Tü nüshajalakat Lucas 12:1-59
-
Soolojia tü pan namaʼanajeejatkat na fariseokana (1-3)
-
Mmoluinjana neema Maleiwa, nnojoliinjana mmoluin seema wayuu (4-7)
-
Chi eekai aküjain suʼupala wayuu nikirajanain nia Cristo (8-12)
-
Nüchiki wanee wayuu washirü mayaawatüinkai saaʼu nukuwaʼipa (13-21)
-
Nnojo shapaain jaaʼin (22-34)
-
Na makana aka saaʼin anneerü eekai palitchoin (32)
-
-
Eejüinjatü jaaʼin (35-40)
-
Chi sülaülajanakai miichi oonookai otta chi sülaülajanakai miichi moonooinkai (41-48)
-
Nnojoleerü anajiraain wayuu, nnojoleerü paaʼinwajiraain (49-53)
-
Ayaawataa saaʼu tü kasa alatajatkat (54-56)
-
Anoutaa sukuwaʼipa wanee kasa (57-59)
12 Watta naalii na wayuu jutkatakana nüʼütpünaa Jesús, aliikajiraashii neʼe naya naaʼu. Yootoko Jesús palajana namaa na nikirajüinkana, nümakalaka namüin: «Eeja jaaʼin, jalia jia suulia soolojia tü pan namaʼanajeejatkat na fariseokana, piama oʼupünaachii naya.
2 Suunjunnüle wanee kasa antüneerü anain, akaataajaʼa suunjulajünüle achiki wanee kasa atüjaaneerü aaʼu mapa sutuma wayuu.
3 Tü jüküjakat nümüin wanee wayuu, aapüneerü shia sutuma wayuu, tü jüküjakat sümaa jiattain jünüiki, aküjüneerü shia saaʼujee tü miichikat süpüla saapünüin sutuma wayuu.
4 Anuu tanüiki jümüin jiakana taʼaleewainyuukana: nnojo mmoluin jia neema na eekana süpüla oʼutuin jaaʼin, süka nnojoleerüin kasain naaʼinrüin jümüin süchikijee tia.
5 Taküjeetpejeʼe jümüin jaralin mmoluinjanain eema jia, mmot jia neema chi eekai süpüla oʼutuin jaaʼin sümaa müinnamaʼaleeinña jia* nutuma. Niaʼaya mmoluinjachika eema jia.
6 ¿Aashin suikünüin jaʼraisü wüchiichein saaʼu piamasü nneerü kachueerachein neʼe? Sotopejeʼe naya naaʼin Maleiwa.
7 Jialeekajaʼa jiakana, yaawasü süpüshuaʼa tü juʼwalakat nutuma chi Jüshikai. Nnojo mmoluin jia, alanaʼaleesia jaalin nüpüla suulialeʼeya tü wüchiicheinkat.
8 »Tamüshii paala jia, chi eekai nüküjain sümüin wayuu tekirajanain nia, nnojoleechi japülin chi Süchonkai Wayuu* nüka noʼupala na aapiee chakana nümaʼana Maleiwa.
9 Chi eekai japülin taka, japüijeechi chi Süchonkai Wayuu nüka noʼupala na aapiee chakana nümaʼana Maleiwa.
10 Jamüsüjaʼa mojule nünüiki wanee wayuu nüchiki chi Süchonkai Wayuu, alatinneerü naainjala nuulia, eekajasaʼa chi mojukai anüiki süchiki nüpülain Maleiwa, nnojoleerü alatinnüin naainjala nuulia.
11 Jümaanapa suluʼumüin tü ekirajüleekat nüchiki Maleiwa, namaʼanamüin na sülaülashiikana mma jee na aʼyataashiikana neʼipajee, nnojo shapaain jaaʼin saaʼu tü jünüikinjatkat otta saaʼu jamüinjatüin sukuwaʼipa jünüiki namüin,
12 aküjüneerü jümüin tü jünüikinjatkat sutuma tü nüpülainkat Maleiwa».
13 Nümakalaka wanee wayuu naʼakajee na wayuukana: «Ekirajüikalee, püma nümüin chi tawalakai nüpaajaai tamaa tü eʼipünaalaakat wapüla».
14 Nusoutakalaka Jesús nümüin chi wayuukai: «Waʼle, ¿jaraikai aneekaka taya süpüla pütcheʼejanain taya jümüin otta süpüla tapaajaain* jükaaluʼu tü eʼipünaalaakat jüpüla?».
15 Anuujeseʼe nünüiki Jesús namüin: «Eeja jaaʼin, jalia jia suulia suchuntaain jaaʼin wainma kasa, süka nnojoluin shiain katüin atuma noʼu wanee wayuu tü kasa eekat nümaʼana, jaʼitasü wainmain shia».
16 Nikirajaka naya sünain wanee kasa sümaa kayaawasein shia nutuma. Nümaka namüin: «Eejaittaa wanee wayuu washirü kachonkai maʼin aʼttia.
17 ‹¿Jaleetche joo tanaajaain süchon taʼttia?›, maa müshi suluʼu naaʼin.
18 Anuujeseʼe sooʼomüin nünüiki: ‹Anuupejeʼe tü taaʼinreetkat: tojuttireerü tü anaajaaleekat süchon taʼttia, takumajeetkalaka wanee miyoʼuyuu shiiʼiraka, tanaajeetkalaka yala süchon tü taʼttiakat sümaa tü kasa eekat tamaʼana.
19 Süchikijee tia, tamajiraajeechika: «Wainma kasa tamaʼana aneechika atuma taya soʼu wainma juya, nnojoleerü shapaain taaʼin, emireechi taya, aseechi taya otta talateerü taaʼin»›.
20 Anuupejeʼe nünüiki Maleiwa nümüin: ‹¡Mayaawatüinkaiche pia saaʼu pukuwaʼipa! Outajaisa pia aipaʼa. ¿Jaraitaaleechikaʼa apütüüin apüla tü kasa pünaajaakuʼu pümakat?›.
21 Akaweechia chi wayuu wainmakai amaʼana korolo sümaa nnojoluin anain nukuwaʼipa noʼuluʼu Maleiwa, meechi maʼletsekai naaʼin noʼuluʼu».
22 Anuukalaka nünüiki Jesús namüin na nikirajüinkana: «Nnojo shapaain jaaʼin saaʼu wainma kasa, maʼaka saaʼin saaʼu tü jiküinjatkat otta saaʼu tü jüsheʼinjatkat,
23 süka shiain kojutuleein maʼin katüle noʼu wanee wayuu suulialeʼeya tü niküinkat otta tü nüsheʼinkat.
24 Jamüsüjaʼa tü wüchii kanüliakat cuervo, mayaainjeʼe nnojoluin süpünajüin otta nnojoluin sünaajaain shiküin, keküinsü shia nutuma Maleiwa. Alanaʼaleesia maʼin jaalin nüpüla Maleiwa suulialeʼeya tia wüchiikalüirua.
25 ¿Epijaajeenache jia shapaakuʼu sümüle jaaʼin?
26 Isalejeʼe jüchiki jipijaain, ¿jamakaʼa shapaakuʼu sümaka jaaʼin saaʼu waneirua kasa?
27 Jülüjataa jaaʼin sukuwaʼipa tü süsiikat mojuui, asotusü neʼe shia, nnojotsü aʼyataain otta nnojotsü asuttajüin. Anaʼleepejeʼe sünoʼu süsii tia mojuuikat suulialeʼeya sünoʼu nüsheʼin Salomón eerejeʼe washitpuʼuin maʼin nia.
28 Mülejeʼe sünoʼu tü süsiikat mojuui nutuma Maleiwa, tü asotokot soʼukai otta tü ojotunakat waneemüin kaʼi soʼu siki, jiakaʼa nnojoliin naapeematüin asheʼin, ¿jamüshii manoulakaʼa maʼin jia?
29 Nnojo jüshapataain maʼin jaaʼin saaʼu tü jiküinjatkat jee saaʼu tü jüsüinjatkat.
30 ¿Aashin shiain tia kachiiruain saaʼin wayuu sainküin tü mmakat? Nütüjaapejeʼe saaʼu chi Jüshi Iipünaajachikai tü kasa choʼujaakat jümüin.
31 Süka niain Maleiwa aluwataajeechin saaʼu tü mmakat, shia jaaʼinmaa tü aʼyatawaakat nümüin. Naapeetka jümüin tü kasa choʼujaakat jümüin.
32 »Jia makana aka saaʼin anneerü eekai palitchoin, nnojo mmoluin jia. Anashiisü nümüin chi Jüshikai nüneeküin jia süpüla aluwatawaa.
33 Anasü juiküle tü kasa eekat jümaʼana, jaapeetka tü süliapalakat namüin na wayuu maʼletsekana, jukumaja süta jünneetse süka kasa eekai matüjain ajaʼttaa. Anasü jünaajüle kasa kojutusü chayaa iipünaa eere nnojoluin suʼluwajünüin sutuma kaʼruwarannuu otta eere nnojoluin keʼein shia,
34 jama shiain naaʼinmaain wanee wayuu tü kasa kojutukat nümüin.
35 »Yapaja jia. Jüshataa jüsheʼin jiatapünaa otta chuwata jutuma tü jüranparasekat.
36 Müinjana jia maʼaka naaʼin na wayuu aʼatapakana nüleʼejüin chi nalaamainkai sünainjee wanee miʼiraa shikiira kasaalüü. Eejüsü naaʼin süpüla nojutalamaatüin nüpüleerua nütaletapa tü miichoʼukot.
37 Anakuwaʼipalii na achepchiee eejakana aaʼin nüpüla chi nalaamainkai. Nüshataajeerü nüsheʼin chi nalaamainkai niatapünaa süpüla naaʼinrajatüin wanee kasa nayaaluʼu. Nüikaajeʼereena naya süpüla ekawaa otta niitajeerü tü eküütkat nayaaluʼu.
38 Anakuwaʼipalii na achepchieekana yapale naya nüpüla chi nalaamainkai. Jaʼitashi antüin nia süseʼeruʼupünaa aikat* jee wanaa maʼin sümaa nukootoleerajaain chi kaliinakai.*
39 Jülüjataa jaaʼin tüü, nütüjaalejeʼe saaʼu wanee wayuu jalapüshinjachin nüntüin wanee kaʼruwarai, nnojoireejaʼa süpüla nikerolojachin chi kaʼruwaraikai nutuma.
40 Akaainjanajaʼaya jiakana, eejüinjatü maʼin jaaʼin süka nünta nümeechin chi Süchonkai Wayuu».
41 Nümakalaka Pedro nümüin: «Señotkalee, ¿kayaawasesü putuma wayaaluʼu tü pikirajakalü anain? ¿Shiataapa nayaaluʼu napüshuaʼa na wayuukana?».
42 Anuujeseʼe tü nümakat chi Señotkai: «¿Jarai maʼin chi sülaülajana miichi oonookai jee kekiikai maʼin, eʼitaaneechika nutuma chi nülaamainkai süpüla naapajatüin neküin na achepchieekana choʼujaapa shia namüin?
43 Anataʼaleeshijaʼa maʼin chia achepchieekai ayatüle naaʼinrüin tia nüpüla chi nülaamainkai.
44 Shiimain tü tamakat jümüin, eʼitaaneechi nia süpüla sülaülajanain süpüshuaʼa nuwashirüin chi nülaamainkai.
45 Eekajasaʼa nümataale chia achepchieekai suluʼu naaʼin, ‹Koulainshi maʼin chi talaamainkai›, niʼyaajataale na achepchieekana wanaa nümaa, nikaale, nüsaale jee nipeʼrakuʼu nümüle,
46 anta meechia nülaamain chia achepchieekai soʼu wanee kaʼi jee soʼu wanee oora nnojotka nütüjaain aaʼu, mülieechi maʼin nia nutuma chi nülaamainkai otta niʼitaajeechi nia naʼaka na eʼrüliikana wayumüin.
47 Niasaʼa chi achepchiee nnojoikai yapain jee nnojoikai aaʼinrüin tü aluwataanakalü anain nia nutuma chi nülaamainkai, mayaainjeʼe nütüjaain saaʼu tü aluwataanakalü anain nia, aʼyaajüneechi nia.
48 Eekajasaʼa chi achepchiee nnojoikai atüjaain saaʼu tü aluwataanakalü anain nia jee naaʼinrüle waneirua kasa aʼyaajüneechika anainjee nia, jiatteerü nülia atumawaa. Chi wayuu aapünakai amüin wainma kasa, achuntuneerü wainma kasa nümüin otta chi eʼitaanakai ajapuluʼu wainma kasa, wainmaleejeeria maʼin tü kasa achuntunakat nümüin.
49 »Antüshi taya süpüla tachuwajaain wanee siki yaa saaʼu tü mmakat, eeyütka joo shia tachuwajaaitpa.
50 Müinjachi woutiisakai taaʼin süka wanee sukuwaʼipa woutiisaa. Ayateechia taya shapaakuʼu müin aaʼin sülataleepaʼaya tia toulia.
51 ¿Antüshijasa taya jaaʼinruʼu süpüla anajiraainjatüin wayuu tatuma? Nnojo, antüshi taya süpüla nnojoliinjanain paaʼinwajiraain naya.
52 Noʼujeʼereeya kaʼikai chii, eejeena jaʼraishii wayuu peʼipaakana suluʼu wanee miichi: na apünüinshiikana peʼipaajeena namaa na piamashiikana, nayasaʼa na piamashiikana peʼipaajeena namaa na apünüinshiikana.
53 Peʼipaajeechi wanee wayuu nümaa nüchon, akaataajaʼa chi nüchonkai peʼipaajeechi nümaa chi nüshikai. Peʼipaajeerü wanee wayuu sümaa tü süchonkat, akaataajaʼa tü süchonkat peʼipaajeerü sümaa tü shiikat, peʼipaajeerü wanee wayuu sümaa tü saʼütkat, akaataajaʼa tü saʼütkat peʼipaajeerü sümaa».
54 Anuukalaka tü nümakat Jesús namüin na wayuu wattakana naalii: «Wanaa sümaa jiʼrüin sukojojooin tü sirumakat see wopujee, ‹Iseeirü wawai›, mamaatüshii jia, antüsüjaʼaya tia wawaikat.
55 Otta suwawarüle wanee joutai uuchejeejatü, ‹Alinjatü walatshi›, müshii jia. Aisüjaʼaya tü walatshikat.
56 Wayuu piama oʼupünaachi jia, jiyaawata aaʼu sukuwaʼipa tü mmakat jee tü sirumakat, nnojotpejeʼe jiyaawatüin saaʼu tü kasa alatajatkat maaʼutpünaa.
57 ¿Jamakaʼa nnojotka jiyaawatüin süka jukuwaʼipa jümüiwaʼa tü kasa eekai anain?
58 Jamüshijaʼa pümaanüle nümaʼanamüin wanee aluwataashi nutuma wanee wayuu mojujiraakai amaa pia, anasü punoutamaatüle tia wopuluʼuiwaʼaya jia, nnojoleetka naapüin pikii nümüin chi laülaashikai jee chi laülaashikai naapa nümeechijaʼa pia najapuluʼu chi suwaariaseshikai tü laülaapiakat, püreesa meechia pia.
59 Shiimain tanüiki pümüin, ojuʼitaleejeechia pia puwalaajapa süpüshuaʼa tü nneerü pujuyaalakat».
Noota
^ «Gehena» maluʼulu tia suluʼu griego. Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Jee shiale «teitajüin».
^ «Segunda vigilia» maluʼulu tia suluʼu griego. Nükalioʼu Jesús, oʼttusü tia sünainjee las nueve aipaʼa sünainmüinreʼeya süseʼeruʼu aikat.
^ «Tercera vigilia» maluʼulu tia suluʼu griego. Nükalioʼu Jesús, oʼttusü tia süseʼeruʼujee aikat sünainmüinreʼeya las tres maalia.
