Timoteo nia wanee jimaʼai anakai maʼin amüin akaaliinjaa wayuu. Oʼunüshi nia wattapünaa sünain akaaliinjaa wayuu. Talatüsü maʼin naaʼin sutuma naainjüin tia. ¿Pücheküin takuentajüin pümüin nüchiki Timoteo?...

Miyoʼushi Timoteo chaa suluʼu tü mma kanüliakat Listra. Ekirajünüshi nüchiki Jeʼwaa joʼuuiwaʼaya nia sutuma tü noushukot otta niikat. Loida sünülia tü noushukot otta Eunice sünülia tü niikat. Miyoʼupa Timoteo, keeʼireesü maʼin naaʼin nikirajüin na wayuukana nüchiki Jeʼwaa.

Miyoʼupa Timoteo, asakinnüshi nutuma Pablo: «¿Oʼuneeshi pia tamaa sünain aküjaa pütchi wattapünaa?». «Aa, oʼuneeshi taya pümaa», nümaka Timoteo. Kettaaichipa Timoteo süpüla oʼunaa wattapünaa sünain akaaliinjaa wayuu.

Oʼuna müshijaʼa Timoteo nümaa Pablo suluʼumüin wanee mma kanüliaka Tesalónica chaa Grecia. Wattasü tia mmakat napüleerua  otta anualuʼushii naya. Antamüshiijaʼa naya chamüin jee noʼttaka sünain ekirajaa wainma wayuu nüchiki Jeʼwaa. Eejanaka waneeinnua wayuu aashichijaakana otta eʼreekana wayumüin nümüin Pablo otta Timoteo. Makalaka noʼunüin yalejeechiki süpüla naküjüinjanain pütchi suluʼumüin waneeirua mma.

Maʼaka jeʼra kashi süchikijee tia, nuchuntüin Pablo nümüin Timoteo nüleʼejüinjachin nüchikuaʼa chamüin Tesalónica süpüla nülapalaainjachin naaʼu na anoujüshiikana chayaa. Mojulaashii na wayuu chajanakana Tesalónica. Akatsaʼa yalayalain naaʼin Timoteo otta shapaain naaʼin naaʼu na anoujüshii chajanakana, makalaka nüleʼejüin nüchikuaʼa chamüin. Nüleʼejapa nüchikuaʼa chejee Tesalónica, antüshi nia nümaʼanamüin Pablo sümaa pütchi anasü nachiki na anoujüshii chajanakana Tesalónica. Anashii napüshuaʼa na anoujüshiikana.

Wainma juya nülatiraka Pablo nümaa Timoteo. Nüshajüin Pablo namüin na anoujüshiikana nnojolin eein wanee wayuu makai aka naaʼin Timoteo. Nia anaka maʼin süpüla akaaliinjaa na anoujüshiikana süka alin Jeʼwaa nüpüla otta alin na wayuukana nüpüla.

¿Aishii püpüla na wayuukana otta pikirajeein naya nüchiki Jeʼwaa?... Paainjüle tia, talateerü maʼin paaʼin maʼaka naaʼin Timoteo.