Aa. Aluʼujasaʼa makatüle chi wawalakai sümaa tü wawalakat sutuma sülatalaʼa sümüin wanee kasa nümüin jee kapüleere maʼin nümüin oʼunaa nipialuʼumüin. Nnojorüle müin shia, outkajaainjana apünüinshii laülaashii namaa süka kaainjalain naya, atüjaana aaʼu sükajee tia eein süpüla namaʼüjiraain nakuwaʼipa (1 Cor. 6:18).

Sülatawaipa tia, nekirajaainjatü anain na laülaashiikana palajana müleka choʼujaale naneekünüin apünüinshii laülaashii süpüla nasakirüin süchiirua tia alatakat. Jülüjainjatü naaʼin tüü: ¿Amüraajiraashiiche naya wawalayuukana? ¿Nachiaainche naya paala na laülaashiikana sutuma müin nakuwaʼipa maʼaka saaʼin nakuwaʼipa wayuu eekai kasaalüinnapain? ¿Jamüshiiche natunkaka suluʼu wanee piichi namüiwaʼa? ¿Aashajaajiraashiiche naya süpüla naaʼinrüinjatüin tia? ¿Alatalaʼa müsüche wanee kasa kapüleeka aaʼujee namüin nnojoluin makatüin naya namüiwaʼa suluʼu tia piichikat? (Ecl. 9:11). ¿Jalajana naya atunkuin? Süka naatawalin tü alatawaikat namüin na wawalayuukana, eesüjaʼa eere waneirua kasa nekirajaainjatkalü achiirua na laülaashiikana.

Nekirajaapa na laülaashiikana sünain tia alatakat, natüjaajeerü aaʼu choʼujaale naneeküin apünüinshii laülaashii süpüla nasakirüin süchiirua tia.