KOJUTÜSHAATASÜ tü waʼyataainkat nümüin Jeʼwaa. Nnojotpejeʼe müin shia namüin napüshuaʼa na waküjakana amüin pütchi, jaʼitakajeʼe neʼe na kamalainkana amüin tü sümakat tü Wiwüliakat, nnojotsü choʼujaain naashin ekirajawaa sünain tü Wiwüliakat wamaa.

Tia shia tü alatakat nümüin Gavin. Oʼunapuʼushi nia sünain tü outkajawaakat, nnojotpejeʼe nücheküin nikirajünüin sünain tü Wiwüliakat. Naashin Gavin, nnojotpuʼusü nütüjain apüleerua tü Wiwüliakat otta nnojoishi nia alatireein japülii noʼupala na waneeinnua saaʼujee tia. Mmotshi nia seema nikerotüin sünain anoujaa otta nnojoishi nia shimeeʼerainpalainjachin wayuu naashin. ¿Jamüsüje pünüiki nüchiki Gavin piʼraajüle nia? «Nnojoleechi nia ekirajaain sünain tü Wiwüliakat», eeshijaʼa süpüla pümüin nüchiki. Anasü sukuwaʼipa wayuu sutuma tü sümakat tü Wiwüliakat. Anuujeseʼe nünüiki Maleiwa: «Meerü aka saaʼin joojotshi tü tamakat, maʼaka saaʼin shimemajüle juya saaʼu tü alamakat» (Deut. 31:19, 30; 32:2, TNM). Wekirajaa sünain pienchisü kasa süchiki tü joojotshikat süpüla watüjainjanain aküjaa pütchi sümüin wayuu süpüshuaʼa (1 Tim. 2:3, 4).

Nnojotsü alin sütaʼa tü joojotshikat. Akumajaasü tü joojotshikat sutuma süsamala tü jouktaikat, eeʼiyala eeʼiyala müsü shiʼipaʼaya, nnojotsü akumajaain shia uatuwoʼushi. ¿Jamüsü maka aka saaʼin joojotshi nünüiki Jeʼwaa? Shia süka nnojolin alin nünüiki naashajaapa namaa na israeliitakana, anamia nia namüin otta kamaneeshi nia. Washateerü nukuwaʼipa Jeʼwaa kojutüle wamüin tü nanoujakalü anain na wayuu waashajaakana amaa. Wachajaainjatü sukuwaʼipa süpüla nasakireʼerüin naaʼin namüiwaʼa sünain tü wamakat namüin otta süpüla nüneeküin süka naaʼin namüiwaʼa tü anakat süpüla naaʼinrüin. Waaʼinrüle tia, jülüjeerü naaʼin na wayuukana tü wamakat namüin otta naapaajeerü amaa tü pütchikat.

Asamatsü naaʼin wayuu sutuma tü joojotshikat. Meerü süsamatkai naaʼin na wayuu waküjakana amüin pütchi wachajaale sukuwaʼipa süpüla nayaawatüin saaʼu tü shiimainkat. Shia naaʼinrakat tia Chris, chi palajaikai aküjüin pütchi nümüin Gavin. Nnojoishi nüpüleeruain aaʼin nia otta nüchajaain sukuwaʼipa süpüla kamalainjatüin nümüin yootoo süchiki tü Wiwüliakat. Nüküjüin Chris nümüin Gavin kasain maʼin saashajaain achiki tü Wiwüliakat otta nüküjüin nümüin niyaawateerüin saaʼu tü ekirajünakat sünain tü outkajawaakat nikirajaale sünain tia pütchikat. Mapa, nukuentajüin nümüin nunoujain sünain tü sümakat tü Wiwüliakat sutuma nikirajaain sünain tü pütchi ekeraajakat suluʼujee tü Wiwüliakat. Kojuyatua naashajaain süchiki tia. Sutuma kamalain tia nümüin Gavin, anasü nümüin nikirajünüin sünain tü Wiwüliakat.

Choʼujaashaatasü tü joojotshikat. Jouktaleʼupa chayaa Israel, jaʼishaanashi chi Kaʼikai otta eesü meʼitüinre tü juyakat soʼu kojuya kashi. Nnojorüle joojotshi suʼunnaa tia, jutsüje tü maatakalüirua. Nüküjatüjülia Maleiwa müinjatüin wüinyaasükai saaʼin wayuu shiiʼiree aapajaa nünüiki (Amós 8:11). Nüküjapejeʼe müinjanain aka saaʼin joojotshi na anoujashii chainjanakana chaa iipünaa sutuma naküjüinjatüin sümüin wayuu tü pütchi anasükat (Miq. 5:7). Akaaliinjünüshii naya natuma na anoujashii yaainjanakana kepiain yaa saaʼu Mmakat (Juan 10:16). Tü pütchi waküjakat sümüin wayuu, shiaʼaya kateetkalü atuma noʼu na aapajeekana nünüiki Jeʼwaa. ¿Kojutüsüche wamüin tü pütchi waküjakat?

Tü joojotshikat shia wanee kasa anashaatasü naapaka Jeʼwaa (Deut. 33:13). Tü pütchi waküjakat shia wanee kasa anashaatasü naapaka Jeʼwaa namüin na aapajakana wanüiki. Ichaʼasa anain nukuwaʼipa Gavin sutuma nikirajaain sünain tü Wiwüliakat, nütüjaaitpa aaʼu süpüshuaʼa tü nüsakitkalü anain nümaiwa. Woutiisamaatüshi nia otta aküjüishi nia tü pütchi anasükat sümaa Joyce, tü nuʼwayuusekat. Talatüshii maʼin naya.

Jülüjale waaʼin müin aka saaʼin joojotshi tü waʼyataainkat sünain aküjaa pütchi, kojuteerü shia wamüin. ¿Suluʼu jamüin? Weʼrüin chüʼlüin tü mmapaʼakat sutuma tü joojotshikat, aluʼujasaʼa niʼitüle neʼe waneeshia noʼu joojotshi nnojotsü weʼrüin kasain chüʼlüin sutuma. Tü waʼyataainkat nümüin Jeʼwaa waneʼewai wakua müsü aka saaʼin waneeshia noʼu joojotshi, nnojotsü jaʼyayaain, shiasaʼa jülüjale waaʼin naʼyataain na wawalayuukana napüshuaʼa sainküin mmakat, weʼreerü sünain süküjünüin tü pütchi anasükat sainküin mmakat süpüshuaʼa (Mat. 24:14). Aneerü naaʼin na wayuukana watuma müleka kamaneere waya namüin, müle süsamatkai naaʼin sutuma wanüiki otta wayaawatüle saaʼu choʼujaain waküjüinjatüin tü pütchikat namüin.