Anuu tü alatakat nümüin Toni: Neewainsü surouyain wanee miichi wanaa sümaa nüshaittüin woola namaa naʼaleewainyuu. Nnojotpejeʼe naaʼinjeein tia.

¿Kasajeʼe paainjaka sülatüle pümüin tia?

EESÜ APÜNÜINSÜ KASA EEKA SÜPÜLA PAAʼINRÜIN:

1. Eeshi süpüla püpantajaain.

2. «Nia kasitka chiran», eeshi süpüla pümüin.

3. Eesü süpüla püküjüin nümüin chi kepiashikai tü kasa peewainkat otta «tawalaajeerü shia» pümüin nümüin.

Eeshi puwataweere maʼaka süküjüin tü pütchikat 1. Shiapejeʼe anain püküjüle süchiki tü kasa mojusü paaʼinrakat, jaʼitasü kasain peewain.

1. Süka anain püküjüle süchiki.

   «Keeʼireesü waaʼin lotuin wakuwaʼipa sünain süpüshuaʼaleʼeya kasa», müsü tü Wiwüliakat (Hebreokana 13:18, TNM).

2. Süka moteerüin naaʼin paainjala na waneeinnua.

   «Chi eekai nuunjulajüin süchiki naainjala, mojeerü nukuwaʼipa. Aluʼusaʼa chi eekai nüküjüin shia sümaa nuuʼulaain suulia, amüliajüneechi», müsü tü Wiwüliakat (Proverbios 28:13, TNM).

3. Süka talateerüin naaʼin Jeʼwaa putuma.

   «Niyouktüin Maleiwa na mojulaashiikana, aleewapajaʼa nia namaa na lotokana akuwaʼipa», müsü tü Wiwüliakat (Proverbios 3:32, TNM).

Eesü wanee majayüt Karina sünülia, 20 suuyase, suunjulaja achikit nuulia süshi shiʼitaanüin sümüin wanee multa sutuma suwateʼerüin maʼin wanee kemion. Atüjaana aaʼu tia mapa. «Niʼrüin chi tashikai tü multakat wanee juya süchikijee, kachajaalasü taya saaʼujee tia», sümaka Karina.

¿Kasa watüjaka sünainjee tia? «Wainma wachajaala wounjulajüle süchiki tü kasa mojukat watuma, wasoukteerü aaʼu tia mapa», müsü Karina.

«Nnojotsü wayuu eekai aaʼinrüin tü anasükat waneepia», müsü tü Wiwüliakat (Santiago 3:2). Weeʼiyatüin laülaain otta nnojoluin yaletüin waaʼin waküjüle süchiki tü kasa mojukat watuma.

Tü wanee kasa paaʼinrüinjatkat shia pütüjain sünainjee tü kasa mojukat putuma. «Eesü tü tatüjakat sünainjee tü kasa mojusü taaʼinrakat, tanouktüin takuwaʼipa eere kasa nnojotka anain tatuma. Anaka sukuwaʼipa tatuma wanee sukueena», müsü sünüiki Vera.

¿Kaseerü paaʼinraka peewainre wanee wisiküleeta naʼanapajirala pia chi püshikai?

• Yüüteechi pia nuulia, eesü nnojoleerüle nütüjaain saaʼu.

• Püküjeerü nümüin tü alatakat.

• Püküjeerü tü alatakat sümaa süsirüin shia wayuu naatajatü paashin.

¿Kaseerü paaʼinraka amülouire putuma wanee examen saaʼujee mekirajaain pia?

• «Kapüleesü maʼin tü examenkat», ¿meechi pia?

• «Tasirü saaʼujee nnojoluin tekirajaain», ¿meechi pia?

• «Jaʼisü tasha nümüin chi profekai», ¿meechi pia?

 Jülüja paaʼin tüü: pialejeʼe chi püshikai jee chi profesorkai, ¿jameerü pünüiki nüküjamaatüle wanee püchon süchiki tü kasa mojukat nutuma? ¿Jameerü pünüiki nuunjulajüle süchiki tü kasa mojukat nutuma?

Soto paaʼin wanee kasa eeka mojuin putuma soʼu juyakat tiainka jee pusoukta shiʼipajee tü asakinnakalü anain yaa:

¿Kasa mojuka putuma? ¿Kasa paaʼinraka?

• Tounjulaja achikirü wanee kasa.

• Naata neʼe chi teʼitaakai saaʼu taainjala.

• Taküjamaata achikit shia.

¿Jamüsü paaʼin saaʼujee puunjulajüin süchiki tü kasa mojukat putuma?

• ¡Talatashaatashi taya! Nnojoishi jamajüin taya.

• Mojusü taaʼin. Anasüjeʼe shiale taküjüin tü shiimainkat.

¿Jetsüjeʼe tü anakat süpüla paaʼinrüin?

¿Kasa pütüjaka sünainjee mojuin putuma tia kasa paaʼinrakat?

¿Jamüsü kapüleeka tamüin taküjüin süchiki tü kasa mojukat tatuma?

¿Jameerü sünüiki wayuu püchiki puunjulajüle süchiki tü kasa mojukat putuma?

¿Jameerü nanüiki püküjüle süchiki tü kasa mojukat putuma? (Lucas 16:10).