Naashin na tottoot anoukteʼerakana saaʼin wayuu, talateerü maʼin naaʼin wanee wayuu niyaawatüle saaʼu choʼujaain chi Maleiwakai nümüin. ¿Kasa naainjaka noʼutku na wayuukana süpüla talatüinjatüin naaʼin? Eeshii na aʼyataakana maʼin süchiirua akaaliinjaa na wayuu müliakana. Eeshii na aaʼinmajakana mürüt jee wunuʼulia suulia sajaʼlajeʼennüin. Eeshii na jülüjakana aaʼin epintajaa otta na ekirajaakana sünain eeʼirajaa. Nnojotpajaʼa eeyaain talatüin naaʼin sutuma tia.

Na wayuu aashajeʼerüliikana tü Wiwüliakat, natüja aaʼu choʼujaain chi Maleiwakai sümüin wayuu. Süka jamüin, aletüjülia nakumajia nutuma Maleiwa. Tü palajatkalüirua kapiitulo suluʼu tü karalouktakat Génesis, aashajaasü süchiki nukumalain Maleiwa na wayuukana sümaiwa paala. Aleewapuʼushii naya nümaa Maleiwa otta yootopuʼushi nia namaa (Génesis 3:8-10, NM). Nnojoishii nukumajüin Jeʼwaa na wayuukana süpüla noʼunirüinjatüin nakuwaʼipa namüiwaʼa; choʼujaasü namüin yootuin naya nümaa Maleiwa. Kojuyatua süküjüin tü Wiwüliakat tia.

Müsü nünüiki Jesuu: «Anataʼaleeshiijaʼa maʼi jia eʼrakana sünain cheʼojaain chi Maleiwakai jümüin» (Mateo 5:3). Sutuma tü nümakat Jesuu, wayaawata aaʼu talatüin saaʼin wayuu süchajaale chi Maleiwakai. ¿Jamüsü sukuwaʼipa süpüla wachajaain chi Maleiwakai? Müshi Jesuu: «Nnojotsü shiain sümüiwa tü pankat katüin atüma soʼu wayuu, kateerü oʼu shiaya sütüma süpüshua tü nünüikikat chi Maleiwakai» (Mateo 4:4). Eesü süpüla talatüin waaʼin sutuma tü nünüikikat Jeʼwaa otta sutuma tü nuluwataakalü anain waya. Wekiraja sünain apünüinsü kasa süpüla wountüinjatüin tia.

Mainma tottoot akaaliinjaka wayuu süpüla aipüraliinjanain naya, talatüinjatüin naaʼin, anajiraainjanain naya sümaa napüshi, natüjüinjanain anoukteʼeraa wanee mojujirawaa otta natüjaainjatüin aaʼu kasapülajanain yaaka naya saaʼu tü mmakat. Akaisaʼa niain neʼe Jeʼwaa kekiika maʼin süpüla nükaaliinjüin wayuu. Süka jamüin, nukumala napüshuaʼa na wayuukana.

 Jamüshijaʼa piyaʼlajüle wanee ayujia ayaakuaa jee shiale wanee computador, antüsü wanee karaloukta sümaa süpüla pütüjaainjatüin saaʼu jamüinjatüin sukuwaʼipa süchuwajaayaa. Tia karalouktakat, nüshajala chi kakumalakai tü ayujiakat ayaakuaa. Süka nukumalain waya Jeʼwaa, naapüin wamüin tü Wiwüliakat süpüla watüjüinjanain süpüleerua tü wakuwaʼipainjatkat. Süküjüin wamüin tü Wiwüliakat kasain nukumajüin apüla waya Maleiwa otta tü waaʼinrajatkat süpüla anainjatüin wakuwaʼipa.

Pansaasü süshajia tü karaloukta antakat sümaa wanee ayujia ayaakuaa. Müsia neʼe tü sümakat tü Wiwüliakat. Saapirüin waya suulia tü kasa eekat süpüla sumojujeʼerüin wakuwaʼipa. Eesüjaʼa süpüla müin anakai saaʼin wamüin aaʼinraa tü sümakat wayuu suulia tü nümakat Maleiwa. Akatsaʼa nnojoluin anain jülüjüle waaʼin tia. Süka jamüin, nia neʼe Jeʼwaa atüjaaka saaʼu tü aneetkalü atuma wakuwaʼipa.

Mayaapejeʼe nüküjüin wamüin Jeʼwaa tü waaʼinrajatkat süpüla anainjatüin wakuwaʼipa, nnojotsü nüpüleeruain waaʼin süpüla woonooinjanain nümaa. Sutuma alin waya nüpüla, müshi nia wamüin sümaa kamaneein: «Tayakai Jeʼwaa, taya chi Pümaleiwasekai, Chi ekirajakai pia süpüla anainjatüin pukuwaʼipa, Chi oʼunirakai pia suluʼu tü wopu puʼunüinjatkalü aluʼu. Poonoole sümüin tü taluwataakalü anain, jimateerü paaʼin maʼaka saaʼin wanee süchi otta loteerü pukuwaʼipa maʼaka saaʼin sümüna tü palaakat» (Isaías 48:17, 18, NM). Choʼujaashi chi Maleiwakai wamüin. Süka jamüin, aneerü wakuwaʼipa woonoole sümaa tü nümakat wamüin.

Eeshii wayuu nnojoliika choʼujaain amüin Maleiwa naashin otta nnojoishii anoujüin nünain. Naashin nayakana, nnojotsüjeʼe eein kasa mojusü müleka eere wanee Maleiwa aikai apüla wayuu. Eeshii namüle: «¿Jamüshii müliaka maʼin na wayuu anamiakana? ¿Jamüshii jemeika mainma tepichi sümaa kamojulain naya? ¿Jamüsüche mojuka maʼin wakuwaʼipa?». Nnojotsü mojuin wasakireʼerüle waaʼin sünain tia. Watüjaale saaʼu jamüin sülataka, eesü süpüla suʼwanajeʼerüin wakuwaʼipa. Suulia niain weʼitaain Maleiwa sünain tü kasa mojusü alatakat, shia anaka aluʼu wachajaale suluʼu tü Wiwüliakat tü nümakat süchiki tia.

Saashin Génesis kapiitulo apünüin, kanüikiyaasü wanee wüi nutuma Satanaa sümüin Eva süpüla nimeejüinjatüin shia nümaʼaleʼeya Adán. Tü keeʼireekat naaʼin Satanaa, shia nnojoliinjanain noonooin Adán otta Eva sümaa nünüiki Maleiwa. Süpüla nnojoliinjanain ouktüin naya, nnojoluinjatü neküin süchon tü wunuʼu nüpülajakat Maleiwa noulia. Müshi Satanaa sümüin Eva: «Nnojo. Nnojotsü shiimüin tia. Nnojoleena jia ouktüin. Müleka jiküle süchon tü wunuʼukot, kekiijeena maʼi jia süpüla kasa süpüshua. Meena aka jia Maleiwakai sünain jiyaawatüin saaʼu tü anasükat je tü mojusükat. Müsüjeseʼe niyouktüin süpuleerua jiküinjatüin suchon tü wunuʼukot» (Génesis 2:16, 17; 3:4, 5).

Sükajee tü nümakat Satanaa, nnojoishi naʼalaajüin neʼe chi Maleiwakai. Nüküjüin nnojolin anain nia süpüla nuluwataainjachin. Naashin chi Yolujaakai, anainjatü nakuwaʼipa na wayuukana müleka  noonoole nümaa nuulialeʼeya Maleiwa. ¿Jamüsü süpüla sütüjaanüin aaʼu müleka shiimainre jee alawaale tü nümakat chi Yolujaakai? Ooʼulaanüshi Satanaa nutuma Jeʼwaa otta na nümaajanakana süpüla neeʼiyatüin aneerüle nakuwaʼipa na wayuukana naluwanaajiraale saaʼu nakuwaʼipa namüiwaʼa.

¿Jamüsü saaʼin pümüin tia? ¿Aneetche nakuwaʼipa na wayuukana naluwanaajiraale saaʼu nakuwaʼipa namüiwaʼa? Jülüja paaʼin kasanainjeein tü kasa mojusü alatakat. Maʼaka saaʼin tü müliaakat, tü ayuuliikat, tü ouktaakat, tü mojulawaakat, tü atkawaakat, saainjünüin kasa mojusü sümüin wayuu, suʼutünüin aaʼin mainma wayuu otta yarüttüin sukuwaʼipa wayuu. Tia, otta waneeirua kasa mojusü, alatüsü süka kaʼyatüin wayuu nuulia Maleiwa. Jaʼitairü mainmain tü kasa naainjakat shiiʼiree nanoukteʼerüin shia. Isasü nachiki. Nnojoishi niain chi Maleiwakai kasirüin tü kasa mojusü alatakat. Müsü tü Wiwüliakat nachiki na amojujakana sukuwaʼipa wayuu: «Chi wayuukai aluwataashi naaʼu na wayuukana süpüla numojujüin nakuwaʼipa» (Eclesiastés 8:9, NM).

Sünainjee tia, watüjaaitpa aaʼu choʼujaain chi Maleiwakai wamüin. Choʼujaashi nia wamüin süpüla watüjaainjatüin jamüin mojuka wakuwaʼipa otta süpüla nunoukteʼerüin tü alatakat wamüin.

Kakaliainna na wayuukana shiiʼiree nasünneʼerüin tü ayuuliikat, tü laülawaakat jee tü ouktaakat. Mayaapejeʼe naʼyataain maʼin süchiirua otta nojutüin mainma nneerü sünain, isasü nachiki nasünneʼerüin shia. Eeshii na achajaakana sukuwaʼipa süpüla nnojoliinjanain laülaayuuin naya. Mayaasüjeʼe naainjüin tia, isasü nachiki nantüin sünain tü shipikat.

Wanaa sümaa nukumajüin Jeʼwaa na wayuukana, nücheküin napüleerua talatüinjatüin naaʼin. Ayatayülia nücheküin Maleiwa talatüinjatüin waaʼin (Génesis 1:27, 28; Isaías 45:18). Watüjaa aaʼu nikeraajeerüin Jeʼwaa süpüshuaʼa tü kasa nüküjakat wamüin (Isaías 55:10, 11). Süküjüin wamüin tü Wiwüliakat paʼaraiiseerüin tü Mmakat. Meerü aka saaʼin tü paʼaraiisü eʼitaanakalü aluʼu Adán sümaa Eva. Müsü Alateetkat Mapeena jee Apocalipsis 21:4 nüchiki Maleiwa: «Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia». ¿Kasa naainjüinjatka Maleiwa süpüla nikeraajüinjatüin tia? ¿Jamüsü süpüla anainjatüin wakuwaʼipa sünainjee?

Nikirajüin Jesukürisüto na aluwataaushiikana sünain oʼuraajaa süpüla shikeraajüinjatüin tü keeʼireekat naaʼin Maleiwa. Mainma na wayuu atüjaakana saaʼu tü nüküjakat Jesuu. Müshi nia: «Washikai chakai sirumatuʼu, wule putuma tü pünüliakat. Sünta tü puluwataayakat. Saainjüna tü keeʼireekat paaʼin yaa mmapaʼa maʼaka saainjünüin chaa iipünaa» (Mateo 6:9, 10, NM). Niʼitaainjatü Maleiwa tü Nuluwataayakat süpüla najaʼttirüinjatüin tü kasa mojusükat otta süpüla eeinjatüin nutuma wanee mma jeketü (Daniel 2:44; 2 Pedro 3:13, NM). * Eepajaʼa tü kasa waainjüinjatkat. ¿Kasa wayuu tia?

 Nüküjüin Jesukürisüto tü waainjüinjatkat. Müshi nia: «Kateena oʼu waneepia na ayatakana ekirajaain püchiki piakai, chi Maleiwa shiimainshikai otta tachiki tayakai Jesukürisüto, chi püjünalakai» (Juan 17:3, NM). Shiimain tia, eesü süpüla katüin woʼu waneepia nutuma Jeʼwaa suluʼu wanee mma jeketü. ¿Choʼujaashiche chi Maleiwakai wamüin? «Aa», choʼujaashi nia wamüin.

Alatüirü 2.000 juya süchikijee naashajaain Pablo nüchiki Maleiwa namaa na atüjüshiikana maʼin chaa Atenas. Müshi nia: «Nia aapakaʼaya wamüin kataa oʼu, nia aapakaʼaya tü jouktai wasanatkat aka waaʼin otta kasakat süpüshuaʼa». Süchikijee tia nümaka: «Süka jamüin, nünain Maleiwakai, katoʼuchii waya, waraittüshii waya otta wayuushii waya. Müsü nanüiki waneeirua noʼuluku na jüpüshi atüjashiikana: ‹Nüpüshi waya chi Maleiwakai› » (Aluwataaushikana 17:25, 28).

Shiimain tü nümakat Pablo namüin na chajanakana Atenas. Naapüin wamüin chi Maleiwakai tü jouktai wasanalakat, tü eküülü wekakat otta tü wüin wasakat. Müleka nnojorüle naapüin Maleiwa wamüin tia, ouktüshiijeʼe waya. ¿Jamakaʼa ayataka Maleiwa sünain akaaliinjaa wayuu sümaa eein na nnojoliikana anoujeein nünain? Müshi Pablo: «Nükumajüin shia Maleiwakai süpüla süchajaainjachin nüchikü, kamaʼache süntüle nünain müleka süchajaale maʼi nüchikü. Nnojoishijasa wattain Maleiwakai woulia waneʼewai wakua» (Aluwataaushikana 17:27).

¿Keeʼireesü paaʼin piʼraajüin chi Maleiwakai? ¿Pütüjeein sooʼomüin süchiki tü kasa naainjüinjatkat? ¿Pütüjeein sooʼomüin süchiki tü paainjüinjatkat süpüla talatüinjatüin paaʼin süpüla kaʼika süpüshuaʼa? Müle shia, paashajaa nümaa wanee aküjüi pütchi nüchiki Jeʼwaa jee shiale puluwataain karaloukta namüin na ashajakana karalouktakat tüü. Nakaaliinjeechi pia.