¿Kapüleesüche sümüin wayuu saainjüin kasa anasü?... Aa, wainma na kapüleekana amüin. Aashajaasü tü Wiwüliakat nüchiki wanee jintüi kapüleekai amüin naainjüin kasa anasü. ¿Jarai nia? Nia Josías. Akaisaʼa aleewain nia namaa waneeinnua wayuu aainjakana kasa anasü. Otta akaaliinjünüshi nia natuma. Wekirajaa nüchiki Josías otta na naʼaleewainkana.

Amón nünülia chi nüshikai Josías. Chajachi aluwataain nia saaʼu tü mmakat Judá. Mojulaashi maʼin Amón otta nuʼwaajüin tü maleiwayaasükalüirua. Ouktapa Amón, niashi Josías sülaülaka Judá nüchikumüin. ¡Eetaayaai miyoʼu Josías! Mekiisalüirü neʼe nuuyase. ¿Aainjüshiche Josías kasa mojusü maʼaka naaʼin chi nüshikai?... Nnojo.

Oʼttüshi Josías sünain oonowaa nümaa Jeʼwaa joʼuuiwaʼaya nia. Naya neʼe naʼaleewainka Josías na wayuu aikana apüla Jeʼwaa. Akaaliinjünüshi Josías natuma sünain aainjaa kasa anasü. ¿Pütüja aaʼu kasaichin nanülia na naʼaleewainyuukana Josías?

 Naʼakajee na naʼaleewainkana Josías, eejachi wanee kanüliakai Sofonías. Nünüikimaajachi nia Maleiwa sümüin tü wayuukalüirua chaa Judá. Nüchiaapuʼuin na wayuukana suulia aʼwaajaa maleiwayaasü. Oonooshi Josías sümaa tü nümakat Sofonías makalaka niain nuʼwaajüin Jeʼwaa suulia tü maleiwayaasükalüirua.

Chi wanee naʼaleewainkai Josías nia Jeremías. Joʼuujiraashii naya otta pejejiraasü tü nepiakat. Aleewashi maʼin Josías nümaa Jeremías. Shiasaʼa müin ouktaka Josías, nüshajaka Jeremías wanee jayeechi süchikimaajatü mojuin naaʼin nüchiirua chi naʼaleewainkai. Akaaliinjiraashii naya süpüla naainjüinjanain kasa anasü otta süpüla noonooinjanain nümaa Jeʼwaa.

¿Kasa shikirajaka anain waya nukuwaʼipa Josías?... Naainjüin Josías tü kasa anasükat joʼuuiwaʼaya nia. Nütüjaa aaʼu aleewainjachin nia namaa na wayuu aikana apüla Jeʼwaa. Anasü püshatüle nukuwaʼipa Josías, naya paʼaleewainjanaka na wayuu aikana apüla Jeʼwaa otta na wayuu akaaliinjeenakana pia sünain aainjaa kasa anasü.