Bhurgem zolmotoch eka kazari zoddpeachea jivitant khuxalkai ieta. Punn tea uprant, taka vaddounk zaito vavr mellon asa. Avoi-bapui zalʼlean, tumcho choddso vell ani takot bhurgeachi kallji gheunk voita tem polloun tumi ghoddie ojap zait. Sarki nhid zaina dekhun ani bhavnant bodol zalʼlean tumcho kazari sombond oskot zaunk xokta. Tumchea bhurgeachi kallji gheunk ani tumchem kazari jivit samballunk tumkam dogaim-kui thodde bodol korunk poddot. Oslea oddchonneancho fuddo korunk tumkam Bible-antle solʼle koxe modot kortole?

BIBLE KITEM SANGTA: “Pritimog konnachem-i kitem-i sosun ghevpi ani soglleam thaim doiall-movall.” Toxench, pritimog “kednanch aplo adav sodhina; . . . rag choddunk dina.” (1 Korintkarank 13:4, 5) Poilech pavtt avoi zalʼlean, tujem choddxem dhean tujea bhurgeacher astolem. Ani tujea ghovak tum vell dina oxem disot. Tor, tunvem taka-i vell diunk zai mhunn visronaka. Pasiens ani doiallai dakhoun tuka tujea ghovachi goroz asa mhunn dakhoi. Bhurgeachi kallji gheunk tacho-i adar ghe.

“Potimno, tumchea potinim vangdda ekamekak somzun jieiat.” (1 Pedru 3:7) Tujea bailechi choddxi takot bhurgeachi kallji gheunk voitoli mhunn somzon ghe. Ti apleo noveo zobabdareo samballttana bejear zait, thokot vo nirax zait. Ek-ek pavtt ti tujer ragar pasun zait, punn tum xant rav. Bible sangta, “zannvai kitem tem somzota to aple jibecher tabo dovrunk xokta, somjikaiecho monis aplea monachi ovostha xant dovorta.” (Mhonnʼnneo 17:27) Tichi poristhiti somzon, ghoddtta te bhaxen tika modot kor.

TUMI KITEM KORUNK ZATA:

• Bapui: Ratchea vellar pasun bhurgeachi kallji gheunk tuje bailek adar kor. Dusrea kamamnim tunvem unno vell sarunk zata. Hea udexim tum tujea bailek ani bhurgeak chodd vell diunk pavtolo

• Avoi: Tuzo ghov bhurgeak adar korunk toiar zata tednam tacho adar ghe. To ek kam sarke ritin korina zalear pasun taka kainch vaitt mhunno naka, punn tem kam koxem korchem tem taka bore bhaxen dakhoi

BIBLE KITEM SANGTA: “Tim dogam-i zonnam ekuch kudd zatat.” (Utpoti 2:24) Tumchea kuttumbant bhurgem zolmolea uprant pasun, tum ani tuzo sangati “ekuch kudd” zaun asa. Tumcho sombond ghott korunk zata titlo vavr korat.

Bailamno, tumcho ghov tumkam adar ani tenko dita dekhun tache upkar attoiat. Tumi tachi toknnai kelear, taka “pekovnni” mellʼllea sarki zatoli ani tumcho ekvott ghott zatolo. (Mhonnʼnneo 12:18) Ghovamno, tumi tumchea bailecho kitlo mog ani valor kortat tem tika sangat. Ti kuttumbachi kallji gheta dekhun tika vakhannat.—Mhonnʼnneo 31:10, 28.

“Konnench aplo faido sodum noie, punn peleacho.” (1 Korintkarank 10:24) Tumchea kazari sangatea pasot sodanch borem tench korat. Eka-meka lagim ulounk ani aikonk vell kaddat, toxench eka-mekak xabaski diat. Loingik sombonda vixim tumchoch svarth sodhinakat. Tumchea kazari sangateachea gorzancher dhean diat. Bible sangta: “Lognik hokʼkacho upeog korunk ekamekak addaum nakat.” (1 Korintkarank 7:3-5) Tor, tumi dogaimnim hea vixim ukteponnim ulounk zai. Pasiens ani somjikai dakhoilʼlean tumcho sombond ghott zatolo.

TUMI KITEM KORUNK ZATA:

• Dogaim eka-meka pasot vell kaddunk visornakat

• Lhan-lhan kamamnim tumchea sangateak mog dakhoiat. Zoxem, tumi chitt borounk zata vo ek lhanxi vost pasun diunk zata

BIBLE KITEM SANGTA: “Bhurgeponnar-thaun Povitr Pustokam tum xiklai: tim tuka zannvaien bhorunk xoktat ani . . . soddvonn zoddunk” pavoitolim. (2 Timotak 3:15) Tumchea bhurgeak tumi kitem xikoitolim tea vixim adinch toiari korat. Zolmochea poilim pasun eka bhurgeak xikonk ojapachi tank asta. Bhurgem kusveant astana pasun tuzo avaz aikonk xokta ani tum dukhi, khuxal vo ragar asa tem taka somzota. Tor tim lhan astat tednam thaun tankam vachun dakhoiat. Tumi vachtat tem tim ghoddie somzochimnant, tori astana tumi oxem kelear tim vhodd zatat tednam tankam vachunk avoddttolem.

Tumchim bhurgim kitlim-i lhan asum, tumi Deva vixim uloitat tednam tim tem aikonk xoktat. Tumi Jehova lagim magtana tankam-i aikonk diat. (Dusri Somurt 11:19) Tumi tanchea sangata khellttat tednam pasun Devache rochnne vixim uloiat. (Stotr 78:3, 4) Tumchim bhurgim vaddttat toxim, Jehova pasot tumcho mog polloun tim-ui tacho mog korunk xiktolim.

TUMI KITEM KORUNK ZATA:

• Tumchea bhurgeank vaddounk Deva lagim zannvai magat

• Tankam xikoiat ani porot-porot tem tanchea ugddasak haddat. Oxe toren, tim rokddinch xikonk pavtolim