Tü nüshajalakat Juan 13:1-38
13 Süpülapünaa süntüin sükalia tü Pascuakat, niyaawataka saaʼu Jesús keraain nükalia süpüla nuʼunajachin saʼakajee wayuu eemüin chi Nüshikai. Aishii maʼin nüpüla na nikirajüinkana, ayataka tü naalinkat nüpüla outaleepaʼaya nia.
2 Yalajanaka naya sünain ekawaa, niʼitaatüjütpejeʼe chi Yolujaakai suluʼu naaʼin Judas Iscariote, chi nüchonkai Simón, naapajatüin nikii Jesús.
3 Sutuma nütüjaain saaʼu Jesús laülaain nia nutuma chi Nüshikai saaʼu kasa süpüshuaʼa otta nütüjaain saaʼu nümaʼanajeejachin nia Maleiwa jee nüleʼejüinjachin nümaʼanamüin,
4 nütamaakalaka Jesús sünainjee ekawaa jee naakatakalaka tü saajunakat nüsheʼin sümaa niʼitaain shia naʼatoʼu, nijittaakalaka wanee tuwaaya nüseʼeruʼupünaa.
5 Nülaʼalaka wüin suluʼu wanee iita miyoʼu, nuʼlojooka nooʼui na nikirajüinkana jee noosojoko shia süka tü tuwaaya nüseʼeruʼupünaajatkat.
6 «¿Puʼlojooinjatka tooʼui Señotkalee?», nümakalaka Simón Pedro nümüin Jesús suʼlojoonojotpa nuuʼui nutuma Jesús.
7 Nusoutakalaka Jesús nümüin: «Nnojotsü piyaawatüin aaʼu tü taaʼinrakat maaʼulu, piyaawateetpejeʼe saaʼu mapa».
8 Anuujeseʼe nünüiki Pedro nümüin: «Nnojorüleejaʼa süpüla puʼlojuinjatüin tooʼui». Anuujeseʼe nünüiki Jesús nümüin: «Nnojorüle toʼlojuin puuʼui, nnojoishijaʼamata napüshin pia na tekirajüinkana».
9 Nusoutakalaka Simón Pedro nümüin: «Señotkalee, mülejeʼeya shia, puʼlojoleeya tooʼui, tajapü sümaʼaleeya tekii».
10 Anuujeseʼe nünüiki Jesús nümüin: «Wuleshi wanee wayuu süchikijee noʼoojuin, shiaʼala neʼe choʼujaaka nümüin nuʼlojuinjatüin nuuʼui. Wuleshiiyaajeʼe jia, eepejeʼe wanee nnojoikai wulein jaʼakajee».
11 Nütüjaa aaʼu Jesús jaralinjachin chi aapakai nikii, müshijeseʼe nümüin: «Eeshi chi nnojoikai wulein jaʼakajee».
12 Süchikijee nuʼlojooin Jesús nooʼui na nikirajüinkana, naʼatakalaka tü saajunakat nüsheʼin, nüikalaaka süʼütpaʼa tü meesakat jee nümakalaka namüin: «¿Jiyaawata aaʼu tü taaʼinrakat jüpüleerua?
13 ‹Wayuu ekirajüi› müshii jia tamüin, ‹Señotkalee› müshii joo jiaʼaya, pansaasü tia jümakat süka tayainjaʼaya chi jümakai.
14 Toʼlojooitpa juuʼui eerejeʼe tayain chi Jüseñotsekai otta tayain chi Ekirajüikai jia. Akaainjanaʼaya neʼe jiakana, juʼlojiraainjatü tü juuʼuikat.
15 Teʼitaain tü sukuwaʼipainjatkat jüpüleerua süpüla jaaʼinrajatüin tü taaʼinrakat jüpüleerua.
16 Shiimain tanüiki jümüin, nnojotsü alanaʼaleein maʼin nukuwaʼipa wanee achepchiee nuulia chi nülaamainkai otta nnojotsü alanaʼaleein nukuwaʼipa wanee wayuu eekai nüjütüüshin nuulialeʼeya chi kajünalakai nia.
17 Süka jütüjaaitpain saaʼu tia, talateerü jaaʼin jaaʼinrüle shia.
18 Wanaa sümaa taküjain eein chi nnojoikai wulein jaʼakajee, nnojotsü tanüikin tia jüchiki jüpüshuaʼa. Teʼraajüin na wayuu taneekajalakana, taküjapejeʼe tia süpüla shikeraajüinjatüin tü pütchi ashajünakat suluʼu tü Karaloʼuta Nüchikimaajatkat Maleiwa tü makat mayaa: ‹Chi ekapüʼükai pan tamaa, teʼipoloichipa neʼe nia›.
19 Taküjain jümüin shiainjatüin alatüin tüü, shiasaʼa sülatapa junoujeenakalaka sünain tayain aküjünüin achiki sünain tia pütchikat.
20 Shiimain tanüiki jümüin, chi wayuu kapülakai aaʼin wanee wayuu eekai tajünalain, kapülashi taya naaʼinya otta chi wayuu kapülakai aaʼin taya, kapülashiaʼaya naaʼin chi Kajünalakai taya».
21 Shapaakalaka maʼin naaʼin Jesús süchikijee nüküjain tia jee nümakalaka: «Shiimain tanüiki jümüin, aapüneechi ekii taya nutuma wanee jaʼakajee».
22 Neirakaajiraayaa namaka na nikirajüinkana süka nnojoluin natüjaain saaʼu jaralin naashajaain achiki Jesús.
23 Yalajachikalaka nüʼütpaʼa* Jesús chi nikirajüin aishikai maʼin nüpüla.
24 Nüliatakalaka nikii Simón Pedro nümüin jee nüsakirakalaka nia sünain maa: «¿Jaraikai chi naashajaakai achiki?».
25 Niasaʼa chia nikirajüinkai Jesús, nüʼlainraaka sünain nuʼluuwain Jesús jee nümakalaka nümüin: «Señotkalee, ¿jarai chi paashajaakai achiki?».
26 Nusoutakalaka Jesús nümüin: «Nia chi taapajachikai amüin saʼata tü pan tachüttajatkat». Süchikijee nüchüttüin Jesús tü pankat naapakalaka shia nümüin Judas, chi nüchonkai Simón Iscariote.
27 Jüüjüükalaka naaʼin Judas nümüin Satanás süchikijee naapaain tü saʼatakat pan, nümakalaka Jesús nümüin: «Tü paaʼinrakat, anasü paaʼinramaatüle shia maalü».
28 Nayasaʼa na yalajanakana joyotuin sünain ekawaa, nnojotsü nayaawatüin aaʼu jamüin nümaka Jesús tia nümüin Judas.
29 Naküjainruʼu na yalajanakana jutkatüin, aluwataanayaashi Judas nutuma Jesús sünain ayaʼlajaa tü kasa choʼujaakat süpüla tü miʼiraakat jee shiale nüsülajüinjachin namüin na wayuu maʼletsekana, jama niain kajapuluʼuin tü kojonchon ejitünawaikalü aluʼu tü nneetkat.
30 Nuʼunakalaka yalejee saapünapa nümüin saʼata tü pankat, aipaʼajatü tia.
31 Anuukalaka nünüiki Jesús nuʼunapa Judas: «Kojutushi maaʼulu chi Süchonkai Wayuu* otta kojutushiaʼaya chi Maleiwakai nünainjee.
32 Kojuteechi nutuma Maleiwa chi Süchonkai Wayuu, kojutumateechi nutuma.
33 Tachonniichee, motsomüinjeechi neʼe taya yaain jümaa, jüchajaajeechi achiki taya, shiapejeʼe neʼe taküjainjatüin jümüin jooluʼu tü taküjakalinkat namüin na judíokana, ‹nnojoishii süpüla jüntajanain chaa eeinjachire taya›.
34 Taluwataain jia sünain wanee kasa jeketü, aijiraainjana jia waneʼewai jukua maʼaka alin jia tapüla.
35 Aijiraale jia waneʼewai jukua, shiyaawateerü aaʼu wayuu tekirajanain jia».
36 Anuujeseʼe nünüiki Simón Pedro nümüin: «Señotkalee, ¿jalaʼwai pia?». Nusoutakalaka Jesús nümüin: «Nnojoishi süpüla puʼunuin tamaa jooluʼu chaa eemüinjachire toʼunuin, oʼuneechipejeʼe pia mapa».
37 Nusoutakalaka Pedro nümüin: «Señotkalee, ¿jamüshi nnojoika süpüla toʼunuin pümaa jooluʼu? Aapajiraajeechi taya tekii paaʼu».
38 Nusoutakalaka Jesús nümüin: «¿Shiimainche paapeechin pikii taaʼu? Shiimain tanüiki pümüin, akootoleerajaajeechi chi kaliinakai apünüintuapa püküjain sümüin wayuu nnojolin piʼraajüin taya».
Noota
^ «Süʼütpaʼa nuʼluuwain» maluʼulu tia suluʼu griego. «Kojutushi maʼin atumawaa» maluʼulu tia.
^ Pünaʼla tia suluʼu tü kanüliakat «Jamaluʼulu pütchikat».
