Oʼutuupüroʼu 10 soʼu 2022, sujutuin Rusia wainma wonpa saaʼu waneirua mma chaa Ucrania. Naaʼinrüin tia süka süsoteʼennüin wanee puente chaa Rusia antaka Crimeamüin. Süpülapünaa sülatüin tia, aashajaashii waneinnua poliitiko süchiki Armagedón.

•   «Soʼujeʼereʼeya tü juya nuluwataakalü oʼu Kennedy [aluwataapuʼukai saaʼu Estados Unidos] otta tü alatakat chaa Cuba soʼu 1962, atüjaana aaʼu pejein maʼin Armagedón. [...] Eere wanee atkawaa ajaʼttireetkat wayuu süpüshuaʼa sainküin mma eesüjaʼa shiaipale oʼttuin Armagedón» (Joe Biden, aluwataai saaʼu Estados Unidos, oʼutuupüroʼu 6 soʼu 2022).

•   «Shiimainña kepiain waya soʼunnaa Armagedón tü eekat süpüla ajaʼttirüin tü mmakat» (nünüiki tia Volodímir Zelenski chi aluwataakai saaʼu Ucrania wanaa sümaa nüsakinnüin süchiki tü wonpa eekat süpüla ajaʼttirüin wayuu süpüshuaʼa; BBC News, oʼutuupüroʼu 8 soʼu 2022).

 ¿Anteetche Armagedón sutuma susoteʼennüin waneirua wonpa? ¿Jamüsüche sünüiki tü Bibliakat süchiki tia?

 Nnojotsü müinjatüin sukuwaʼipa. Uwatua neʼe süküjünüin tü pütchikat Armagedón suluʼu tü Bibliakat, suluʼu Alateetkat Mapeena [Apocalipsis] 16:16. Tia pütchikat nnojotsü maluʼuluin natkaajiraainjanain na sülaülashiikana mma. Shia tü kaʼi nütkaainjachikalü oʼu Maleiwa namaa na sülaülashiikana mma (Alateetkat Mapeena 16:14). Soʼunnaa Armagedón, najaʼttireena Maleiwa napüshuaʼa na sülaülashiikana mma (Daniel 2:44).

 Pütüjaweere sooʼomüin süchiki tü alatüinjatkat sümüin tü mmakat soʼunnaa Armagedón paashajeʼera tü pütchikat «¿Kasa wayu Armagedón?».

 Nnojoleerü müin shia. Jaʼitairü nasoteʼerüin wonpa na sülaülashiikana mma nnojoleerüin nuuʼulaain Maleiwa sajaʼttinnüin tü mmakat. Müsü sünüiki tü Bibliakat:

•   «Tü mmakat, ayateeria eein shia waneepia» (Eclesiastés 1:4).

•   «Nayeena kepiaka suluʼu tü mmakat süpüla kaʼikat süpüshuaʼa na lotokana akuwaʼipa» (Salmo 37:29).

 Wayaawata aaʼulu sünainjee tü pütchi aküjünatüjütkalia suluʼu tü Bibliakat jee tü alatakat maaʼulu, sülüʼülüin sükalia süpüla sajaʼttajatüin tü kasa alatakat sainküin mma (Mateo 24:3-7, TNM; 2 Timoteo 3:1-5). Süpüla pütüjaain saaʼu tü sümakat tü Bibliakat süchiki tü alatüinjatkat mapeena pikirajaa wamaa sünain tü Bibliakat.