«Nipia Maleiwa», maluʼulu tü pütchikat Betel (Weteet) süka hebreo (Génesis 28:17, 19). Pütchikat tia, sünüliasü tü piichi kaluʼukat na aküjüliikana pütchi sainküin mma, yala akumajünüsü sukuwaʼipa tü aküjaakat pütchi. Chashii Nueva York, Estados Unidos na Laülaashii Jülüjakana Aaʼin na Aküjüliikana Pütchi sainküin Mma. Jülüjüsü naaʼin chejee süpüshuaʼa tü aainjünakat suluʼu tü Weteet eekat sainküin mmaka. «Weteliita», münüshii na wawalayuu aʼyataakana suluʼu Weteet. Yala, eküshii, atunküshii, aʼyataashii jee nekirajaa anainrü tü Wiwüliakat sümaa paaʼinwajiraain naya (Salmo 133:1).

Aʼyataashii süka süpüshuaʼa naaʼin. Na tooloyuu jee jieyuu aʼyataakana suluʼu Weteet, anasü nanoula jee aʼyataashii waneepia sünain aainjaa tü nüchekakat Maleiwa sümaa palajanain natuma tü Nuluwataayakat (Mateo 6:33, TNM). Mayaapejeʼe saapünüin namüin neküin, eeinjanale natunküin otta süsülajünüin namüin tü nayaʼlajüinjatkalü aka tü choʼujaakat namüin, nnojoishii aʼyataain saaʼu nneerü. Eeshii na aʼyataakana suluʼu opisiina, na aʼlakajaakana, na eitajakana eküülü, na akumajakana karaloukta sükajee wanee maakina, na epitajakana, na akumajakana wanee kasa eekai sumojujaain otta waneeirua aʼyatawaa.

Süpülajatü süküjünüin tü pütchi anasükat. Weteet, süpülajatü sütüjaain aaʼu wainma wayuu tü shiimainkat nüchiki Maleiwa. Anuusaʼa sukuwaʼipa sünain karalouktakat tüü. Jülüjüsü naaʼin na Laülaashii Jülüjakana Aaʼin na Aküjüliikana Pütchi sainküin Mma süshajia tü karalouktakat. Aluwataanüsü suluʼupünaa computador namüin wainma alatirülii pütchi. Eʼinprimiijünüsü sükajee wanee maakina kajaalapüsü maʼin süpüla suluwataanüin suluʼumüin 110.000 outkajaalee. Tü naainjakat na Weteliitakana süpüla sukumajünüin karalouktakat tüü, süpülajatü süküjünüin tü pütchi anasükat (Marcos 13:10, TNM).

• ¿Jaralii na aʼyataakana suluʼu Weteet? ¿Kasa aapünaka namüin?

• ¿Kasapülajatü tü aʼyatawaa aainjünakat suluʼu Weteet?