Shia nukuwaʼipa chi wayuu eekai nnojoluin yüülain aaʼin sutuma tü kasa mojusü alatawaikat nümüin. Nnojoipejeʼe atüjamaatüin neʼe wanee wayuu süpüleerua tia, atüjashi sünainjee tü alatawaikat nümüin. Müshi aka naaʼin chi jintüi kooʼuilichipakai, kojuyatua nüshanaain süpüla nütüjain okoyojoo, mayaapejeʼe kapüleein nümüin okoyojoo, atüjashi nia mapa. Akaʼaya nia, eejeerü tü kasa kapüleesü alateetkat nümüin süpüla nütüjain sünainjee.

Eeshii tepichi ooʼulaakana suulia aaʼinraa wanee kasa sutuma kapüleein shia namüin jee sutuma nayoujunüin. Eeshii eekai nayüülajaʼaleein. Anapejeʼe jülüjale naaʼin tüü:

• Nnojotsü eein wayuu aaʼinraka tü anasükat waneepia (Santiago 3:2).

• Alatawaisü kasa mojusü sümüin wayuu süpüshuaʼa (Eclesiastés 9:11).

• Aküjünajatü wamüin tü mojukat watuma süpüla watüjain sünainjee (Proverbios 9:9).

Eejiraale chi püchonkai sümaa tü kasa mojusü alatawaikat nümüin maiwaʼaya nia jintülin, eejiraajeechi nia sümaa tü eekat sülatüin nümüin mapa.

Mojule wanee kasa nutuma chi püchonkai

TÜ SÜMAKAT TÜ WIWÜLIAKAT: «Nujutuule akaratshitua chi wayuu lotokoi akuwaʼipa, atamaweechi nia nüchikuaʼa» (Proverbios 24:16).

Pikiraja chi püchonkai süpüla nnojoluin niyüülajaain saaʼu kasa eekai eein. Jamüsüjaʼa amülouire nutuma chi püchonkai wanee examen, ¿anasüche niyüülajaale sutuma tia? ¿Anasüche, «nnojoishi kasain anain apüla taya» nümüle?

Pükaalinja chi püchonkai süpüla jülüjain naaʼin tü nunouteʼerüinjatkat sünain nukuwaʼipa. Naaʼinrüle tia, atüjeechi nia süpüleerua anouteʼeraa sukuwaʼipa wanee kasa mojuka nutuma otta nnojoleerü naapüin naaʼin sünain tü mojaakalü aaʼin.

Nnojoishi piainjachin anouteʼerüin tü mojukat nutuma. Shia anaka aluʼu pükaalinjale nia süpüla niainjachin anouteʼerüin shia. Amülouire nutuma chi püchonkai wanee examen, eeshi süpüla pümüin nümüin: «¿Kasa eeka süpüla paaʼinrüin süpüla pütüjainjachin süpüleerua tü ekirajünakalü anain pia koleejialuʼu?».

Sülatüle wanee kasa mojuka maʼin

TÜ SÜMAKAT TÜ WIWÜLIAKAT: «Nnojotsü jütüjaain aaʼu tü alatajateetkat jümüin mapeena» (Santiago 4:14).

 Eesü süpüla sülatalaʼa sümüin wanee kasa sümüin wayuu süpüshuaʼa. Jamüshijaʼa wanee wayuu eekai washirüin, eesü süpüla amülouijaain nuulia süpüshuaʼa tü nümaʼanakat jee chi wayuu eekai anain, eeshi süpüla ayuuijaʼalaa nümüin. Müsü tü Wiwüliakat: «Chi eekai kawachirain, akanajuushi nia sünain ayoujirawaa. Chi eekai katchin, ayamunnüshi nia nutuma chi niʼipolokai. [...] Süka jamüin, alatalaʼa müsü kasa mojusü sümüin wayuu süpüshuaʼa» (Eclesiastés 9:11).

Süka alin püpüla na püchonniikana paaʼinmajüin naya suulia kasa mojusü. Iseetpejeʼe püchiki paaʼinmajüin naya suulia kasa süpüshuaʼa.

Eesüjaʼa müle pünüiki: «Wayuukaʼa joo miyoʼu chi tachonkai süpüla niʼrüinjatüin choʼujawaa jee nujunaanüin suulia wanee aʼyatawaa». Mayaapejeʼe nnojolin miyoʼuin chi püchonkai, eeshi eejiraajeechire nia sümaa waneirua kasa mojusü, eeshi süpüla nünaajaain wanee nüpüshi jee nuʼunüle wanee naʼaleewain wattamüin. *

Süküjünüle nümüin tü nunouteʼerüinjatkat sünain nukuwaʼipa

TÜ SÜMAKAT TÜ WIWÜLIAKAT: «Paapaa sümaa tü achiaanakalü oulia pia [...] süpüla kekiin pia mapa» (Proverbios 19:20).

Eeshijaʼa nüchiaanüle püchon sutuma wanee wayuu shiiʼiree nunouteʼerüin nukuwaʼipa, nnojoishi achiaanüin nia süpüla müliainjatüin naaʼin.

Pikirajüle püchon süpüla naapaain sümaa tü achiaanakalü anain nia, aneerü nukuwaʼipa sutuma otta jimateerü paaʼin süka laülaain naaʼin. Anuu tü nümakat John, wanee wayuu kachonshi: «Puwataamaatüle sünain anouteʼeraa naainjala na püchonniikana, kiʼreena naya sünain tia. Kachajaaleena naya püpüleerua, mülieerü paaʼin sünainjee tia otta mülieena na püchonniikana».

¿Kasaka paaʼinrajatüin süpüla anashiin nümüin chi püchonkai tü achiaanakalü anain nia? Nnojo pusounajaain naaʼu chi püchonkai nüchiaanüle koleejialuʼu jee jalapünaa yaa. Shia anaka aluʼu püsakirüle nia sünain tüü:

• «¿Jamüshiche püchiaanaka saaʼin pümüin?».

• «¿Kasache paaʼinrajatka süpüla punouteʼerüin pukuwaʼipa?».

• «¿Kaseetka paaʼinrüin sülatüle tia pümüin süchikuaʼa?».

Nüchiaanüle chi püchonkai süpüla nunouteʼerüin tü nukuwaʼipakat, aneerü nümüin tia otta aneerü nukuwaʼipa miyoʼupa nia.