PÜTCHI SÜNAINKA SÜTA TÜ REWIISÜTAKAT | NNOJOTSÜ AJAʼTTINNÜIN TÜ WIWÜLIAKAT
Nnojotsü ajaʼttüin sutuma ittaa
AJAʼTTATAAIRÜJEʼE SHIA. Na ashajakana tü Wiwüliakat otta na akopiaajakana shia, nashajüin sünain papiro otta pergamino (2 Timoteo 4:13, TNM). * ¿Jamüsü süpüla sajaʼttataairüin tü Wiwüliakat sutuma süshajünüin sünain papiro otta pergamino?
Tü papirokot, shaashaasü, moolomaatüsü otta jawaʼawasü shia. Richard Parkinson otta Stephen Quirke, ekirajaashii sünain nakuwaʼipa na egipciokana, naashin nayakana, ekuu ekuu maaʼatsü mapa tü papirokot. Akaʼaya shia, joosü süpüla tukuin otta ittüin shia sünaajuushire. Sojoitünüle wanee rooyo aainjuushi süka papiro, shikajüin kookoocherü jee tü jeyuu kasuutannuukalüirua. Eesü waneeirua rooyo papiro sümaiwajatü, ajaʼttamaatüsü sutuma shiʼrajaanüin pejeewa otta sutuma tü saamatshikat.
Kakaliasü tü pergaminokot suulialeʼeya tü papirokot. Eepejeʼe süpüla sajaʼttamaatüin nnojorüle saaʼinmajünüin suulia kaʼi, saamatshi jee suulia tü luusakat. * Eesü süpüla keʼein shiaʼaya. Saashin tü karalouktakat Everyday Writing in the Graeco-Roman East (La escritura cotidiana en el Oriente Grecorromano), palit tü rooyo sümaiwajatkat nnojotka ajaʼttüin, wainmaleesia tü ajaʼttakat. Müleka sajaʼttayülüje tü rooyo ashajünakat aluʼu tü Wiwüliakat, nnojotsüje jaralin atüjaain saaʼu tü pütchi sulujutkat.
¿JAMÜSÜ EEYÜTKALIA SHIA? Nuluwataain Jeʼwaa na aluwataashiikana saaʼu Israel sünain ashajaa wanee sukoopiain tü pütchi naapakat namüin na israeliitakana (Deuteronomio 17:18). Jee müsia, watta naalii na ashajapuʼukana sukoopiain tü Nünüikimaajatkat Maleiwa, müsüjeseʼe wattain saalii sukoopiain suluʼupünaa tü ekirajüleekat tü judíokalüirua chaa Israel otta Macedonia süpülapünaa juyakat sien (Lucas 4:16, 17; Aluwataaushikana 17:11). ¿Jamakuwaʼipat süpüla eeinjatüin süpüshi tia rooyokalüirua maaʼulu yaa?
Tü Rollos del mar Muerto münakat, kakalia anaajuushin suluʼu wanee süta aainjuushi süka pootshi. Chajatü suluʼu wanee mma eere nnojoluin shiʼitüin maʼin juya, suluʼujatü koʼushii.
«Nanaajaapuʼuin na judíokana tü rooyokalüirua suluʼu wanee süta aainjuushi süka pootshi suulia jamajüin shia», müshi Philip Comfort wanee ekirajaai sünain tü Nüchikimaajatkat Jesukürisüto. Mapuʼusü süta tü rooyokalüirua natuma na nikirajüinkana Jesuʼuya. Müsüjeseʼe süntünüin anain waneeirua rooyo suluʼu wanee süta aainjuushi süka pootshi, suluʼu paü eere kojoin piyuushi, suluʼu wanee koʼushii jee suluʼu mma eere nnojoluin shiʼitüin maʼin juya.
TÜ EEKAT SUTUMA MAAʼULU. Eeyülia wainma saʼatairua tü Nünüikimaajatkat Maleiwa ashajuushika sümaiwa; eesü eekai sülatüirüin suulia tosmiit juya süchikijee süshajünüin. Nnojotsü wanee karaloukta kakaliaitkat suluʼu süshajuushin jee wainmain sukoopiase maʼaka saaʼin tü Wiwüliakat.
^ püt. 3 Tü papiro ashajünapuʼukalü aluʼu sümaiwa müsü aka saaʼin wanee karaloukta, akumajünüsü süka wanee mojuui shirokujatü wüin. Tü kanüliakat pergamino, aainjuushi süka paaʼata.
^ püt. 5 Tü pütchikat Declaración de Independencia de los Estados Unidos, ashajünüsü sünain wanee pergamino. Nnojoyülia süsaʼwatüin 250 juya süchikijee süshajünüin otta nnojoluitpa jaʼyain maʼin shia süpüla aashajeʼennaa.
