Tü nüshajalakat Mateo 16:1-28
-
Achuntunusü nümüin Jesús naaʼinrüinjatüin wanee kasa pülasü (1-4)
-
Soolojia tü pan namaʼanajeejatkat na fariseokana namaʼaleeya na saduceokana (5-12)
-
Shiyaawein eere nuluwataain Maleiwa (13-20)
-
Meena niʼitaakai aaʼin Jesús na nikirajüinkana saaʼu ipa (18)
-
-
Nüküjain Jesús nuʼutunajachin aaʼin (21-23)
-
Chi achekakai süchiki nikirajüin nia Jesús (24-28)
16 Narütkaakalaka na fariseokana namaʼaleeya na saduceokana nünainmüin Jesús. Nachuntayaaka nümüin naaʼinrajatüin wanee kasa pülasü noʼupala süpüla nooʼulaküin naaʼin.
2 Nusoutaka Jesús namüin: «Jiirakaapa chaa iipünaamüin sümaa ishooitüin tü sirumakat ‹jutatuuijeerü mmapaʼakat soʼukai›, müshii jia.
3 Shiasaʼa wattaʼa maalü müshii jia ‹aijeerü jemiaikat soʼukai sümaa süʼiteerüin juyakat nnaaʼasa kojoin maʼin sirumakat sümaa ishooitüin shia›. Jiyaawata aaʼu sukuwaʼipa türa sirumakat, nnojotpejeʼe jiyaawatüin saaʼu tü kasa alatajatkat.
4 Wayuu mojulaashii jia jee nnojoishii jia oonooin nümüin Maleiwa, shia neʼe jiʼreeka amüin kasa pülasü, nnojoleetpejeʼe jiʼrüin tia. Shia neʼe jiʼreetka tü kasa pülasü aainjünakat nüpüleerua Jonás». Jee süchikijee müin nünüiki Jesús namüin, nuʼunakalaka noulia.
5 Nantapa waneemüin saʼata palaakat sotojooko naaʼin na nikirajüinkana Jesús malüʼüjain naya pan.
6 Nümaka Jesús namüin: «Eeja jaaʼin, jalia jia suulia soolojia tü pan namaʼanajeejatkat na fariseokana namaʼaleeya na saduceokana».
7 «Nnojoliipejeʼe waya antirüin pan», namajiraaka na nikirajüinkana.
8 Naapapa Jesús nanüiki nümaka namüin: «Manoulakanache maʼin jia, ¿jamüshii jaashajaajiraaka süchiki malüʼüjain jia pan?
9 ¿Nnojotsü jiyaawatüin saaʼu tü taküjeekalü achiki jümüin? ¿Nnojotsü sotuin jaaʼin nekinnüin 5.000 tooloyuu süka jaʼraisüchein neʼe pan? ¿Nnojotsü sotuin jaaʼin kojuyain tü kanaasüta akotchojünakalü aluʼu tü eküülü apütaakat?
10 ¿Motomaatüitpa jaaʼin nekinnüin 4.000 tooloyuu süka akaratshisü neʼe pan? Mataasü sukotchojunakai kojuyasü kanaasüta miyoʼuyuu sümaa tü eküülü apütaasükat.
11 Nnojoishi taya aashajaain süchiki pan, nnojottaasü jiyaawatüin saaʼu tü tameekat jümüin. Shia tachiaaka oulia jia eejüinjatüin jaaʼin suulia tü soolojia pan namaʼanajeejatkat na fariseokana otta na saduceokana».
12 Nayaawataka saaʼu nnojoluin shiain naashajaain achiki eejüinjatüin naaʼin suulia tü soolojiakat pan, shia eejüinjatka oulia naaʼin tü kasa nekirajakalü anain na fariseokana jee na saduceokana.
13 Nüntapa Jesús namaa na nikirajüinkana suluʼumüin tü mmakat Cesarea de Filipo, nümaka namüin: «¿Jamüsü sünüiki wayuu nüchiki chi Süchonkai Wayuu?».
14 Nasoutaka nümüin: «‹Nia Juan chi Awoutisaajüikai›, eeshii na makana, ‹nia Elías, nia Jeremías, nia wane nünüikimaajachi Maleiwa› eetaashii joo na makanaya».
15 Nümaka Jesús namüin: «¿Jaraikaʼa maʼin taya jaashin?».
16 Nusoutaka Simón Pedro nümüin: «Pia chi Cristokai, Nüchon chi Maleiwa matüjainkai outaa».
17 Nümaka Jesús nümüin Pedro: «Anataʼaleeshijaʼa maʼin pia Simón nüchonkai Jonás, nnojotsü süküjalain wayuu pümüin tü pümüitpakat, nüküjala pümüin chi Tashi iipünaajachikai.
18 Anuu tanüiki pümüin piakai Pedrokai anülia tatuma, meena teʼitaakai aaʼin na tekirajüinkana saaʼu ipakat tüü, nnojotpejeʼe alaülaajaajeerüin naaʼu tü Amuuyuukat.*
19 Taapeerü pümüin shiyaawein tü wopu chaʼwatkat eere nuluwataain Maleiwa. Tü kasa kapükat putuma yaa saaʼu tü mmakat, kapeerü shia chaa iipünaʼaya. Tü kasa taashikat putuma yaa saaʼu tü mmakat, taasheerü shia chaa iipünaʼaya».
20 Nüchiaaka na nikirajüinkana suulia naküjain sümüin wayuu niain chi Cristo münakai.
21 Soʼujeʼereeya tia, nüküjain Jesús namüin na nikirajüinkana nuʼunajachin Jerusalénmüin sümaa niʼrüinjachin müliaa chayaa natuma na laülaashiikana, natuma nekiipüʼü na sacerdotekana, natuma na karaloʼutamaajanakana otta nüküjain nuʼutunajachin aaʼin jee nüsoʼireʼennüinjachin aaʼin apünüin kaʼi süchikijee tia.
22 Nümaashijeseʼe nia Pedro mamüin aka tüsa sünain nüchiaain nia, nümaka nümüin: «Señotkalee, aituashiaʼaya maʼin pia, nnojorüleejaʼa sülatajatüin pümüin tia pümakat».
23 Nujununtaaka Jesús nuulia Pedro, nümaka nümüin: «Puʼuna toulia Satanás, pütaʼülee akuwaʼipachi neʼe taya. Nnojotsü jülüjain paaʼin tü jülüjakat naaʼin Maleiwa, shia neʼe jülüjaka paaʼin tü jülüjakat saaʼin wayuu».
24 Nümaka Jesús namüin na nikirajüinkana: «Chi achekakai süchiki tekirajüin nia, nnojotsü naaʼinrüinjatüin tü nüchekakat neʼe nümüiwaʼa. Müinjatü nülüʼüjakai saaʼin tü wunuʼu* akachennakalü anain wayuu sümaa nuushikajaain süchiirua takuwaʼipa.
25 Nieechi outaka chi eekai oʼttaweein, eekajasaʼa chi outakai saaʼujee niʼyataain tamüin, nieechi kataka oʼu.*
26 ¿Kasa saamaka nümüin wanee wayuu tü nuwashirüinkat outule nia? ¿Kaseerü naapaka wanee wayuu shiiʼiree kateein noʼu?
27 Anteechi chi Süchonkai Wayuu* namaa na aapieekana sümaa pülasheechin nia maʼaka naaʼin chi Nüshikai, süsaleenaka nutuma na aaʼinrakana kasa mojusü, eʼreenapejeʼe kasa anasü na jaa makana nümüin.
28 Shiimain tü tamakat jümüin, juʼutku jiakana yaakana yaa, nnojoleena jia outuin sümaa nnojoluin jiʼrüin palajana nuluwataain chi Süchonkai Wayuu».*
Noota
^ «Hades» eesü sümünüle. Shia eere na outushiikana. Pünaʼla tia suluʼu tü kanüliakat «Jamaluʼulu pütchikat».
^ Nuchuntuin Jesús tia pütchikat süpüla niyaawajeʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Nüntapa sünain aluwatawaa» maluʼulu tia suluʼu griego.
