અયૂબ ૩૯:૧-૩૦
૩૯ “શું તું જાણે છે, પહાડી બકરી ક્યારે બચ્ચાને જન્મ આપે છે?+
શું તેં ક્યારેય હરણીને બચ્ચું જણતા જોઈ છે?+
૨ તું ગણી શકતો હોય તો કહે, તેઓ બચ્ચાને કેટલા મહિના ગર્ભમાં રાખે છે?
તેઓ કયા સમયે બચ્ચું પેદા કરે છે, એ શું તું જાણે છે?
૩ તેઓ નીચે નમીને બચ્ચાને જન્મ આપે છે,પછી તેઓની પ્રસવપીડાનો અંત આવે છે.
૪ તેઓનાં બચ્ચાં ખુલ્લા મેદાનમાં ઉછરે છે અને તાજાં-માજાં થાય છે,પછી એ બચ્ચાં જતાં રહે છે અને પાછાં ફરતાં નથી.
૫ જંગલી ગધેડાને કોણે છૂટો મૂક્યો છે?+
એનાં બંધનો કોણે છોડી નાખ્યાં છે?
૬ મેં રણપ્રદેશને એનું ઘરઅને ખારાપ્રદેશને એનું રહેઠાણ બનાવ્યું છે.
૭ શહેરમાં થતા કોલાહલને એ ધિક્કારે છેઅને હાંકનારનો અવાજ એ સાંભળતો નથી.
૮ ઘાસની શોધમાં એ ટેકરીઓ ખૂંદી વળે છે,અને દરેક લીલા છોડની શોધમાં ભટકે છે.
૯ શું જંગલી સાંઢ કદી તારી સેવા કરશે?+
શું એ તારા તબેલામાં* રાત વિતાવશે?
૧૦ શું તું એને દોરડાંથી બાંધીને ખેતરમાં ચાસ પડાવી શકે?
શું ખીણ ખેડવા* એ તારી પાછળ પાછળ આવશે?
૧૧ શું તું એની પ્રચંડ તાકાત પર આધાર રાખીશ?
શું તારું ભારે કામ એને કરવા દઈશ?
૧૨ તારી ફસલ* ઘરે લાવવા શું તું એના પર ભરોસો રાખીશ?
શું એ તારું અનાજ ખળીએ* લઈ જશે?
૧૩ શાહમૃગ આનંદથી પોતાની પાંખો ફફડાવે છે,પણ બગલાની સરખામણીમાં એનાં પીછાં અને પાંખની શી વિસાત?+
૧૪ શાહમૃગ પોતાનાં ઈંડાં જમીન પર મૂકે છે,અને માટીમાં એને સેવે છે.
૧૫ એ ભૂલી જાય છે કે કોઈના પગ નીચે એ કચડાઈ જશે,અથવા કોઈ જંગલી જાનવર એને ખૂંદી નાખશે.
૧૬ પોતાનાં બચ્ચાં પારકાં હોય એમ એ કઠોરતાથી વર્તે છે;+તેઓનો ઉછેર નકામો જશે એવી એને કંઈ પડી નથી,
૧૭ કેમ કે ઈશ્વરે એને બુદ્ધિ આપી નથી,*અને સમજણ એનાથી દૂર રાખી છે.
૧૮ પણ જ્યારે એ પોતાની પાંખો ફફડાવીને દોડે છે,ત્યારે એ ઘોડા અને એના સવાર પર હસે છે.
૧૯ શું તું ઘોડાને બળ આપે છે?+
શું તું એની ગરદનને ફરફરતી કેશવાળીથી ઢાંકે છે?
૨૦ શું તેં એને તીડની જેમ કૂદકો મારવાનું શીખવ્યું છે?
એના નાકના સુસવાટાનો અવાજ તો ભયંકર છે.+
૨૧ એ ખીણમાં પગ પછાડે છે અને જોશભેર કૂદે છે;+એ રણભૂમિમાં* ધસી જાય છે.+
૨૨ એ ડરની સામે હસે છે અને કશાથી બીતો નથી.+
એ તલવાર જોઈને પીછેહઠ કરતો નથી.
૨૩ એની એક બાજુએ બાણથી ભરેલો ભાથો ખખડે છે,ભાલો અને બરછી ચમકે છે.
૨૪ અધીરો બનીને જુસ્સામાં એ પૂરઝડપે અંતર કાપે છે,*રણશિંગડું વાગે ત્યારે એને રોકવો મુશ્કેલ બને છે.*
૨૫ રણશિંગડું ફૂંકાય ત્યારે એ કહે છે, ‘વાહ!’
દૂરથી જ એને લડાઈની ખૂશબૂ આવે છે,યુદ્ધનો લલકાર અને સેનાપતિઓની બૂમો સંભળાય છે.+
૨૬ શું બાજ પક્ષી તારી સમજણથી ઊંચે ઊડે છેઅને પોતાની પાંખો દક્ષિણ તરફ ફેલાવે છે?
૨૭ શું ગરુડ તારા હુકમથી આકાશમાં ઊંચે ઊડે છે+અને પોતાનો માળો ઊંચાઈ પર બાંધે છે?+
૨૮ શું એ તારી આજ્ઞાથી ઊંચી ભેખડો પર રાત વિતાવે છેઅને પહાડોની ટોચને પોતાનો ગઢ બનાવે છે?
૨૯ ત્યાંથી એ પોતાનો ખોરાક શોધે છે;+એની નજર દૂર દૂર સુધી પહોંચે છે.
૩૦ એનાં બચ્ચાં લોહી ચૂસે છે;જ્યાં મડદાં હોય, ત્યાં તેઓ પહોંચી જાય છે.”+
ફૂટનોટ
^ અથવા, “ગભાણમાં.”
^ અથવા, “ખીણની જમીન તૈયાર કરવા.”
^ મૂળ, “દાણા.”
^ મૂળ, “બુદ્ધિ ભુલાવી દીધી છે.”
^ મૂળ, “હથિયારને મળવા.”
^ મૂળ, “જમીનને ગળી જાય છે.”
^ અથવા કદાચ, “એને માનવામાં આવતું નથી.”
