Tü nüshajalakat Mateo 5:1-48
-
PÜTCHI EKIRAJÜNAKA ANAIN SAAʼU WANEE UUCHI (1-48)
-
Oʼttushi Jesús sünain ekirajaa saaʼu wanee uuchi (1, 2)
-
Na wayuu anakuwaʼipaliikana (3-12)
-
Ichii otta luusa (13-16)
-
Ekeraajüsü nutuma Jesús tü Pütchi Aapünakat nümüin Moisés (17-20)
-
Nnojolinjachi jashichin wanee wayuu (21-26), nnojotsü kawalaʼatainjatüin nuʼwayuuse wanee wayuu nutuma (27-30), nnojotsü nuuʼulaainjatüin nuʼwayuuse (31, 32), aapaa anüikii (33-37), nnojoishi peʼipaainjachin wanee wayuu (38-42), alinjana nüpüla wanee wayuu na nüʼünüükana (43-48)
-
5 Niirakaapa Jesús namüin na wayuu wattakana naalii, nuʼunakalaka mamüin aka tüsa sutuʼupaʼamüin wanee uuchi. Nüikalaapa chamüin, narütkaaka na nikirajüinkana nünainmüin.
2 Anuukaʼa nünüiki namüin sümaa nikirajüin naya:
3 «Anakuwaʼipalii na wayuu ayaawatakana saaʼu choʼujaain chi Maleiwakai namüin süka neʼreerüin tü kasa anasü eejeetkat nuluwataapeena Maleiwa chejee iipünaajee.
4 »Anakuwaʼipalii na wayuu mojukana aaʼin süka namülianneenain aaʼin.
5 »Anakuwaʼipalii na wayuu anamiakana süka saapüneerüin tü mmakat namüin.
6 »Anakuwaʼipalii na wayuu loteekana atuma sukuwaʼipa wanee kasa* süka neʼreerüin tia.
7 »Anakuwaʼipalii na wayuu amüliajüliikana süka namüliajüneenain.
8 »Anakuwaʼipalii na wayuu wulekana aaʼin süka neʼreechin Maleiwa.
9 »Anakuwaʼipalii na wayuu eekana atuma anajirawaa süka neʼraajüneenain suluʼu nüchooin naya Maleiwa.
10 »Anakuwaʼipalii na wayuu müliakana atumawaa saaʼujee lotuin natuma sukuwaʼipa wanee kasa, neʼreerü tü kasa anasü eejeetkat nuluwataapeena Maleiwa chejee iipünaajee.
11 »Anakuwaʼipalii jia jüʼülüjünüle amüin saalinjee junoujain tanain, müliale jia atumawaa otta mojule sünüiki wayuu jüchiki sükajee süküjain saʼalain.
12 Talatashaata maʼin jaaʼin süka jiʼreenain kasa anasü nutuma Maleiwa.* Jamüshiijaʼa na nünüikimaajana Maleiwa eejanakana paala, müliapuʼushii naya atumawaa.
13 »Müshii jia maʼaka saaʼin tü ichii eekat saaʼu mma. Irale tü ichiikat, nnojotsü süpüla palaain shia süchikuaʼa. Nnojoluitpa kasain saamüin, anaitpa süpüla sojotunuin anooipaʼamüin süpüla süliikatünüin aaʼu sutuma wayuu.
14 »Müshii jia maʼaka saaʼin luusa warattuuika atuma süpüleerua wayuu. Jaʼyasü wanee pueulo saaʼule shia wanee uuchi.
15 Shipejaanüle wanee ranpara nnojotsü aʼwachinnüin wanee kasa saaʼu. Eʼitaanüsü shia saaʼu tü süpülajanakat süpüla sünaküinjanain napüshuaʼa na sulujunakana tü miichikat.
16 Akaainjanaʼaya neʼe jia, müinjana aka jia saaʼin wanee luusa süpüla neʼrüinjanain na wayuukana tü kasa anasü jaaʼinrakat. Naʼwaajeechika chi Jüshi iipünaajachikai.
17 »Jülüjaʼalayaai jaaʼin tantüshin süpüla taʼwüinjeʼerüin tü Pütchi Aapünakat nümüin Moisés* otta tü namakat na nünüikimaajanakana Maleiwa. Nnojoishi taya antüshin süpüla tia, antüshi taya süpüla shikeraajüinjatüin tia pütchikat.
18 Shiimain tü tamakat jümüin, eesüjaʼa shieerüle ajaʼttinnüin palajana tü sirumatuʼukat otta tü mmakat. Eekajasaʼa tü Pütchi Aapünakat nümüin Moisés, ekeraajeerü shia süpüshuaʼa. Nnojoleerü eein waneesiaakaijeʼe eekai nnojoluin shikeraajüin.
19 Chi wayuu moonooinkai sümaa tü Pütchi Aapünakat nümüin Moisés, jaʼitasü shiain tü pütchi nnojotkat kaawain maʼin süküjainruʼu wayuu jee nootule wayuu süpüla nnojoluinjatüin soonooin sümaa, nnojoishi anain nia süpüla niʼrüinjachin tü kasa anasü eejeetkat nuluwataapeena Maleiwa chejee iipünaajee. Eekajasaʼa chi wayuu oonookai sümaa tü Pütchi Aapünakat nümüin Moisés sümaa nikirajüin wayuu sünain, nia keraaka süpüla eʼraa tü kasa anasü eejeetkat nuluwataapeena Maleiwa chejee iipünaajee.
20 Anuu tanüiki jümüin, nnojoliire joonooin sümaa tü Pütchi Aapünakat nümüin Moisés noulialeʼeya na karaloʼutamaajanakana otta na fariseokana, nnojoleerü jiʼrüin tü kasa anasü eejeetkat nuluwataapeena Maleiwa chejee iipünaajee.
21 »Jaapüitpajaʼa tü pütchi aküjünakat namüin na jutuushinuukana sümaiwa paala, tü makat mayaa: ‹Nnojo puʼutuin saaʼin wayuu, chi eekai uwomuyuuin süchiki wayuu, asouteechi nia saaʼu tia chaa laülaapialuʼu›.
22 Anuupejeʼe tanüiki jümüin, chi wayuu jashichikuʼu makai nümüin nuwala, asouteechi nia saaʼu tia suluʼu tü laülaapiakat. Jee chi wayuu airuʼutkai anüiki nümüin nuwala, asouteechi nia saaʼu tia suluʼu tü Laülaapia Miyoʼusükat. Eekajasaʼa chi wayuu makai nümüin nuwala: ‹Wayuu malasü neʼe pia›, eeshijaʼa süpüla najaʼttinnüin.*
23 »Müleka püsülajüinjachire wanee kasa süpüla saʼajünüin saaʼu tü aʼajüleekat nümüin Maleiwa jee sotule paaʼin eein tü naainjalakat wanee puwala pümüin,
24 püpüta tü püsülajüinjatkat yala süʼütpaʼa tü aʼajüleekat, anajiraainjachi pia palajana nümaa chi puwalakai. Püleʼejeechika süpüla paapüin tü püsülajüinjatkat nümüin Maleiwa.
25 »Neenajirüle pia laülaapialuʼumüin wanee wayuu mojujiraakai amaa pia, anasü punoutamaatüle tia chaiwaʼaya jia süpünaluʼu tü laülaapiakat. Nnojorüle punoutuin tia nümaa chi mojujiraakai amaa pia eesüjaʼa naapeerüle pikii nümüin chi laülaashikai. Jee chi laülaashikai naapeechi pia najapuluʼu chi süwaariasekai tü laülaapiakat. Püreesa meechia pia.
26 Shiimain tanüiki pümüin, ojuʼitaleejeechia pia puwalaajapa süpüshuaʼa tü nneerü pujuyaalakat.
27 »Mataasü makai pütchi jümüin: ‹Nnojo kawalaʼatain* putuma puʼwayuuse›.
28 Anuupejeʼe tanüiki jümüin, chi wayuu ananajakai wanee jierü sümaa suchuntaain naaʼin nüinkaain sümaa, müitpa kawalaʼatakai saaʼin nuʼwayuuse nutuma süka jülüjain tia naaʼin.
29 Kaainjarale pia sutuma piirakaain sümüin wanee kasa süka tü poʼu pikialuʼujeekat, müinjatü piyuʼlakai saaʼin sümaa pujutuin shia wattamüin. Shia anaka amülouire puulia waneesia poʼu suulia amülouireeinña pia.
30 Akaataajaʼa neʼe kaainjarale pia sükajee tü pajapü pikiakat, müinjatü pushottakai saaʼin sümaa pujutuin shia wattamüin. Shia anaka aluʼu perale pütüna suulia pajaʼttinnaleeinña.
31 »Mataashii jümünakai amüin: ‹Chi wayuu ooʼulaakai nuʼwayuuse, anasü naapüle sümüin wanee karaloʼuta süpüla suʼunajatüin nuulia›.
32 Anuusaʼa tanüiki jümüin, eeshijaʼa kawalaʼateechire wanee wayuu sutuma nuʼwayuuse müleka nuuʼulaale shia sümaa nnojoluin suʼluwajiraasüin sukuwaʼipa* nümaa wanee wayuu naata. Otta chi wayuu kasaatkai sümaa wanee wayuu ooʼulaaushi kaainjaleechi nia.
33 »Otta jütüjaa aaʼu tü pütchi aapünakat namüin na jutuushinuukana, tü makat mayaa: ‹Nnojo paapüin pünüiki nnojoluinjatüle pikeraajüin shia, pikeraaja tü pünüiki paapakat nümüin Jehová›.*
34 Jee anuu tanüiki jümüin, nnojo jaapüin jünüiki saaʼu kasa eekai eein. Nnojo jaapüin jünüiki saaʼu tü sirumatuʼukat süka chain tü niinasekat Maleiwa süpüla aluwatawaa.
35 Nnojo jaapüin jünüiki saaʼu tü mmakat, süka müin shia maʼaka saaʼin nuuʼuipala Maleiwa, jaʼitakajeʼe saaʼu Jerusalén süka shiain nupueulose chi Aluwataashi miyoʼushikai.
36 Nnojo jaapüin jünüiki jaaʼujiraa süka nnojoluin eein süpüla kasuuin jutuma waneesiaakaijeʼe juʼwala jee yuulin shia jutuma.
37 Müleka ‹Aa› jümüle paala sümüin wanee kasa, ayatajatü jaaʼinrüin tü jümakat. Müleka ‹Nnojo› jümüle, nnojoluinjatüjaʼaya shia. Naatale neʼe tü aküjünakat suulia tia, nümaʼanajeejatü shia chi Yolujaakai.
38 »Jaapüirüjaʼa süchiki tü pütchi makat mayaa: ‹Shiyuʼnnule noʼu wanee wayuu, ayunnajatü noʼu chi makai atuma nia. Sujuttinnüle nai wanee wayuu, ojuttinnajatü nai chi makai atuma nia›.
39 Anuupejeʼe tanüiki jümüin, nnojo peʼipaain pia nümaa wanee wayuu eekai mojulaain. Niʼyaatüle wanee wayuu puwalapünaa, shia anaka aluʼu pujununtaale süpüla niʼyaatajatüin tü wane.
40 Nuunejirüle pia wanee wayuu laülaapialuʼumüin süpüla nüsütüin puulia tü sutujunakat püsheʼin, anasü paapaleere nümüin tü saajunakat püsheʼin.
41 Piʼikajeʼennüle wanee kasa nutuma wanee aluwataashi waneemüin kilómetro, anasü piʼikajaale shia nümüin piama kilómetro.
42 Anashi püsülajüle wanee kasa sujulijünüle paaʼu. Anashi pujuyaajirüle chi wayuu achuntakai ojuyaajaa pümüin.
43 »Jaapüirüjaʼa süchiki tü pütchi makat mayaa: ‹Alinjatü püpüla wayuu, püʼürülainjatpejeʼe püʼünüü›.
44 Anuupejeʼe tanüiki jümüin, alinjana jüpüla na jüʼünüükana, achuntajana jia napüleerua na müliakana atuma jia.
45 Jaaʼinrüle tia, jaʼyeerü jaaʼu nüchooin jia chi Jüshi chakai sirumatuʼu. Nujuʼitirüin chi kaʼikai naaʼu chira wayuu eekai mojulaain jee chira eekai anamiain. Nüʼitirüin juya naaʼu chira eekai lotuin akuwaʼipa jee naaʼu chira eekai nnojoluin lotuin akuwaʼipa.
46 Müleka nayale alin jüpüla na wayuu aikana apüla jia, ¿kasa saamaka tia jümüin? ¿Aashin müinña neʼe nakuwaʼipa na achekajüliikana nneerü neʼipajee na sülaülakana mma?
47 Nayale neʼe jüsaküin na juwalayuukana, ¿kasa anaka aluʼu tia jaajüin? Shiaʼaya saaʼinraka wayuu maʼleekalia tia.
48 Otta müshiʼiya jiakana, aipüraliinjana jia wayuu maʼaka aipüralin wayuu chi Jüshi iipünaajachikai.
Noota
^ «Jamü otta wüinñaasü» maluʼulu tia suluʼu griego.
^ «Chaa iipünaa» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ «Gehena» maluʼulu tia suluʼu griego. Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
