Tü nüshajalakat Marcos 7:1-37
7 Nantapaaka nünainmüin Jesús waneinnua fariseo jee waneinnua karaloʼutamaajana chejeejana Jerusalénjee.
2 Neʼrakalaka waneinnua nikirajüin Jesús ekaain sümaa yarüttüin* najapü. Nnojotsü noʼlojooin najapü süpülapünaa ekaa.
3 (Süpülapünaa nekaain na fariseokana jee na wane judíokana noʼlojooin najapü sünainmüinreʼeya nasatala maʼaka naaʼinrapuʼuin shia na wayuu namaiwajanakana.
4 Naleʼejapa metkaaraluʼujee oʼlojooshii naya najapü süpülapünaa nekaain. Naainjain tü naaʼinrapuʼukat na wayuu namaiwajanakana maʼaka saaʼin nemetirüin* tü waasükat shiroku wüin, tü jaarakat jee müsia waneirua iita aainjuushi süka cobre).
5 Namakalaka nümüin Jesús na fariseokana jee na karaloʼutamaajanakana: «¿Jamüsü nnojotkaʼa naaʼinrüin na pikirajüinkana tü naaʼinrapuʼukat na wayuu namaiwajanakana? Jamüshiijaʼa naya nnojotsü noʼlojuin najapü süpüla ekaa».
6 Anuuka nünüiki Jesús namüin: «Wayuu piama oʼupünaachii jia, shiajaʼa makaʼa nünüiki Isaías chi nünüikimaajachikai Maleiwa sünain müin nünüiki jüchiki: ‹Kojutayaashi neʼe taya natuma wayuukana naainnua süka nanüiki, wattapejeʼe naaʼin toulia.
7 Nnojotsü kasain saamüin namüin naʼwaajüin taya süka nekirajüin neʼe sünain kasa suluwataaka anain wayuu›.
8 Mojutusat jümüin tü nuluwataakalü anain Maleiwa. Icheshii neʼe jia süchiirua tü naaʼinrapuʼukat na wayuu namaiwajanakana».
9 Anuuka sooʼomüin nünüiki Jesús namüin: «Nnojoishii jia oonooin sümaa tü nuluwataakalü anain Maleiwa shiiʼiree neʼe jaaʼinrüin tü naaʼinrapuʼukat na wayuu namaiwajanakana.
10 Jamüshijaʼa Moisés müsü nünüiki mayaa: ‹Kojutu pümüin püshi sümaa pii›. Eesü waneʼeya müsü mayaa: ‹Oʼutuneechi aaʼin chi mojukai anüiki nüchiki nüshi jee süchiki nii›.
11 Anuupejeʼe tü jümakat jiakana: ‹Chi wayuu eekai nümüin nümüin nüshi jee sümüin nii: «Asülajüinjachiaa taya pümüin wanee kasa, eepejeʼe neʼe wanee ‹corbán›»›, (tü asülajünajatkat nümüin Maleiwa maluʼulu tia).
12 Chi wayuu makai anüiki mayaa jaajüin, nnojoluitpa choʼujaain nükaalinjain na wayuu kachooinkana nia.
13 Sükajee tia, nnojoluitpa jaaʼinrüin tü nümakat chi Maleiwakai süpüleerua neʼe aaʼinraa tü naaʼinrapuʼukat na wayuu namaiwajanakana. Wainma neʼe tü kasa jaaʼinrakat».
14 Nuunejaka na wayuukana nachikuaʼa süpüla narütkaainjanain nünainmüin jee nümaka namüin: «Jülüjataa jaaʼin tanüiki süpüla jiyaawatüinjatüin saaʼu.
15 Tü yarüttakalü atuma wanee wayuu nnojotsü shiain tü kasa nikakat, shia yarüttaka atuma nia tü kasa ojuʼitakat nüleʼeruʼujee».
16 *
17 Wanaa sümaa nuʼunuin Jesús naʼakajee na wayuu wattakana naalii, ekerotushi nia suluʼu wanee miichi jee nüsakinnaka natuma na nikirajüinkana kasain kayaawasein tü nümakat.
18 Nusoutaka Jesús namüin: «¿Nnojotyülia jiyaawatüin saaʼu tü tamakat? Tü yarüttakalü atuma wanee wayuu nnojotsü shiain tü kasa nikakat, ¿nnojotsükai jiyaawatüin saaʼu tia?
19 Tü kasa nikakat wanee wayuu nnojotsü ashakatüin suluʼumüin naaʼin, ashakatüsü nüleʼeruʼumüin, nüwünaʼapajaka shia mapa». Anakalaka naajüin Jesús süpüshuaʼa tü kasa eekai shikaajünüin.
20 «Tü kasa yarüttakalü atuma nukuwaʼipa wanee wayuu shia tü kasa ojuʼitakat nüleʼeruʼujee.
21 Jamüsüjaʼa suluʼujee naaʼin wanee wayuu, akumajaasü kasa eekai mojuin maʼaka saaʼin nuʼluwajiraweein nukuwaʼipa,* nuʼluwajeein wanee kasa, nuʼuteein saaʼin wayuu,
22 kawalaʼateein nuʼwayuuse nutuma, suchuntaain naaʼin wanee kasa naata kakorotshi, naaʼinreein kasa mojusü, nimeejeein wayuu, maapülinsai sünain aaʼinraa kasa mojusü,* achunjashi, airuʼutsü nünüiki, yaleta aaʼinchi otta mayaawatüinsai saaʼu nukuwaʼipa.
23 Süpüshuaʼa tia kasa mojusükat shia ojuʼitaka suluʼujee naaʼin wanee wayuu jee shia yarüttaka atuma nukuwaʼipa».
24 Nuʼunakalaka Jesús yalejee suluʼumüin tü mmakat Tiro otta Sidón. Nikerotoko suluʼumüin wanee miichi shiiʼiree nnojoluin saapüin wayuu nüchiki, ayatapejeʼe nia atüjaanüin aaʼu sutuma wayuu.
25 Süntakalaka wanee wayuu nünainmüin Jesús süka saapüin nüchiki. Kaleʼeruʼusü yolujaa süchon tia wayuukot, süsapainkaka shia nümülatuʼu Jesús.
26 Kojuyatua suchuntuin nümüin Jesús niyuʼluinjatüin tü yolujaakat süleʼeruʼujee tü süchonkat. Wayuu griega tia wayuukot, chejeʼewat shia Fenicia, wanee mma chasü Siria.
27 Nümakalaka sümüin: «Ketshiʼiya nayaiwa emirain palajana na tepichicheinkana. Nnojotsü anain süsütünüle wanee pan noulia na tepichicheinkana süpüla sujutunajatüin sümüin tü etcheinkat».
28 Anuujeseʼe sünüiki tü wayuukot niʼipajee: «Aa, müsiaʼayan Señotkalee, ekapejeʼe tü etcheinkat wanee kasa eekai sujutuusüin saaʼujee nemeesain na tepichicheinkana».
29 Nümakalaka Jesús sümüin: «Nii waaʼiraa, puʼuna pümaala. Saaʼujee tü pümüitpakat, ojuʼitüitpa tü yolujaakat süleʼeruʼujee tü püchonkat».
30 Suʼunakalaka tia wayuukot shipialuʼumüin, eejatka tü süchonkat juʼlee müin süpüla, jama sujuʼitüitpain tü yolujaakat süleʼeruʼujee.
31 Süchikijee nuʼunuin Jesús Tirojee, nüntakalaka sotpaʼamüin tü palaakat Galilea. Nülatapünaaka suluʼupünaa tü mmakat Sidón sümaʼaleeya tü mma kanüliakat Decápolis.*
32 Nüntinnaka nümüin Jesús wanee wayuu macheʼesai jee isaataain makai achiki aashajawaa. Suchuntunaka maʼin nümüin niʼitaainjachin najapü naaʼu chia wayuukai.
33 Nümaaka chi wayuukai nümüiwaʼa mamüin aka tüsa. Niʼitaaka Jesús najapü sünain nücheʼe chi wayuukai jee süchikijee nejetüin, niʼitaaka najapü sünain niyee chi wayuukai.
34 Niirakaakalaka sirumatuʼumüin sümaa nüsanalüin naaʼin jee nümaka «Éffatha», «Pujutalaa» maluʼulu tia.
35 Jee nüküjaiwaʼaya Jesús tia pütchikat, kacheʼekalaka chi wayuukai jee nnojoluitpa isaataain müin nüchiki aashajawaa, anaitpa nünüiki.
36 Nüchiaapejeʼe naya suulia naküjaʼalüin süchiki tia. Mayaapejeʼe nachiaanüin nutuma, ayatüsia neʼe naküjain süchiki.
37 Ponusü maʼin naaʼin naya wayuukana tü naainjakat Jesús jee namakalaka nüchiki: «Anasü süpüshuaʼa tü kasa naainjakat. Kacheʼeshi nutuma chi eekai macheʼein jee kanüishi nutuma chi eekai manülin».
Noota
^ Shia aashajaanaka achiki tü naaʼinrapuʼukat na judíokana süpüla wuleinjatüin nakuwaʼipa. Nnojotsü shiain aashajaanüin achiki wuleinjatüin najapü.
^ «Woutiisasü natuma» maluʼulu tia suluʼu griego.
^ Ashajünüsü wetsiikulokot tüü suluʼu waneirua Biblia, nnojotpejeʼe shia eʼitaanüin suluʼu waneirua karaloʼuta sümaiwajatü ashajuushikat suluʼu griego. Pünaʼla tia suluʼu tü kanüliakat «Sooʼomüin pütchi A3».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Poloosü mma» eesü sümünüle.
