Suulia mojuin maʼin paaʼin
Süküjain tü Wiwüliakat kasain waaʼinrajatüin süpüla talatüin waaʼin otta tü nnojoluinjatkat waaʼinrüin suulia mojuin waaʼin.
TÜ JASHIEEKAT
TÜ SÜMAKAT TÜ WIWÜLIAKAT: «Chi nnojoikai aashichijaamaatüin anaʼleeshia nuulia chi eekai katsüin» (Proverbios 16:32).
TÜ SÜNAINPÜNAAKAT. Wachechereein waaʼin suulia jashiee. Eeshii jashichire waya saalin wanee kasa aainjünaka wamüin, wachecherüinjatpejeʼe waaʼin suulia kaainjalajüin waya. Jamüshijaʼa maaʼinre naaʼin wanee wayuu sümaa jashiee, airuʼutsü nünüiki jee aainjashi kasa mojusü sümüin wayuu.
TÜ PAAʼINRAJATKAT. Matüjainre pia achecheraa paaʼin suulia jashiee, maaʼinjeerü paaʼin sutuma. «Toolo aaʼinchi wayuukai chira», eeshii na makana nümüin wanee wayuu eekai jashichin. Nnojotpejeʼe tooloin naaʼin, matüjainsai neʼe achecheraa naaʼin. Anuu sünüiki tü Wiwüliakat: «Chi wayuu matüjainkai achecheraa naaʼin suulia jashiee, müshi aka saaʼin wanee pueulo eekai masepüin ashutunaka aaʼu» (Proverbios 25:28). Asakireeshi palajana pia süchiirua wanee kasa suulia paashichijaamaatüin. «Chi wayuu ayaawatakai saaʼu nukuwaʼipa, nnojoishi aashichijaamaatüin nia», müsü tü Wiwüliakat (Proverbios 19:11). Ayaawateʼereechi pia paaʼin paapajüle tü aküjünakat süchiki tü alatakat.
PAAPA ANALUʼUT
TÜ SÜMAKAT TÜ WIWÜLIAKAT: «Shia anaka aluʼu müleka jaapüle analuʼut waneepia» (Colosas 3:15).
TÜ SÜNAINPÜNAAKAT. Eeshii na makana talatüin naaʼin waneepia na wayuu aapakana analuʼut. Jaʼitakajeʼe na wayuu alatüinnakana amüin kasa mojusü, natüjaa aaʼu shiimain tia. Naashin nayakana, nnojotsü mojukuʼu müin naaʼin sutuma kojutuin namüin tü kasa eekat namaʼana, sutuma naapüin analuʼut saaʼu otta nnojoluin jülüjain naaʼin tü alatakat namüin.
TÜ PAAʼINRAJATKAT. Püshaja kaʼiwai tü paapüinjatkalü aaʼu analuʼut. Eesüjaʼa shiale püshajüin waneirua kasa nnojoluwaika jülüjain maʼin paaʼin waneepia, maʼaka saaʼin piʼrüle niweetüin chi Kaʼikai sümaa anain maʼin nia, yootule pia nümaa wanee püpüshi otta saaʼu katüin poʼu. Püchajaale sukuwaʼipa süpüla paaʼinrüin tia, nnojoleerü mojuin maʼin paaʼin.
Wanee kasa anaka maʼin süpüla paaʼinrüin, shia paapüle analuʼut sümüin püpüshi otta paʼaleewainyuu saaʼu tü naaʼinrakat püpüleerua. Jülüja paaʼin kasain wayu tü kojutukat maʼin pümüin sünain nakuwaʼipa otta püküjeein tia namüin yootopa pia namaa jee püshajüle shia namüin suluʼu karaloʼuta, correo jee mensaaje. Paaʼinrüle tia, aleeweechi maʼin pia namaa otta talateerü paaʼin saaʼu paaʼinrüin kasa anasü namüin (Aluwataaushikana [Hechos] 20:35, TNM).
SOOʼOMÜIN TÜ SÜMAKAT TÜ WIWÜLIAKAT
Paapajeere sünüiki tü Wiwüliakat, eesü süpüla püdescargaajüin shia suluʼujee jw.org, eesü shia suluʼu 40 anüikii.
PIYOUTA AʼÜLÜJIRAWAA
«Tü achajawaakalü atkawaa müsü aka saaʼin ojutalaa wanee puettoʼu ataʼülia wüin; puʼuna yalejee nnojoluiwaʼaya eein aʼülüjirawaa» (PROVERBIOS 17:14).
NNOJO SHAPAAIN MAʼIN PAAʼIN SAAʼU TÜ PUKUWAʼIPEETKAT
«Nnojo jüshapajaain aaʼin saaʼu tü alateetkat mapeena, süka wainmeerüin tü kasa jülüjüinjatkat jaaʼin mapeena. Nnojotsü anain jushapataale aaʼin saaʼu kasa wainma maaʼulu yaa» (MATEO 6:34).
PIYAAWATEʼERA PAAʼIN
«Jülüjale paaʼin tü paaʼinrajatkat otta piyaawatüle saaʼu, aneerü pukuwaʼipa» (PROVERBIOS 2:11).
Eesüjaʼa kamalainjeerüle pümüin aashajeʼeraa tüü
¡EEJA WAAʼIN!
Tü paaʼinrajatkat süshapataale paaʼin
Aküjüneerü waneirua pütchi suluʼujee tü Wiwüliakat akaalinjeechika pia süpüla nnojolin süshapataain maʼin paaʼin otta tü paaʼinrajatkat sülatüle tia pümüin.
