Suluʼu tü Wiwüliakat, tü pütchikat «lotoo akuwaʼipaa», sünainjeejatü wanee pütchi griego. Tü aküjüneekat süka tia pütchikat shia süchiki nukuwaʼipa wanee wayuu eekai anamiatüjülin, eekai anain nukuwaʼipa suʼupala wayuu otta ponuuka aaʼinchi nia süka wulein nukuwaʼipa.

Oonooshii na anoujashiikana sümaa tü sümakat tü Wiwüliakat, tü makat yaa: «Keeʼireesü waaʼin lotuin wakuwaʼipa sünain süpüshuaʼaleʼeya kasa». ¿Kasa waaʼinrüinjatka süpüla woonooinjanain sümaa tia pütchikat?

Watta naalii wayuu eirakaakana suluʼu rouya süpülapünaa ojuʼitaa nepialuʼujee. Naaʼinrüin tia süka aneein nayolojo. Eepejeʼe wanee kasa jülüjaleeinjatka maʼin waaʼin suulialeʼeya tü wayolojokot, shia tü suluʼukat waaʼin. Sükajee tü kasa suluʼukat waaʼin, atüjaaneerü aaʼu mojulaale waya jee anamiale waya jaʼitairü jamawalain wayolojo.

Saashin tü Wiwüliakat, suchuntaain waaʼin waneepia aaʼinraa tü kasa mojusükat. «Tatüjaa aaʼulu wayuu süpüshua sünain mojulaain joʼuuiwaʼaya», müshi Maleiwa (Gén. 8:21). Loteere wakuwaʼipa sünain süpüshuaʼaleʼeya kasa, eejiraainjana waya sümaa tü kasa mojusü suchuntaakat waaʼin. Nüküjüin Pablo eejiraain nia sümaa tia, müshi nia: «Tacheküin taaʼinreein tü kasa anasü nuluwataakat anain Maleiwa [...]. Otta müleka shiimüinre tia, ¿jamakaʼa taneekakaʼa waneepia aaʼinraa tü kasa mojusükat? Shia süka taleʼeruʼuin kaainjalaa. Je sükajee tüü, müsü aka eekai wane atkawaa sütüma tü takuaippa jeketkat. Je müshi aka kapükai taya, süka nnojolüin tountüin taaʼinrüin tü anasükat» (Roma 7:22, 23).

Suchuntaale waaʼin aaʼinraa wanee kasa mojusü jookalü apüla waya, eesü süpüla wachecherüin waaʼin, nnojo woonooin sümaa tü kasa mojusü suchuntaakat waaʼin. Nnojoliishii waya süchepchiain tü kasa mojusü suchuntaakat waaʼin. Wayaʼala neʼe wamüiwaʼa aneekaka waaʼinrüinjatüle tü kasa anasükat jee shiale tü mojusükat. Wanaa sümaa wayouktüin tü kasa mojusü suchuntaakat waaʼin, shia wayouktaka ashataa nakuwaʼipa na nnojoliikana lotuin akuwaʼipa.

Süpüla lotuinjatüin wakuwaʼipa sünain süpüshuaʼaleʼeya kasa, icheinjana waya süchiirua tia. Watta naalii na aneekana akuwaʼipa suʼupala wayuu, jaʼitairü naaʼinrüin tü kasa mojusükat. «Nnojotsü mojuin tü taaʼinrakat», müshii naya shiiʼiree neʼe anayaain nakuwaʼipa suʼupala wayuu. Anuu tü sümakat tü karalouktakat The (Honest) Truth About Dishonesty (La [honesta] verdad sobre la deshonestidad): «Eeshii waküjüle alawaa sümaa lotuin wakuwaʼipa waaʼinruʼu. Emeejiraapejeʼe neʼe waya wamüiwaʼa». ¿Kasa akaaliinjeenaka waya süpüla wayaawatüin saaʼu müleka lotule wakuwaʼipa sünain süpüshuaʼaleʼeya kasa?

Watta naalii na ayaawatakana saaʼu shiain akaaliinjain naya tü Wiwüliakat süpüla lotuinjatüin nakuwaʼipa. Shiaʼala neʼe tü Wiwüliakat aküjaka tü anakat süpüla naaʼinrüin wanee wayuu süpüla  wayuuinjachin anamia nia (Sal. 19:7). Jamüsüjaʼa shia, süküjüin tü aneetkalü atuma nukuwaʼipa wanee wayuu sümaa nüpüshi, sünain niʼyataain, süpüla wulein nukuwaʼipa otta süpüla anain nunoula. Mayaainjeʼe kakaliairüin süshajünüin tü Wiwüliakat, ayatayülia jaloulin sümüin wayuu maʼleekalia tü pütchi suluʼukat. Loteerü nukuwaʼipa chi wayuu eʼitaakai suluʼu nukuwaʼipa tü sümakat tü Wiwüliakat.

Sutuma wapüleeruaanüin maʼin aaʼin süpüla waaʼinrüinjatüin kasa mojusü, eesüya wanee kasa waaʼinrajatkat süpüla lotuinjatüin wakuwaʼipa. Choʼujaasü wachuntüinjanain kaaliinwaa nümüin Maleiwa (Filip. 4:6, 7; 13, TNM). Waaʼinrüle tia, nükaaliinjeena waya Maleiwa süpüla ayatüinjatüin waaʼinrüin tü kasa anasükat jaʼitainna wapüleeruaanüin aaʼin otta loteerü wakuwaʼipa sünain süpüshuaʼa kasa.

Hitoshi, chi wayuu aashajaanakai achiki paala, eʼrüshi kasa anasü sutuma lotuin nukuwaʼipa sünain süpüshuaʼa kasa. Aapünüsü wanee aʼyatawaa nümüin eere kojutüin amüinyüü na lotokana akuwaʼipa. «Talatüshi maʼin taya süka tantüin sünain wanee aʼyatawaa eere nnojoluin suchuntünüin tamüin taaʼinrüinjachin wanee kasa yarütteetka atuma takuwaʼipa».

Anuu nachiki waneeinnua wayuu eʼrakana kasa anasü maʼaka naaʼin Hitoshi sutuma lotuin nakuwaʼipa sünain süpüshuaʼa kasa.

• Wuleerü waaʼin

  «Ooʼulaasü taya suulia koleejiaa wanaa sümaa 13 touyase. Toʼttaka sünain ‹aʼyatawaa› namaa waneeinnua kaʼruwarannuu. Süpüshuaʼa tü nneerü tamaʼanajatkat, taʼluwala. Kakalia mapa, kaʼwayuusesü taya. Tekirajünaka sünain tü Wiwüliakat nümaa chi taʼwayuusekai, nekirajüin waya na aküjüliikana pütchi nüchiki Jeʼwaa. * Wekirajaa anainrü niyouktüin Jeʼwaa na nnojoliikana lotuin akuwaʼipa, wanoukteʼerüinjeseʼe wakuwaʼipa [Proverbios 6:16-19]. Woutiisashii waya soʼu juyakat 1990 süpüla waküjüliinjanain pütchi.

  »Wainmapuʼusü kasa aʼluwajuushi tamaʼana chaa tepialuʼu, aluʼujasaʼa maaʼulu yaa, nnojoluitpa eein tamaʼana kasa aʼluwajuushi. Wuleitpa taaʼin süka nnojoluitpain taʼluwajüin. Sotojoole taaʼin tü takuwaʼipakat tamaiwa taʼluwajaiwaʼaya, taapüin analuʼut nümüin Jeʼwaa saaʼu sümülialaain naaʼin taalin. Jutatüitpa taaʼin sutuma anain takuwaʼipa noʼuluʼu Jeʼwaa» (Cheryl, Irlanda).

  «Nütüjaapa saaʼu chi talaamainkai nnojoluin taapaain nneerü süpüla taküjüin alawaa, ‹wayuu anamia pia nutuma chi Pümaleiwasekai, anataʼaleeshiijaʼa maʼin waya süka yaain pia piʼyataajiraain wamaa›, müshi tamüin. Wuleesü taaʼin noʼuluʼu Jeʼwaa sutuma lotuin takuwaʼipa sünain süpüshuaʼa kasa. Otta müsia, takaaliinjain tapüshi jee na teʼraajüinkana süpüla lotuin nakuwaʼipa» (Sonny, Hong Kong).

• Nnojoleerü shapaain waaʼin

  «Aʼyataashi taya suluʼu wanee wanko. Watta naalii aʼyataalii suluʼu wanko eekai nnojoluin lotuin nakuwaʼipa sutuma kachiiruain naaʼin tü nneetkat. Naashin nayakana, müleka lotule nakuwaʼipa nnojoleena akanajüin nneerü jee nnojoleerü anaataain nakuwaʼipa. Nnojotsü mojuin naaʼinrüle tia naashin. Tatüjaapejeʼe aaʼu nnojoluin shapaain naaʼin wanee wayuu müleka lotule nukuwaʼipa. Ayateechi taya lotuin takuwaʼipa jaʼitairü kasain alatüin. Natüjaa aaʼu na talaamainkana nnojoleechin toonooin sümaa naʼalain otta nnojoleechin taya aküjüin taʼalain namüin» (Tom, Estados Unidos).

• Kojuteena waya amüinyüü

  «Machikisat waneeirua kasa chaa eere taʼyataain, ‹nnojo püküjüin süchiki›, nümüsü taya chi tekiipüʼüjanakai sünain aʼyatawaa. Nnojotpejeʼe taya oonooin nümaa. Sütüjaanapa aaʼu jaralin aʼluwajüin tia kasakalüirua, talatüshi maʼin tamaa chi sülaülakai tü konpainyiiakat süka nnojoluin toonooin namaa na kaʼruwarannuukana. Eʼrüsü kasa anasü wayuu lotule sukuwaʼipa jaʼitairü kapüleein sümüin. Kojutüsü wayuu amüinyüü müleka lotule sukuwaʼipa otta anoujüna anainrü sünüiki» (Kaori, Japón).

Lotule wakuwaʼipa sünain süpüshuaʼa kasa, wuleerü waaʼin, nnojoleerü shapaain waaʼin otta kojuteena waya amüinyüü. ¿Aashin anain lotule nukuwaʼipa wayuu?