Anuu nünüiki Seth: * «Wanaa sümaa tayuʼnnüin suluʼujee taʼyataain, ayuʼnnüsü taʼwayuuseya. Akaaliinjünüshii waya sutuma wapüshi soʼu piama juya jee yanamawaishii waya sünain eekai eein. Mojusü saaʼin taʼwayuuse waneepia saaliijee tia. Otta müshia tayakai, müshi nnojoikai kasain anain apüla taya.

»¿Kasa akaaliinjaka waya soʼu tia? Sotowaisü saaʼin Priscilla tü nümakat Jesuu suluʼu Mateo 6:34. Naashin Jesuu, nnojoluinjatü ashapataain waaʼin saaʼu tü alateetkat mapeena süka wainmeerüin tü kasa jülüjainjatkat waaʼin mapeena. Süka suchuntashaatain nümüin Maleiwa, katsüinsü saaʼin. Aluʼusaʼa tayakai, sümülialüin taaʼin tü sümakat Salmo 55:22. Tooʼulaain najapuluʼu Jeʼwaa tü alatakat wamüin maʼaka naaʼin chi salmistakai. Nükaaliinjain waya Jeʼwaa. Aʼyataaichipa taya maaʼulu yaa, shiajaʼa neʼe nnojoluin kachiirua waaʼin kamaʼanaa wainma korolo süka waaʼinrüin tü nümakat Jesuu suluʼu Mateo 6:20-22. Aleewajiraashii maʼin waya otta aleewashii maʼin waya nümaa Maleiwa».

Anuu nünüiki Jonathan: «Wanaa sümaa mojukuwaʼipalüin tü nneerü waʼyateʼetkat, ayoʼujaasü maʼin taaʼin. Süka aijaain shiiʼiree tü nneetkat, amülouisü tü waʼyataakalü anain soʼu 20 juya. Suluʼujee tia, aaʼayajirawaʼawaishi taya sümaa taʼwayuuse saaʼujee tü nneetkat. Nnojoishii waya ayaʼlajüin süka tarjeta de crédito suulia shiyouktünüin woulia.

»Atüjapejeʼe waya süpüleerua tü waaʼinrajatkat sutuma tü Wiwüliakat jee nutuma chi naaʼinkai Maleiwa. Aʼyataaichipa taya sünain eekai eein. Nnojoluitpa wainmain nneerü wakataajaka. Süka waʼyataain nümüin Jeʼwaa, nakaaliinjain waya na wawalayuukana. Natütüleʼerüin waaʼin jee nakaaliinjain waya suʼunnaa weʼrüin maʼin wamüliala».

Anuu sünüiki Raquel: «Wanaa sümaa nuuʼulaajaain taya chi taʼwayuusekai, üttüsü maʼin taaʼin jee aisü tamüin tü naaʼinrakat. Mojushaatasü taaʼin, shiasaʼa sutuma tarütkaain nünainmüin Maleiwa, nümüliajüin taaʼin. Oʼuraajüsü taya weinshi, jutataka taaʼin sutuma tia. Müsü naapakai saaʼin tamüin wanee tepinase.

»Sükaaliinjain taya tü Wiwüliakat süpüla tasünneʼerüin suluʼujee taaʼin tü üttaakalü aaʼin. Teʼitaain sünain takuwaʼipa tü nümakat Pablo suluʼu Roma 12:21, tü makalü mayaa: ‹Shia anaka aluʼu müleka jüyamürüle tü mojusükat süka tü anasü jaaʼinrakat waneepia›.

»Nükaaliinjain taya wanee taʼaleewain soʼu tia. Naashajeʼerüin tamüin tü sümakat Eclesiastés 3:6, nüküjüin tamüin sümaa kamaneein nia motuinjatüin taaʼin tü kasa alatüitpakat. Kapüleesü maʼin tamüin taaʼinrüin tü münakat tamüin, shiapajaʼa choʼujaain tamüin tia. Wainmapa tü taʼyataweekalü achiirua jooluʼu».

Müsü Elizabeth: «Puuʼulaajiraapa nuulia puʼwayuuse, choʼujaasü pükaaliinjünüin. Shia saaʼinraka tia tamüin wanee taʼaleewain waneepia. Aʼyalajüsü shia tamaa, sümüliajüin taaʼin jee shiiʼiyatüin sünain alin taya süpüla. Nükaaliinjain taya Jeʼwaa sükajee shiakalia süpüla tasünneʼerüin suluʼujee taaʼin tü mojuukalü aaʼin».

Jamüshijaʼa Luis, ayuuisü tü naaʼinkat, piantuaichi ajachijuuin nia. Eʼitaanüsü oxígeno nünain 16 oora  kaʼiwai. Müshi nia: «Oʼuraajüshi taya waneepia, shiasaʼa süchikijee toʼuraajüin, nükatchinrüin taaʼin Jeʼwaa nükajee chi naaʼinkai. Katsüinsü taaʼin sutuma toʼuraajüin, tatüjaa aaʼu alin taya nüpüla chi Maleiwakai».

Anuu sünüiki Petra, alatüirü suulia 80 suuyase: «Isaitpa tachiki taaʼinrüin waneeirua kasa. Mojusü taaʼin sutuma matchin maʼin taaʼin. Mapülüʼüsat maʼin taaʼin waneepia jee asajüsü taya wunuʼu. Jülüjasü taaʼin waneepia tü nümakat Jesuu nümüin chi Nüshikai sünain maa: ‹Taata Maleiwa, müleka pücheküle, anasüje puuʼuleʼerüle toulia tü müliaa teʼreetkat jooluʼu›. Suulialeʼeya nuuʼuleʼerüin Jeʼwaa nuulia Jesuu tü müliaa niʼrakat, nükatchinrüin naaʼin. Akaʼaya neʼe taya nutuma. Jutatsü taaʼin wanaa sümaa taashajaain nümaa Maleiwa» (Mateo 26:39).

Eetaairü maʼaka 30 juya nünain Julián tü ayuulii esclerosis múltiple münakat. Müshi nia: «Joyotopuʼushi taya taʼyataaiwaʼaya suluʼu wanee konpainyiia, aluʼusaʼa jooluʼu joyotüichipa taya suluʼu wanee silla de ruedas. Anapejeʼe taya süka taʼyataaichipain sünain akaaliinjaa wayuu. Wakaaliinjüle wayuu, nnojoleerü mojuin maʼin waaʼin otta shiimain nükatchinreʼerüin waaʼin Jeʼwaa suʼunnaa weʼrüin müliaa. Wanaawasü taaʼin nümaa Pablo wanaa sümaa nüküjüin katchin nia süpüla tü kasakat süpüshuaʼa nutuma Maleiwa chi katchinkai atuma waya» (Filipos 4:13, TNM).

Anuu nünüiki Antonio: «Wanaa sümaa ouktüin chi tashikai sutuma süsaapünaain nia kemion, nnojotsü tanoujain anain tia. Wanaʼaleeka nia sümaa tia süpüla müinjachin nia, eeyaai neʼe kaainjalashin nia. Nnojoishi kasakain nia tatuma. Jaʼrai kaʼi mayein nia suluʼu pitaat. Tachecherüin maʼin taaʼin suulia taʼyalajüin suʼupala maamaa. Tamüiwaʼapa taya, aʼyalajashaatashi maʼin taya. ‹Alejaittaʼaleejaʼa maka nia›, maʼwaishi taya.

»Tachuntashaatain nümüin Jeʼwaa soʼu tia süpüla nüchecherüin taaʼin jee süpüla anain taaʼin nutuma. Anashi taya mapa. Sotusü taaʼin tü sümakat tü Wiwüliakat eein süpüla sülataʼalaa sümüin wanee kasa nümüin wanee wayuu. Süka matüjain aküjaa alawaa chi Maleiwakai, shiimain teʼreechin nüchikuaʼa chi tashikai nüsoʼiraapa aaʼin» (Eclesiastés 9:11; Juan 11:25, TNM; Tito 1:2).

Anuu nünüiki Robert: «Wanaa sümaa toʼuraajüin sümaa tü taʼwayuusekat jutatsü waaʼin maʼaka süküjüin Filipos 4:6, 7. Sutuma jutatüin waaʼin, waküjüin namüin na periodistakana sünain süsoʼiraainjatüin saaʼin wayuu süchikuaʼa. Mayaainjeʼe ouktüin chi wachonkai sutuma sujutuuin tü katünasükat, jülüjasü waaʼin tü kaʼi talatakalü oʼu waya nümaa. Shia jülüjaka waaʼin waneepia tia.

»Wanaa sümaa neʼrüin waya wanee wawalayuuinnua suluʼu telewisoot, jaʼyasü waaʼu jimatüin waaʼin suʼunnaa waküjüin süchiki tü wanoulakat naashin. Waküjaka namüin müin wakuwaʼipa sutuma noʼuraajüin waaʼu. Nümüliajüin waaʼin Jeʼwaa soʼu tia sükajee tü mensaaje aluwataanaʼawaikat wamüin».

Shiimain nümülialüin waaʼin Jeʼwaa suʼunnaa weʼrüin müliaa maʼaka naaʼinrüin shia naka na wayuu waashajaainnapakana achiki. ¿Nümülialeeiche pia Maleiwa? Jamüsaʼa. Jaʼitairü kasain alatüin pümüin maaʼulu yaa, eeshi süpüla pükaaliinjünüin. * Püchajaa nüchiki Jeʼwaa, chi Maleiwa amüliajüikai wayuu (2 Corinto 1:3).