek bhaxonn dilem. Tednam thoim hajir zalʼlea zomean voilea-voir Herod razachi vhoddvik korunk vhoddlean bob marun oxem mhunnttlem: “Ho avaz munxacho nhoi, to devacho avaz!”—Itihas 12:20-22.

19, 20. (a) Jehovan Herodak kiteak xikxa dili? (b) Herodachea mornna vixim aslolea ghoddnnentlean amkam bhuzvonn kiteak melltta?

¹⁹ Herodan Devak favo asloli mhoima apnnem manun ghetli ani Dev hem polloitalo. Lok kortat tem sarkem nhoi oxem tannem tankam sangonk zai aslem. Ani tannem oxem kelʼlem zalear taka xikxa favo zaunchi nasli. Punn tannem toxem korunk na dekhun, “gorv nisonttonak pavoita,” him utram tache sovem khorim zalim. (Mho. 16:18) Hea svarthi ani gorvixtt munxak ek bhirankull moronn favo zalem. Bible sangta: “Teach vellar, Jehovachea dutan tacher ek duens dhaddlem . . . Tache kuddik kidde poddle ani to melo.” (Itihas 12:23) Hea vixim Josephus-an dakhoun dilem, ki Herodan lokam koddlean vhoddvik svikar keli dekhun taka hem moronn favo zalem mhunn tannem manun ghetlem. Toxench morchea poilim, Herodak panch dis vollvolle sosche poddle mhunn pasun Josephus-an boroilem. b

²⁰ Vaitt lok kortat tea noxttea kamank lagon, tankam xist mellona oxem amkam thodde pavtti disonk xokta. Ani haka lagon ami ojap zainant. Karonn Bible sangta: “Akʼkho sonvsar noxtteachea tabeant asa.” (1 Juanv 5:19) Punn thodde lok vaitt kortat tednam tankam xikxa mellona dekhun Devachea lokank tras zatat. Oslea vellar Herodak ghoddlolea ani tosleach her ghoddnnentlean amkam bhuzvonn melltta. Karonn Jehova neai-niticho mog korta ani to noxtteanchi nit kortolo mhunn amkam kollon ieta. (St. 33:5) Toxench, to beginuch aplea sevokank neai favo kortolo mhunn amkam khatri melltta.

21. Itihas odheai 12-ntlean amkam kitem xikonk melltta, ani tem zannam zaun amkam kiteak urba melltta?

²¹ Hea ghoddnnechea xevottak sanglolea utramnim amkam urba melltta. Tim utram mhunnttlear: “Jehovachem utor posrot gelem ani khub lokamnim bhavarth dovorlo.” (Itihas 12:24) Tor porgottnnechem kam vaddot gelem hantuntlean kollon ieta, ki aiz pasun Jehova hea kamacher besanv ghalta. Itihas odheai 12 amkam fokot eka apostlak jivexim marlo ani dusreak bondkhonni thaun bhair kaddlo, hench sangona. Punn hea odheai-ant amkam Jehova vixim sanglam. Toxench, Soitan Kristi sobha nas korunk ani porgottnnechem kam bond korunk sodhtalo tednam Jehovan tacho vavr koso fiskottaun uddoilo tem-ui sanglam. Punn, Soitanachea hea manddnneank ies mellonk na, toso aizui porgottnnechem kam bond korunk sodhtat tankam-i ies mellchona. (Iz. 54:17) Punn je konn Jehova ani Jezuchea vatten asat tankam porgottnnechea kamant sodanch ies mellttolo. Hem zannam zaun amkam kitli urba melltta nhoi! Khorench, aiz amkam “Jehovachem utor” porgottunk kitlo vhodd man asa!