Chiiruaajatka karaloʼuta namüinjatka na chajanakana Corinto 4:1-18
4 Aʼyataashii waya nümüin Maleiwa, jama nümülialaain waalin, nnojoishii waya ooʼulaain suulia tia aʼyatawaakat.
2 Aluʼu shiainjaʼa wooʼulaain oulia tü kasa yarüttüsü aainjünakalü ojuunaa jee nnojotsü wemeejüin wayuu sümaa weeʼiratüin tü nünüikikat Maleiwa, shia wekirajaka anain tü shiimain sümakat tü nünüikikat Maleiwa. Wanaa sümaa waainjain tia noʼuluʼu Maleiwa, sütüjaa aaʼu wayuu lotuin sukuwaʼipa tü kasa waainjakat.
3 Suunjunnüle* tü pütchi anakat maʼin waküjakat sümüin wayuu, naya ounjunnaka oulia shia na wayuu ajaʼttinnüinjanakana,
4 na wayuu manoujainkana, müsü süsürünnakai aaʼin nekii nutuma chi maleiwa aluwataakai saaʼu tü mmakat maaʼulu,* nnojotkalaka nayaawatüin saaʼu tü pütchi anakat maʼin nüchiki Cristo, tü pütchi makalü aka saaʼin luusa, müsü nukuwaʼipa Cristo maʼaka nukuwaʼipa Maleiwa.
5 Nnojoishii waya aküjain pütchi wachikijiraa, shia waküjaka achiki niain Jesucristo chi Señotkai jee jüchepchia waya nükajee Jesús.
6 Anuu nünüiki Maleiwa: «Anasü warattuuire saʼaka tü piʼyuushikat», müsüjaʼaya warattuuikai saaʼin suluʼu waaʼin nutuma Maleiwa sükajee tü nikirajakalü anain waya nükajee Cristo.
7 Mayaapejeʼe müin waya maʼaka saaʼin wanee iita atüküüshi süka pootshi, wountuin tü aʼyatawaakat nümüin Maleiwa, eekalaka süpüla waaʼinrüin wanee kasa isaka süchiki wayuu, wountuin waaʼinrüin tia sükajee tü nüpülainkat Maleiwa, nnojotsü sükajeejatüin waaʼin wamüiwaʼa.
8 Wainma tü kasa ooʼulakünakalü aka waaʼin, nnojotpejeʼe sütaʼülüin wakuwaʼipa, wainmajüsü waaʼin nnojotpejeʼe shapaain waaʼin,
9 müliashii waya atumawaa nnojoliipejeʼe waya wamüiwaʼain, ojuttinnüshii waya, nnojoliipejeʼe waya ajaʼttinnüin.
10 Jaʼitainna jalapünaain waya, weʼrüin tü outaakat wooʼomüin maʼaka niʼrüin shia Jesús, sütüjaakalaka aaʼu wayuu weʼrüin müliaa maʼaka niʼrüin müliaa Jesús.
11 Weʼrüin waneepia tü outaakat wooʼomüin sutuma wanoujain nünain Jesús, sütüjaakalaka saaʼu wayuu weʼrüin müliaa maʼaka niʼrüin müliaa Jesús.
12 Weʼrüin tü outaakat wooʼomüin süpüla katüinjatüin joʼu sünainjee.
13 Müsüjaʼaya wanoula maʼaka naaʼin chi wayuu ashajünakai achiki sünain maa: «Kanoulashi taya müshijeseʼe taashajaain», akaataajaʼa neʼe waya, kanoulashii waya müshiijeseʼe waashajaain.
14 Watüjaa aaʼu nüsoʼireʼerüin Maleiwa naaʼin Jesús jee nüsoʼireʼereerü waaʼin süpüla eeinjanain waya nümaa Jesús jee nüntireenaka waya nümülatuʼumüin.
15 Alatüsü süpüshuaʼa tia süpüla anainjatüin jukuwaʼipa jee wainmainjanain na wayuu eʼrakana nümanee Maleiwa, suluʼujee tia wainmashii maʼin na wayuu aapakana analuʼut nümüin Maleiwa jee aʼwaajakana nia.
16 Ayatüshii waya sünain tü waʼyataainkat nümüin Maleiwa. Mayaapejeʼe waʼlaülaʼalaain, katsüinjeerü waaʼin shiʼipaʼaya.
17 Mayaapejeʼe motsomüinraʼain neʼe tü müliaa weʼrakat jee nnojoluin miyoʼuin maʼin shia, eʼreena waya kasa anasü sünainjee jee nnojotsü eein wanee kasa eekai müin aka saaʼin, eejeerü shia süpüla kaʼikat süpüshuaʼa.
18 Shia waaʼinmaaka maʼin tü kasa nnojotkat shiʼrüin wayuu, nnojotsü shiain waaʼinmaain tü kasa shiʼrakat. Tü kasa shiʼrakat wayuu motsomüinraʼa neʼe sümaʼa, eekajasaʼa tü kasa nnojotkat shiʼrüin, eejeerü süpüla kaʼikat süpüshuaʼa.
Noota
^ Jee shiale «suunjunnüle süka wanee kuluulu».
^ Pünaʼla tü pütchikat «Tü kasa alatakat sainküin mma» suluʼu tü kanüliakat «Jamaluʼulu pütchikat».
