Müsü Isaías 60:1: «Püshaʼwalaa nii waaʼiraa, warattuui kasa putuma, jorottusü maʼin tü luusa pümaʼanajeejatkat, jaʼyasü paaʼu tü nüpülainkat Jehová». Sünainjee tü ashajünakat süchikijee tia wetsiikulokot wayaawata aaʼu shiyaawasein Sion tü wayuu ashajünakalü achiki. «Jerusalén» eesü sümünüle Sion, tü chajatkat Judá soʼu tia (Is. 60:14; 62:1, 2). a Jerusalén nayaawase na israelitakana. ¿Joujatü müin süshaʼwalaakai saaʼin Jerusalén sümaa warattuuin kasa sutuma? ¿Ekeraajüsücheʼeya tü nüshajakat Isaías maaʼulu yaa? Anasü wekirajaale sünain tia.

¿Joujatü müin süshaʼwalaakai saaʼin Jerusalén sümaa warattuuin kasa sutuma? Amaanüshii na judíokana Babiloniamüin, chajana naya 70 juya. Soʼu tia ajaʼttinnüsü Jerusalén sümaʼaleeya tü aʼwaajüleekat Maleiwa. Akanajuusü Babilonia natuma na medokana otta na persakana. Naküjain namüin na israelita chajanakana Babilonia eein süpüla naleʼejüin nachikuaʼa noumainpaʼamüin. Eeshii süpüla naleʼejüin Jerusalénmüin süpüla naʼwaajüin Maleiwa maʼaka nücheküin shia (Esd. 1:1-4). Soʼujee 537 süpülapünaa wakalia aleʼejüshii waneinnua judío Jerusalénmüin, saʼakajeejana naya tü poloosükat piamamüin eʼiruku chajatka Israel (Is. 60:4). Nantapa chamüin asülajüshii kasa nümüin Jehová, naainjain tü miʼiraa nuluwataakalü anain naya otta nakumajüin süchikuaʼa tü aʼwaajüleekat (Esd. 3:1-4, 7-11; 6:16-22). Sükajee nuʼwaajünüin Maleiwa nüchikuaʼa chaa Jerusalén müshii warattuuikai naaʼin na judíokana nutuma otta müshii naya maʼaka saaʼin luusa namüin na wayuukana, jama müin saʼakajee naya piʼyuushi süka nnojoluin anain nanoula.

Süpüshi neʼe tü ekeraajakat sünainjee tü nüshajakat Isaías. Wainma na judío eʼrüliijaakana wayumüin nümüin Jehová (Neh. 13:27; Mal. 1:6-8; 2:13, 14; Mat. 15:7-9). Nayouta achikichi Jesucristo, chi Mesíaskai (Mat. 27:1, 2). Ajaʼttinnüsü süchikuaʼa Jerusalén sümaʼaleeya tü aʼwaajüleekat Maleiwa soʼu juyaka 70.

Nüküjatüjülia achiki Jehová sajaʼttinnajatüin Jerusalén (Dan. 9:24-27). Nnojoluinjatü ekeraajüin süpüshuaʼa chaa Jerusalén tü nümakat Isaías süchiki nuʼwaajünüinjachin Jehová nüchikuaʼa maʼaka nücheküin shia.

¿Ekeraajüsüche maaʼulu tü nümakat Isaías? Aa, ekeraajüsü. Tü wayuukat shiyaawase «tü Jerusalén chakat sirumatuʼu». ¿Kasa kayaawaseka tü Jerusalén chakat sirumatuʼu? Nayaawase na nüpüshi Maleiwa chakana iipünaa. Müshi chi aluwataaushikai Pablo nachiki: «Müsü shia maʼaka saaʼin wanee wei» (Gal. 4: 26). Na süchonniikana nia Jesús namaʼaleeya na 144.000 anoujashii chainjanakana iipünaamüin, eeshi Pablo naʼaka. Akatannüshii naya nümüin Maleiwa otta süpüshi naya tü Israel nümaʼanajeejatkat Maleiwa (1 Ped. 2:9; Gal. 6:16).

Nakajee na anoujashii chainjanakana iipünaa müsü süshaʼwalaakai saaʼin tü Jerusalén chakat sirumatuʼu sümaa warattuuin kasa sutuma. Wekirajaa sünain tü alatakat namüin otta sünain tü sümakat Isaías kapiitulo 60.

Müshii saʼakapünaakai naaʼin piʼyuushi na anoujashii chainjanakana iipünaa outapa napüshuaʼa na aluwataaushikana, jama shikirajünüin maʼin alawaa nachikipünaa (Mat. 13:37-43). Müshii püreesakai naaʼin sutuma Babilonia tü kojutukalü atumawaa, Babilonia shiyaawase süpüshuaʼa tü iküleesia ekirajakalü alawaa. Ayatüsia müin nakuwaʼipa soʼu juyaka 1914 sülüʼülapa sükalia süpüla sajaʼttajatüin kasa mojusü (Mat. 13:39, 40). Nükatalüin  naya Maleiwa suulia Babilonia soʼu 1919, naaʼinmaasü maʼin tü aküjaakat pütchi. Müshii nashaʼwalaakai aaʼin süpüla müinjanain aka saaʼin luusa sümüin wayuu. b Soʼujee tia watta saalii wayuu sainküinjeejatkat mmakat süpüshuaʼa aapaaka sümaa tü pütchi naküjakat, eeshii naʼaka na anoujashii chainjanakana iipünaamüin, na aluwataainjanakana chejee iipünaajee maʼaka süküjain Isaías 60:3 (Apoc. 5:9, 10).

Meerü warattuuijeetkai maʼin saaʼin tü mmapaʼakat mapeena natuma na anoujashii chainjanakana iipünaamüin. Outapa naya asoʼiraajeerü naaʼin süpüla chainjanain naya iipünaamüin. Napüsheena naya tü jeketükat Jerusalén, «nümüraajüin naya Jesucristo» münüshii naya. Tü jeketükat Jerusalén nayaawase na 144.000 aluwataainjanakana jee sacerdoteinjanakana (Apoc. 14:1; 21:1, 2, 24; 22:3-5).

Soʼutku tü pütchi ashajünakat suluʼu Isaías 60:1 ekeraajeerü shia sünain tü jeketükat Jerusalén (anasü paashajeʼerüle Isaías 60:1, 3, 5, 11, 19, 20 sümaa Apocalipsis 21:2, 9-11, 22-26). Na aluwataapuʼukana saaʼu Israel aluwataapuʼushii naya chejee Jerusalén. Tü jeketükat Jerusalén nümaa Cristo naya na aluwataainjanakana paʼaraiisüpa tü Mmakat. ¿Jamaluʼulu süshakatüin iipünaajee nümaʼanajee Maleiwa tü Jeketükat Jerusalén? Shia süka saainjeerüin kasa napüleerua na wayuu kepiakana saaʼu tü Mmakat. Saashin tü Bibliakat meena waraitakai naaʼin na wayuu sainküinjeejanakana tü mmakat sutuma suwarala tia pueulokot otta meerü nülaʼajaakai saaʼin Maleiwa naainjala noulia otta nnojoleena outuin naya (Apoc. 21:3, 4, 24). Sunoutajeetkalaka kasa süpüshuaʼa nutuma Maleiwa maʼaka nüküjatüjülin shia Isaías otta waneinnua nünüikimaajana Maleiwa (Aluw. 3:21). Tü kaʼi nunoutajatkalü oʼu Maleiwa süpüshuaʼa kasa oʼttusü shia wanaa sümaa nüikalaain Jesús chaa iipünaa sünain aluwatawaa waneʼereeya sajaʼttüin kettaapa nutuma tü miit juya nuluwataainjatkalü oʼu.