AAPIRIA WAYUU Nuum. 1, 2023 | Eesü süpüla anain paaʼin. Jalouijeerü pümüin tü pütchi sümakat tü Bibliakat
Sainküinpünaa mmakat, akooʼomüinraashii na wayuu nnojoliikana anain suluʼu nekii. Sutuma tia shapaasü saaʼin wayuu jee mojusü saaʼin. Alatüsü tia sümüin wayuu miyoʼuyuu, sümüin tepichi, sümüin wayuu eekai sunoujain otta nnojotka anoujain, sümüin wayuu eekai washirüin otta nnojotka washirüin, sümüin wayuu eekai koleejiain otta nnojotka koleejiain. ¿Jamüshii nnojoliika anain suluʼu nekii waneinnua wayuu? ¿Jamüsü nakuwaʼipa sutuma? Sünain rewiisütakat tüü, aküjüneerü jamüin anaka neʼrajeʼerüle na makana akuwaʼipa otta jamüin aneetka naaʼin naaʼinrüle tü sümakat tü Bibliakat.
Joutsü wayuu nnojotka anain suluʼu shikii
Jaʼitaichi jintülin wanee wayuu jee miyoʼule nia, jaʼitaichi jalejeʼewalin nia, eeshi süpüla nnojolin anain nia suluʼu nikii. Paashajeʼera pütchi suluʼuka tü Bibliakat jalouijeetka pümüin süpüla anain paaʼin.
Nükaalinjeein pia Maleiwa
¿Jamüsü watüjaaka saaʼu niain neʼe Jehová chi ayaawatakai saaʼu jamüin waaʼin otta tü jülüjakat waaʼin?
1 | Puʼuraaja: Püpüta «najapuluʼu Maleiwa süpüshuaʼa tü kasa shapaakalü atuma» paaʼin
¿Eesüche süpüla püküjain nümüin Maleiwa tü shapaakalü atuma paaʼin? ¿Jamüsü anaka naaʼinrüle tia wanee wayuu shapaakai maʼin aaʼin?
2 | Puuʼulaa sümülialaiwa paaʼin tü sümakat tü Bibliakat
Aküjünüsü suluʼu tü Bibliakat nnojoleerüin eein piantua süpüshuaʼa tü kasa mojusü antajaaka wekiiruʼumüin jee mojuka atuma waaʼin.
3 | Nachiki wayuu namaiwajana
Waashajeʼerapa suluʼujee Bibliaka nachikimaajatü wayuu namaiwajanakana, eesü süpüla wayaawatüin saaʼu wanaawain tü wakuwaʼipakat namaa. Suluʼujee tia, sümülialeerü waaʼin süka nnojoliin wayain neʼe wamüiwaʼa shapaain maʼin aaʼin jee mojuin maʼin aaʼin.
4 | Anasü maʼin tü sümakat tü Bibliakat
Waashajeʼerüle suluʼujee tü Bibliakat pütchi atütüleʼereetka waaʼin otta waʼyataale süchiirua kasa eekat süpüla wountuin, mapüleejeerü wamüin wachecherüin waaʼin suulia tü kasa mojukalü atuma waaʼin wanaa sümaa nnojoluin anain waya suluʼu wekii.
Wakaalinja na nnojoliikana anain suluʼu nekii
Wakaalinjüle na waʼaleewain nnojoliikana anain suluʼu nekii eesü süpüla analüin naaʼin.
